ឯកឧត្តម ជាវ តាយ អភិបាលខេត្តកំពត ទទួលជំនួយឧបត្ថម្ភសប្បុរសធម៌ ក្រុមហ៊ុនហុងដាស្រីអូនខេត្តកំពត
ខេត្តកំពត៖ដើម្បីចូលរួមចំណែកក្នុងប្រយុទ្ធប្រឆាំងជំងឺកូវីដ១៩ នៅព្រឹកថ្ងៃទី០៩ ខែមេសា ឆ្នាំ២០២១ ក្រុមហ៊ុនហុងដាស្រីអូនខេត្តកំពត បាននាំយកថវិការ និងសម្ភារៈមួយចំនួនរួមមាន៖ម៉ាសចំនួន៥០០០ម៉ាស ទឹកអាកុល៦០លីត្រ និងថវិកាចំនួន១០០០ដុល្លា ផ្តល់ជូនឯកឧត្តម ជាវ តាយ អភិបាល នៃគណៈអភិបាលខេត្តកំពត និងជាប្រធានគណៈកម្មការប្រយុទ្ធប្រឆាំងនឹងជម្ងឺកូវីដ-១៩ខេត្ត ដើម្បីជួយក្នុងគោលដៅ រួមចំណែកប្រយុទ្ធប្រឆាំងជំងឺកូវីដ១៩។
ក្នុងឱកាសនោះឯកឧត្តម ជាវ តាយ អភិបាលខេត្ត បានចាត់ទុកអំណោយទាំងអស់នេះ ពិតជាមានសារៈសំខាន់ក្នុងការឆ្លើយតបទៅនឹងស្ថានភាពបច្ចុប្បន្ន ដែលរាជរដ្ឋាភិបាលក៏ដូចជារដ្ឋបាលខេត្ត បាននឹងកំពុងព្រួយបារម្ភ និងយកចិត្តទុកដាក់ ក្នុងការប្រយុទ្ធប្រឆាំងជំងឺកូវីដ១៩ ស្របពេលដែលជម្ងឺដ៏កាចសាហាវមួយនេះ កំពុងគម្រាមកំហែងដល់អាយុជីវិត ប្រជាពលរដ្ឋកម្ពុជា ក៏ដូចជាប្រជាពលរដ្ឋនៅក្នុងពិភពលោក។
ក្នុងនោះឯកឧត្តម អភិបាលខេត្តក៏បានថ្លែងអំណរគុណ ចំពោះលោក ហាន ម៉េងលី និងលោកស្រី ផូវ សោភ័ណ្ឌ ជាសប្បុរសជនម្ចាស់ហាងលក់ម៉ូតូហុងដា ស្រីអូនខេត្តកំពត ដែលតែងតែចូលរួមចំណែកឧបត្ថម្ភសម្ភារៈ និងថវិកា ដល់រដ្ឋបាលខេត្តកំពតនាពេលនេះ និងពេលកន្លងទៅ ដើម្បីរួមចំណែកជាមួយរាជរដ្ឋាភិបាល ក៏ដូចជារដ្ឋបាលខេត្តកំពត ដែលកំពុងតម្រូវការចាំបាច់ ជួយដល់ប្រជាពលរដ្ឋ ដែលកំពុងធ្វើចត្តាឡីស័កនៅមណ្ឌលចត្តាឡីស័ករបស់រដ្ឋបាលខេត្ត ក្នុងគោលដៅរួមចំណែកបង្ការទប់ស្កាត់ការឆ្លងរីករាលដាលនៃជំងឺកូវីដ-១៩ ក្នុងខេត្ត៕