មេបញ្ជាការ កងពលតូចថ្មើរជើងលេខ៥១ អញ្ជើញចុះត្រួតពិនិត្យ និងសួរសុខទុក្ខក្រុមគ្រូពេទ្យកងទ័ពជួរមុខ ដែលកំពុងបំពេញប្រតិបត្តិការយកសំណាក
ខេត្តបន្ទាយមានជ័យ៖នៅព្រឹកថ្ងៃទី២៥ ខែឧសភា ឆ្នាំ២០២១ លោកឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ និងលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត អញ្ជើញចុះពិនិត្យ និងសួរសុខទុក្ខ ក្រុមគ្រូពេទ្យជួរមុខរបស់កងពល ដែលកំពុងបំពេញប្រតិបត្តិការ យកសំណាកជូនប្រជាពលរដ្ឋខែ្មរ និងជនបរទេស ស្ថិតនៅស្ថានីយ៍រថភ្លើងក្រុងប៉ោយប៉ែត ខេត្តបន្ទាយមានជ័យ។
គួរកត់សំគាល់ថា ក្រុងប៉ោយប៉ែត នៅតែបន្តរកឃើញចំនួន នៃអ្នកវិជ្ជមានជំងឺកូវីដ-១៩ ជាបន្តបន្ទាប់ ដោយមានការយកចិត្តទុកដាក់ និងដឹកនាំបញ្ជាផ្ទាល់ពីសំណាក់ ឯកឧត្តម អភិបាល ខេត្តបន្ទាយមានជ័យ បណ្តាមេបញ្ជាការកងកម្លាំប្រដាប់អាវុធ និងស្ថាប័នចំណុះគណៈបញ្ជាការឯកភាពខេត្ត រួមគ្នាប្រយុទ្ធប្រឆាំង និងជំងឺដ៏កាចសាហាវនេះ។
សូមបញ្ជាក់ថា ស្ថាប័នកងកម្លាំងប្រដាប់អាវុធចំនួន៣ អង្គភាព បានប្តូរឯកសណ្ឋានព៍ណស សហការជាមួយក្រុមគ្រូពេទ្យមន្ទីរសុខាភិបាលខេត្ត ចូលសមរភូមិមុខប្រយុទ្ធរួមមាន ៖កងពលតូចថ្មើរជើងលេខ៥១ ,តំបន់ប្រតិបត្តិការសឹករងបន្ទាយមានជ័យ និងកងរាជអាវុធហត្ថខេត្តបន្ទាយមានជ័យ។
ឧត្តមសេនីយ៍ត្រី សឹង្ហ ទំុ បានគូសបញ្ជាក់ថា កងកម្លាំងទាំង៣ស្ថាប័ន សហការជាមួយក្រុមគ្រូពេទ្យមន្ទីរសុខាភិបាល បានធ្វើប្រតិបត្តិការរួមគ្នាដោយយកចិត្តទុកដាក់ ជួយពន្លឿនការយកសំណាក ដើម្បីជួយទប់ស្កាត់ និងកាត់ផ្តាច់អោយខានតែបាននៃការឆ្លងរីករាដាលជំងឺកូវីដ-១៩ ទៅបណ្តាតំបន់ផ្សេងទៀត។
ក្នុងឱកាសនោះដែរ លោកមេបញ្ជាការ បានថ្លែងកោតសរសើរ និងអរគុណដល់ក្រុមគ្រូពេទ្យទាំងអស់ដែលបានខិតខំបំពេញតួនាទីភារកិច្ចប្រកបដោយភាពទទួលខុសត្រូវ និងការលះបង់ខ្ពស់ ចូលរួមចំណែកជាមួយរាជរដ្ឋាភិបាល ដោះស្រាយបញ្ហាក្នុងកាលៈទេសៈដ៏លំបាកនេះដើម្បីបុព្វហេតុជាតិមាតុភូមិ និងប្រជាជន៕
