បុរសម្នាក់ជក់ថ្នាំញៀនឡើងចង់ឡប់សតិ គ្រាន់តែខឹងនិងសត្វឆ្កែសោះស្រាប់តែទៅវាយធ្វើបាបប្រពន្ធរបួសធ្ងន់ ឪពុកបង្កើតប្តឹងឲ្យនគរបាលបាប់ដាក់គុក
ខេត្តបន្ទាយមានជ័យ៖គ្រាន់តែខឹងនិងសត្វឆ្កែសោះស្រាប់តែបុរសជក់ថ្នាំញៀនឡើងចង់ឡប់សតិម្នាក់ ទៅវាយធ្វើបាបប្រពន្ធ បណ្តាលឲ្យរបួសធ្ងន់ រហូតឪពុកបង្កើតទៅប្តឹងឲ្យនគរបាលចាប់ខ្លួនដាក់គុក នៅវេលាម៉ោង៩និង៣០នាទីព្រឹក ថ្ងៃទី១៩ ខែឧសភា ឆ្នាំ២០២១ នៅភូមិក្តឹនថ្ម ឃុំគោករមៀត ស្រុកថ្មពួក ខេត្តបន្ទាយមានជ័យ។ក្រោយពីឃាត់ខ្លួនសមត្ថកិច្ចរកឃើញថ្នាំញៀននៅនឹងខ្លួន១កូនថង់។
នគរបាលមូលដ្ឋានបានឲ្យដឹងថា ជនសង្ស័យមាន ឈ្មោះ អឿន ភារុណ ភេទប្រុស អាយុ២៨ឆ្នាំ រស់នៅភូមិក្តឹមថ្ម ឃុំគោករមៀត ស្រុកថ្មពួក ខេត្តបន្ទាយមានជ័យ។
សមត្ថកិច្ចបញ្ជាក់ថា នៅពេលកើតហេតុនោះ សង្ស័យក្រោយពីមកពីជក់ថ្នាំញៀនហើយ ក៏ស្រាប់តែមកដល់ផ្ទះមានកំហឹងសត្វឆ្កែឈានដល់វាយធ្វើបាបប្រពន្ធម៉ាចាស់ដៃ បណ្តាលឲ្យរងរបួសប៉ោងមុខ
ដោយឡែកឪពុកបង្កើតខាងប្តីឈ្មោះ ឡុង ត្រេន ភេទប្រុស អាយុ៥៩ឆ្នាំដោយមើលឃើញពីសកម្មភាពរបស់កូនប្រុសមិនគប្បីវាយធ្វើបាបប្រពន្ធខ្លាំងពេក ក៏បាននាំកូនប្រសារ ឈ្មោះ គឹម ស៊ីណេត ភេទស្រី អាយុ២៥ឆ្នាំទៅប្តឹងនៅនគរបាលប៉ុស្តិ៍រដ្ឋបាលឃុំគោករមៀត ។
ក្រោយពីនគរបាលទទួលបានបណ្តឹងហើយ កម្លាំងនគរបាលចុះទៅដល់លំនៅដ្ឋាន ជនសង្ស័យ និងធ្វើការឃាត់ខ្លួនជនសង្ស័យឆែកឆេរក្នុងខ្លួនឃើញថ្នាំញៀនម្សៅក្រាមពណ៌ស១ កូនថង់។បើតាមការឲ្យដឹងពីឪពុកបង្កើតក៏ដូចជាប្រពន្ធរបស់ជនសង្ស័យ បានប្រាប់សមត្ថកិច្ចថា ឈ្មោះអឿន ភារុណ ជាមនុស្សជក់ថ្នាំញៀនខ្លាំងនៅថ្ងៃកើតហេតុ ជននេះមិនដឹងមកពីណានោះទេ ពេលមកដល់ផ្ទះ បានខឹងនឹងឆ្កែព្រួស ហើយក៏រាល់ដាលដល់ប្រពន្ធ វាយតប់បណ្តាលឲ្យហើមជាំមុខមាត់ តែម្តង ។
បច្ចុប្បន្នជនសង្ស័យ ត្រូវបានកម្លាំងជំនាញរៀបចំសំណុំរឿង បញ្ជូនទៅតុលាការដើម្បីដាក់ទោសទៅតាមនិតិវិធីច្បាប់៕
.jpg)