កម្លាំងចម្រុះ បន្តចុះណែនាំអប់រំផ្សព្វផ្សាយ នូវវិធានការរបស់ប្រមុខរាជរដ្ឋាភិបាលកម្ពុជា និងសេចក្តីសម្រេចរបស់រដ្ឋបាលខេត្តបន្ទាយមានជ័យ ស្តីពីការផ្អាកធ្វើចរាចរណ៍ចាប់ពីម៉ោង២០ដល់៥ព្រឹក
ខេត្តបន្ទាយមានជ័យ៖ដើម្បីការពារ និងទប់ស្កាត់កុំឲ្យមានការឆ្លងរីករាលដាល នៃជំងឺកូវីដ១៩ ទៅកាន់តំបន់ផ្សេងទៀតនោះ គណៈបញ្ជាការឯកភាពក្រុងប៉ោយប៉ែត មានកម្លាំងនគរបាលក្រុងដឹកនាំដោយលោកវរសេនីយ៍ទោ បោន សីហា អធិការស្តីទី ក្រុងប៉ោយប៉ែត ,លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត និងកម្លាំងអន្តរាគមន៍ទិសទី១ បន្ទាយមានជ័យ សហការជាមួយនិងសឹងរងក្រុង ដឹកនាំដោយលោកវរសេនីយ៍ទោ ឡេង ហុងលាង មេបញ្ជាការផ្នែកសឹងរងក្រុងប៉ោយប៉ែត បន្តចុះណែនាំអប់រំផ្សព្វផ្សាយ ដល់ប្រជាពលរដ្ឋនៅក្នុងភូមិសាស្ត្រក្រុងប៉ោយប៉ែតទាំងមូល នូវវិធានការរបស់ប្រមុខរាជរដ្ឋាភិបាលកម្ពុជា គឺ«៣កុំ ៣ការពារ និង២ចូលរួម» និងសេចក្តីសម្រេចរបស់រដ្ឋបាលខេត្តបន្ទាយមានជ័យលេខ១១៣/២១ ស ស រ ស្តីពីការផ្អាកបណ្ដោះអាសន្ននូវសកម្មភាពការធ្វើចរាចរណ៍ឆ្លងកាត់ក្នុងភូមិសាស្ត្រក្រុង ចាប់ពីម៉ោង២០ (ម្ភៃ)យប់ ដល់ម៉ោង៥ (ប្រាំ)ព្រឹក ជាកំហិត។
បើតាមលោក គាត ហ៊ុល អភិបាលនៃគណៈអភិបាលក្រុង និងជាប្រធានគណៈបញ្ជាការឯកភាពក្រុង បានឲ្យដឹងថា ការចុះណែនាំអប់រំផ្សព្វផ្សាយ ដល់ប្រជាពលរដ្ឋនៅក្នុងភូមិសាស្ត្រក្រុងប៉ោយប៉ែត នូវវិធានការរបស់ប្រមុខរាជរដ្ឋាភិបាលកម្ពុជា និងសេចក្តីសម្រេចរបស់រដ្ឋបាលខេត្ត មិនមែនជាលើកទី១នោះទេ ពោលគឺរាល់យប់តែម្តង ដើម្បីជាការដាសតឿនដល់ប្រជាពលរដ្ឋ កុំឲ្យភ្លេចខ្លួន ក្នុងនោះរដ្ឋបាលក្រុងក៏បានប្រើឧបករណ៍បំពងសម្លេង(មេក្រូ) ប្រកាសតាមផ្សារ និងតាមភូមិជារៀងរាល់ថ្ងៃផងដែរ។
បើតាមលោកវរសេនីយ៍ទោ ឡេង ហុងលាង មេបញ្ជាការផ្នែកសឹងរងក្រុង បានឲ្យដឹងនៅយប់ថ្ងៃទី០៤ ខែឧសភា ឆ្នាំ២០២១ថា កងកម្លាំងសមត្ថកិច្ចទាំង៣ស្ថាប័ន ចុះណែនាំអប់រំផ្សព្វផ្សាយ និងត្រួតពិនិត្យការពារនៅក្នុងភូមិសាស្ត្រក្រុងទាំងមូល បានសហការដាក់វេនគ្នាចាប់តាំងពីក្បាលព្រលប់រហូតដល់ភ្លឺយ៉ាងតឹងរឹងបំផុត ពិសេសមិនអនុញាតឲ្យមានការធ្វើចរាចរណ៍ក្នុងអំឡុងថិរវេលានៃការហាមឃាត់ នូវសេចក្តីសម្រេចរបស់រដ្ឋបាលខេត្តបន្ទាយមានជ័យឡើយ។ដោយឡែកកងកម្លាំងដែលកំពុងឈរជើងយ៉ាមកាមនៅតាមគោលដៅ ក្នុងតំបន់បិតខ្ទប់ ខិតខំការពារ និងទប់ស្កាត់ទាំងយប់ទាំងថ្ងៃ ដោយដាក់វេនគ្នាយ៉ាងតឹងរឹងបំផុត៕
