លោក គឹម ស៊ុនថៃ មន្ត្រីប៉េអឹមខេត្តបន្ទាយមានជ័យ រំលោភយកដីផ្លូវរបស់រដ្ឋហើយ ហាមឃាត់គ្រឿងចក្រមិនឲ្យធ្វើផ្លូវដែលជាអំណោយរបស់ឯកឧត្ដមឧប កែ គឹមយ៉ាន
ខេត្តបន្ទាយមានជ័យ÷នៅព្រឹកថ្ងៃទី15 ខែឧសភា ឆ្នាំ 2021 នៅវេលាម៉ោង 9:15នាទីព្រឹកលោក គឹម ស៊ុនថៃ ដែលជាមន្ត្រីប៉េអឹមខេត្ត បន្ទាយមានជ័យដែលរងការចោទប្រកាន់ពីប្រជាពលរដ្ឋថា បានរំលោភយកដីផ្លូវរបស់រដ្ឋ ហើយបានមកហាមឃាត់គ្រឿងចក្រដែលឈូសឆាយធ្វើផ្លូវចាក់បេតុងទទឹង 12 ម៉ែត្របណ្ដោយ 500 ម៉ែត្រ ដែលជាអំណោយរបស់ឯកឧត្តមឧប កែ គឹមយ៉ាន បានឧបត្ថម្ភនិងធ្វើជូនដល់ប្រជាពលរដ្ឋដើម្បីធ្វើដំណើរងាយស្រួលក្នុងរដូវវស្សាផងដែរ។
សូមរំលឹកផងដែរថា៖ កាលថ្ងៃទី២១ ខែមេសា ឆ្នាំ២០២១កន្លងទៅនេះ ឯកឧត្តម ង៉ោ ម៉េងជ្រូន អភិបាលរងខេត្តបន្ទាយមានជ័យ ទទួលបន្ទុកដោះស្រាយវិវាទដីធ្លី បានដឹកនាំស្ថាប័នពាក់ព័ន្ធចុះវាស់វែង និងដោះស្រាយទំនាស់ដីធ្លីរវាងពលរដ្ឋ និងលោក ហង្ស ម៉ៅ ដោយពលរដ្ឋបានចោទប្រកាន់ថា លោក ហង្ស ម៉ៅ បានរំលោភយកដីរបស់ពួកគាត់ និង កាយផ្តាច់ផ្លូវសាធារណ:យកធ្វើជាកម្មសិទ្ធិរទាល់ខ្លួន។
ការចុះវាស់វែង និងដោះស្រាយបញ្ហានេះបានធ្វើឡើងបន្ទាប់ពី មានការស្នើសុំរបស់ពលរដ្ឋកាលពីថ្ងៃទី១៧ ខែមីនា ឆ្នាំ២០២១ ធ្វើលិខិតគោរពចូល ឯកឧត្តមអភិបាលនៃគណៈអភិបាលខេត្តបន្ទាយមានជ័យ សំណើស្នើសុំ ឯកឧត្តមអភិបាល បង្កើតគណៈកម្មការចុះពិនិត្យ និងវាស់វែងប័ណ្ណសំគាល់សិទ្ធិកាន់កាប់អចលនវត្ថុលេខ ចុះថ្ងៃទី២២ ខែកក្កដា ឆ្នាំ២០០៣ របស់មន្ទីររៀបចំដែនដីនគរូបនីយកម្ម សំណង់ និងសូរិយោដីខេត្តបន្ទាយមានជ័យ ដែលស្ថិតនៅភូមិសូរិយា សង្កាត់និមិត្ត និងភូមិអូរឬស្សី សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ដោយលោក ហង្ស ម៉ៅ បានកាយផ្តាច់ផ្លូវសាធារណៈ និងរំលោភបំពានមកលើដីកម្មសិទ្ធរបស់ពួកគាត់។
នៅក្នុងនោះដែររដ្ឋបាលខេត្តបន្ទាយមានជ័យក៏បានអញ្ជើញលោក គឹម ស៊ុនថៃ ដើម្បីចូលរួមពិនិត្យនិងដោះស្រាយបញ្ហាផ្លូវរបស់រដ្ឋដែលលោក គឹម ស៊ុនថៃ រំលោភយក ហើយផ្លូវនោះផងដែរបងប្អូនប្រជាពលរដ្ឋបានស្នើសុំឯកឧត្តមឧប កែ គឹមយ៉ាន ធ្វើផ្លូវឲ្យពួកគាត់ងាយស្រួលធ្វើដំណើរទៅធ្វើការហ្នឹងអាស្រ័យទៅវិញទៅមកងាយស្រួលផងដែរ តែដោយឡែកគេមិនឃើញលោក គឹម ស៊ុនថៃ មិនគោរពទៅតាមលិខិតរបស់រដ្ឋបាលខេត្តបន្ទាយមានជ័យនោះទេ រហូតដល់ព្រឹកថ្ងៃទី 15 ខែឧសភាឆ្នាំ 2021 នេះបើជាចេញមុខមកទប់ស្កាត់គ្រឿងចក្រដែលឈូសឆាយផ្លូវរបស់រដ្ឋដើម្បីបេតុងជូនដល់ប្រជាពលរដ្ឋធ្វើដំណើរ ដែលជាអំណោយរបស់ឯកឧត្តមឧប កែ គឹមយ៉ាន បង្កើនជាបញ្ហាទៅវិញ។
ប្រជាពលរដ្ឋសំណូមពរដល់ថ្នាក់លើជួយចាត់វិធានការចំពោះលោក គឹម ស៊ុនថៃ ដែលជាមន្ត្រីប៉េអឹមខេត្តបន្ទាយមានជ័យបានហាមឃាត់មិនឲ្យគ្រឿងចក្រឈូសឆាយផ្លូវរបស់រដ្ឋ ដើម្បីចាក់បេតុង ដែលជាអំណោយរបស់ឯកឧត្តមឧប កែ គឹមយ៉ាន ធ្វើជូនប្រជាពលរដ្ឋផងដែរ៕
