រដ្ឋបាលខេត្តបន្ទាយមានជ័យ សម្រេចបើកការធ្វើដំណើរចេញ-ចូលឡើងវិញ លើទីតាំងបុរីដួងច័ន្ទ និងបន្តបិទខ្ទប់លំនៅដ្ឋានចំនួន៩ ដើម្បីទប់ស្កាត់ការឆ្លងរីករាលដាលនៃជំងឺកូវីដ
ខេត្តបន្ទាយមានជ័យ៖ក្រោយពីរកឃើញវិជ្ជមានជំងឺកូវីដ១៩ ទៅលើជនជាតិឥណ្ឌូនេស៊ីម្នាក់ ស្នាក់នៅក្នុងបុរីដួងច័ន្ទ ស្ថិតនៅក្នុងភូមិសាមគ្គីមានជ័យ សង្កាត់/ក្រុងប៉ោយប៉ែតមកនោះ អាជ្ញាធរបានចុះបិតខ្ទប់ទាំងយប់ ដោយដាក់កម្លាំងយាមទាំងយប់ទាំងថ្ងៃ រហូតមកដល់ពេលនេះអស់រយះពេលជាង១០ថ្ងៃមកនោះ រដ្ឋបាលខេត្តបន្ទាយមានជ័យ បានសម្រេចបើកការធ្វើដំណើរចេញ-ចូលជាធម្មតាឡើងវិញ ប៉ុន្តែលំនៅដ្ឋានចំនួន៩ នូវតែបន្តបិតខ្ទប់ ដើម្បីបង្ការ និងស្កាត់កុំឲ្យមានការឆ្លងរីងរាលដាលនៃជំងឺកូវីដ១៩ ទៅកាន់ដំបន់ផ្សេងទៀត។
យោងតាមសេចក្តីសម្រេចរបស់រដ្ឋបាល ខេត្តបន្ទាយមានជ័យលេខ១៣៣/២១ ស.ស.រ បានបញ្ជាក់ថា ចាប់ពីម៉ោងសូន្យ ថ្ងៃទី១០ ខែឧសភា ឆ្នាំ២០២១ តទៅបើកការធ្វើដំណើរចេញ-ចូលជាធម្មតាឡើងវិញ លើទីតាំងបុរីដួងច័ន្ទ ប៉ុន្តែលំនៅឋានលេខ j23 - j24 - J25 – I34B - I43 – E25 – E40 – F49 - A12 នៃបុរីដួងច័ន្ទ នូវតែបន្តបិតខ្ទប់ រហូតដល់ថ្ងៃទី២៣ ខែឧសភា ឆ្នាំ២០២១ ក្នុងគោលបំណងធានាដល់ប្រសិទ្ធភាព នៃការគ្រប់គ្រងការឆ្លងរាលដាលនៃជំងឺកូវីដ១៩ ក្នុងព្រឹត្តការណ៍ «សហគមន៍ ២០ កុម្ភៈ ២០២១» នៅក្នុងភូមិសាស្ត្រដែលត្រូវបិទខ្ទប់ និងទប់ស្កាត់ជំងឺនេះមិនឱ្យឆ្លងរីករាលដាលទៅកាន់តំបន់ផ្សេងទៀត។
រដ្ឋបាលខេត្តបញ្ជាក់ទៀតថា ក្នុងអំឡុងពេល នៃការអនុវត្តវិធានការបន្តការបិទខ្ទប់ នៃលំនៅឋានខាងលើនេះ បុគ្គលគ្រប់រូប ត្រូវបានហាមឃាត់ ការធ្វើដំណើរចេញពីលំនៅឋាន ឬទីសំណាក់បច្ចុប្បន្ន លើកលែងតែក្នុងករណ៍ចាំបាច់ដូចជា ការធ្វើដំណើរទៅមន្ទីរពេទ្យ មណ្ឌលសុខភាព សម្ភព ទីកន្លែងព្យាបាល ឬឱសថស្ថាន ដោយមូលហេតុសុខភាព តែនៅក្នុងរង្វង់ភូមិសាស្ត្រដែលត្រូវបិទខ្ទប់។
ចំពោះការធ្វើដំណើរដោយមូលហេតុសុខភាពចេញទៅក្រៅរង្វង់ភូមិសាស្ត្រ ដែលត្រូវបិទខ្ទប់នេះ អាចធ្វើទៅបានដោយមានការអនុញ្ញាតពីអាជ្ញាធរដែលទទួលបន្ទុក អនុវត្តវិធានការបិទខ្ទប់ ដោយកំណត់ចំនួនមនុស្សមិនឱ្យលើសពី៤នាក់ សម្រាប់ករណ៌នីមួយៗ។
ម្យ៉ាងវិញទៀតរាល់ការលើកលែងខាងលើ បុគ្គលគ្រប់រូបមានកាតព្វកិច្ច ត្រូវអនុវត្តវិធានការសុខាភិបាល រួមមាន៖ ការពាក់ម៉ាស់ រក្សាគម្លាតសុវត្ថិភាព ព្រមទាំងប្រកាន់ខ្ជាប់នូវការធ្វើអនាម័យ ដើម្បីសម្លាប់មេរោគ និងការវាស់កម្ដៅ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩។
ជាងនេះទៅទៀតក្នុងអំឡុងពេល នៃការអនុវត្តវិធានការបន្តបិទខ្ទប់លំនៅឋានខាងលើ ត្រូវបានហាមឃាត់រាល់ការជួបជុំ ឬការប្រមូលផ្ដុំមនុស្សលើកលែងតែ ក្នុងករណីចាំបាច់ដូចជា ការជួបជុំក្នុងចំណោមសមាជិកគ្រួសារដែលរស់នៅក្នុងលំនៅឋាន ឬទីសំណាក់ជាមួយគ្នា , ការជួបជុំរបស់បុគ្គលិកសុខាភិបាល ដើម្បីយកវត្ថុសំណាកបុគ្គលដែលពាក់ពន្ធ័ដោយផ្ទាល់ឬ ដោយប្រយោល ជាមួយអ្នកផ្ទុកជំងឺកូវីដ-១៩ ឬដើម្បីយកអ្នកដែលផ្ទុកជំងឺកូវីដ១៩ ក៏ដូចជាបុគ្គលិកសុខាភិបាល ដែលបំពេញការងារសង្គ្រោះបន្ទាន់ផ្សេងទៀត ,ការជួបជុំរបស់អាជ្ញាធរមានសមត្ថកិច្ច កម្លាំងគណៈបញ្ជាការឯកភាពរដ្ឋបាលគ្រប់លំដាប់ថ្នាក់ក្នុងការបំពេញការងារថែរក្សារសន្តិសុខ សណ្តាប់ធ្នាប់សាធារណៈ៕ព័ត៌មានលំអិតសូមអាននូវសេចក្តីប្រម្រេចរបស់រដ្ឋបាលខេត្តបន្ទាយមានជ័យ ដែលមានដូចខាងក្រោមៈ
