អតីតយុទ្ធជន ត្រូវបានយកទុកចិត្តដាក់ខ្ពស់ ពីសំណាក់សម្តេចតេជោ ដែលកំពុងទទួលការចាក់វ៉ាក់សាំងបង្ការជំងឺកូវីដ១៩
ខេត្តប៉ៃលិន៖នៅថ្ងៃទី០៩ ខែមេសា ឆ្នាំ២០២១ ឯកឧត្តមនាយឧត្តមសេនីយ៍ គន់ គីម ទេសរដ្ឋមន្រ្តី និងជាអនុប្រធានសមាគមអតីតយុទ្ធជនកម្ពុជា អមដំណើរដោយលោកជំទាវ បាន ស្រីមុំ អភិបាលខេត្តប៉ៃលិន បានដឹកនាំក្រុមការងារ អញ្ជើញចុះពិនិត្យមើលការទទួលនូវការចាក់វ៉ាក់សាំង បង្ការជំងឺកូវីដ-១៩ ដល់អតីតយុទ្ធជន ក្នុងខេត្តប៉ៃលិន។
ឯកឧត្តមនាយឧត្តមសេនីយ៍ គន់ គីម ទេសរដ្ឋមន្រ្តី និងជាអនុប្រធានសមាគមអតីតយុទ្ធជនកម្ពុជាបានមានប្រសាសន៍ លើកឡើងថា៖ដោយមានលោកជំទាវ បាន ស្រីមុំ អភិបាលខេត្តប៉ៃលិនជាអ្នកមើលការខុសត្រូវហើយ ពេលនេះឯកឧត្តមគ្រាន់តែមកលើកទឹកចិត្តបន្ថែម បន្ទាប់ពីទទួលបាននូវការចាត់តាំងពីសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលសម្តេចបានខិតខំប្រឹងប្រែងយ៉ាងខ្លាំង ក្នុងការជំរុញឱ្យប្រជាពលរដ្ឋ មន្រ្តីរាជការ និងកងកម្លាំងប្រដាប់អាវុធទាំងបីប្រភេទ ជាពិសេសអតីតយុទ្ធជនតែម្តង ដែលសម្តេចនិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តែងតែគិតគូរខ្វល់ខ្វាយចំពោះអតីយុទ្ធជនយើងគ្រប់គ្នា។លើសពីនេះ គ្រាន់តែឮដំណឹងថាមានបញ្ហាកូវីដ-១៩ ភ្លាមសម្តេចបានចាត់ឱ្យឯកឧត្តមផ្ទាល់ ធ្វើយ៉ាងណាត្រូវរកថ្នាំដោយទាក់ទងខាងសុខាភិបាល ដើម្បីដោះស្រាយបញ្ហានេះឱ្យទាន់ពេលវេលា ។
ឯកឧត្តមបានបន្តទៀតថា វាពិតជាមានសារៈសំខាន់ខ្លាំងណាស់ក្នុងការមកទទួលនូវវ៉ាក់សាំងបង្ការជំងឺកូវីដ ១៩ ដោយសារអតីតយុទ្ធជន ជាកងកម្លាំងប្រដាប់អាវុធដែលចូលនិវត្តន៍ ហើយអ្នកខ្លះបានបាត់បង់សមត្ថភាព ខ្លះពិការដៃ ជើង ភ្នែក និងរងរបួស ហើយខ្លះទៀតគ្រួសារពលី និងមរណៈ ដែលសុទ្ធតែជាការចាំបាច់ត្រូវដោះស្រាយអត្ថិភាពជូនទៅដល់អតីតយុវជន យើងតែម្តង ។ដូច្នេះនៅថ្ងៃនេះ ឯកឧត្តម ក៏បានដឹកនាំក្រុមការងារ ដើម្បីពាំនាំនូវការនឹករលឹកសាកសួរសុខទុក្ខពីសម្តេចទាំងទ្វេ ជូនដល់បងប្អូនទាំងអស់គ្នាដោយសម្តេចក៏បានជូនពរដល់អតីតយុទ្ធជនទាំងអស់ ឱ្យមានសុខភាពល្អ កម្លាំងមាំមួន និង អាយុវែងតរៀងទៅ ។
ឯកឧត្តមបានបញ្ជាក់ថា នៅក្នុងខេត្តប៉ៃលិន ក្រុមការងារក៏នឹងរៀបចំសាងសង់ ផ្ទះជូនអតីតយុទ្ធជន ដែលមានដីតែគ្មានផ្ទះជូននៅពេលក្រោយតាមរយៈលោកជំទាវ បាន ស្រីមុំអភិបាលខេត្តប៉ៃលិន និងជាប្រធានកិត្តិយសអតីតសមាគមយុទ្ធជនកម្ពុជា តែខណៈពេលនេះ កំពុងជួបបញ្ហាវិបត្តិកូវីដ១៩ ម្យ៉ាងវិញទៀត យើងទាំងអស់គ្នា ត្រូវតែជឿជាក់លើការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ទាំងអស់គ្នា ។
បងប្អូនអតីតយុទ្ធជន បានរៀបរាប់ឱ្យដឹងដូចៗគ្នាថា៖ពួកគាត់ សូមថ្លែងអំណរគុណយ៉ាងជ្រាលជ្រៅបំផុត ចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា ដែលសម្តេចជានិច្ចកាល តែងតែយកចិត្តទុកដាក់គ្រប់បែបយ៉ាង រួមទាំងជីវភាព ទាំងការរស់នៅ ជាពិសេសអំពីបញ្ហាសុខភាព របស់អតីតយុទ្ធជនក្នុងការ ការពារទប់ស្កាត់ការរីករាលដាលនៃជំងឺកូវីដ ១៩ ទូទាំងប្រទេសកម្ពុជា។ពួកគាត់ ក៏សូមជូនពរដល់សម្តេចទាំងទ្វេ ឱ្យមានសុខភាពល្អបរិបូរណ៍ កម្លាំងពលំ មាំមួន ប្រាជ្ញា ឈ្លាសវៃ និងជៀសផុតពីជំងឺទាំងឡាយទាំងពួង ដើម្បីដឹកនាំប្រទេសកម្ពុជាឱ្យមានការ រីកចម្រើនទៅមុខថែមទៀត ។
លើសពីនេះ ក៏សូមអំពាវនាវដល់បងប្អូនប្រជាពលរដ្ឋរស់នៅក្នុង ខេត្តប៉ៃលិនទាំងអស់ ក៏ដូចជាទូទាំងប្រទេសកម្ពុជា ចូលរួមចាក់វ៉ាក់សាំងបង្ការជំងឺកូវីដ១៩ ឱ្យបានគ្រប់ៗគ្នា សូមកុំជឿសម្តី ឬការឃោសនារបស់មនុស្សមួយចំនួន ដែលបានបំភ្លើស បំភ្លៃព័ត៌មានថា បន្ទាប់ពីចាក់វ៉ាក់សាំងរួចមានបញ្ហានេះ បញ្ហានោះ គឺកុំឱ្យជឿនោះឡើយ ដោយពួកគាត់ផ្ទាល់បានចាក់វ៉ាក់សាំងរួចរាល់អស់ហើយ គ្មានបញ្ហាអ្វីនោះទេ៕