អ្នកស្លាប់ដោយសារជំងឺកូវីដ១៩ មានម្នាក់ទៀតហើយនៅថ្ងៃទី១២ ឧសភា សម្រាប់ក្រុងប៉ោយប៉ែត សរុបមកដល់ពេលនេះ មានចំនួន៣នាក់ហើយ
ខេត្តបន្ទាយមានជ័យ៖គិតត្រឹមថ្ងៃទី១២ ខែឧសភា ឆ្នាំ២០២១ មានអ្នកស្លាប់ដោយសារវីរុសកូវីដ-១៩មានចំនួន៣នាក់ហើយសម្រាប់ខេត្តបន្ទាយមានជ័យ។ដូច្នេះសូមឲ្យប្រជាពលរដ្ឋមានការប្រុងប្រយត្ន័ខ្ពស់ ត្រូវអនុវត្តតាមការណែនាំងរបស់ក្រសួងសុខាភិបាល និងប្រមុខរាជរដ្ឋាភិបាល គឺ៣កុំ និង៣ការពារ ឲ្យបានខ្ជាប់ខ្ជួនបំផុត ដើម្បីបញ្ជៀសការឆ្លងការរីករាលដាលទៅកាន់តំបន់ផ្សេងទៀត។
យោងតាមរដ្ឋបាលខេត្តបន្ទាយមានជ័យបានបញ្ចាក់ថា នៅថ្ងៃទី១២ ខែឧសភា ឆ្នាំ២០២១ វេលាម៉ោង០៥ និង៣០នាទី មានអ្នកជំងឺឈ្មោះ វៀត ឡា ភេទស្រី អាយុ៦១ឆ្នាំ មានទីលំនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានទទួលមរណៈភាព។
ពាក់ព័ន្ធករណ៌ស្ត្រីជនជាតិខ្មែរជាអ្នកជំងឺខាងលើ បានចូលមកពិនិត្យ និងព្យាបាលជំងឺ នៅមន្ទីរពេទ្យបង្អែកប៉ោយប៉ែត ដោយមានរោគសញ្ញា ក្អក ក្តៅខ្លួន ហត់ខ្លាំង មានប្រវត្តិជំងឺទឹកនោមផ្អែមរ៉ាំរ៉ៃ(កំពុងប្រើប្រាស់ថ្នាំជាប្រចាំ) ហើយគ្រូពេទ្យបានយកវត្ថុសំណាកពិនិត្យដោយ Rapid Test មានវិជ្ជមាន កូវីដ-១៩(+) រួមទាំងការថតកាំរស្មីអ៊ិច ពិនិត្យឈាមជាបន្តបន្ទាប់រោគវិនិច្ឆ័យអ្នកជំងឺចូលសម្រាកពេទ្យគឺ រលាកសួតធ្ងន់ធ្ងរ និងមានវិជ្ជមានកូវីដ-១៩ ហើយបានបញ្ជូនទៅកាន់កន្លែងព្យាបាលជំងឺកូវីដ-១៩ ព្រមទាំងធ្វើការជួយសង្គ្រោះព្យាបាល និងតាមដាន ការវិវត្តន៍របស់អ្នកជំងឺ ដោយយកចិត្តទុកដាក់ ទៅតាមលក្ខណៈបច្ចេកទេស ។
លុះដល់ថ្ងៃ ខែខាងលើនៅវេលាម៉ោង៤និង៣០នាទី ស្ថានភាពរបស់អ្នកជំងឺកាន់តែ ធ្ងន់ធ្ងរ ហត់ដង្ហក់កាន់តែខ្លាំង ស្លេកស្លាំង និងវង្វេងស្មារតី ហើយក្រុមគ្រូពេទ្យនៅតែបន្តការងារ ទាំងការជួយ សង្គ្រោះផ្លូវដង្ហើមយ៉ាងខ្លាំងក្លា តែដោយស្ថានភាពរបស់អ្នកជំងឺធ្ងន់ធ្ងរ មិនអាចជួយស្រោចស្រង់អាយុជីវិតអ្នកជំងឺបាន ហើយគាត់បានទទួលមរណៈភាព វេលាម៉ោង០៥និង៣០នាទីថ្ងៃ ខែដដែរ។
រដ្ឋបាលខេត្ត បញ្ជាក់បន្ថែមទៀតថា ករណីស្ត្រីជនជាតិខ្មែរ អាយុ ៦១ឆ្នាំខាងលើ ស្លាប់បាត់បង់ជីវិត ដោយវិបត្តិផ្លូវដង្ហើម ធ្ងន់ធ្ងរ និងការរលាកសួតសងខាងធ្ងន់ធ្ងរ ដោយសារវីរុសកូវីដ-១៩ លើអ្នកជំងឺ មានជំងឺទឹកនោមផ្អែមរ៉ាំរ៉ៃ ផងដែរ៕
