អាជ្ញាធរក្រុងប៉ោយប៉ែត បន្តចុះពិនិត្យតាមទីតាំងKTV ក្លឹបកម្សាន្ត(ខារ៉ាអូខេ រង្គសាល ឌីស្កូតែក និងបៀរហ្កាឌិន) និងអប់រំផ្សព្វផ្សាយ ពីវិធានការរបស់ក្រសួងសុខាភិបាល និងប្រមុខរាជរដ្ឋាភិបាល
ខេត្តបន្ទាយមានជ័យ៖ដើម្បីជាការក្រើនរំលឹង និងដាសតឿនអារម្មប្រជាពលរដ្ឋកុំឲ្យមានការភ្លេចខ្លួនក្នុងការ ការពារតាមការណែនាំរបស់ក្រសួងសុខាភិបាល ក៏ដូចជាវិធានការ (៣កុំ, ៣ការពារ) របស់រាជរដ្ឋាភិបាលកម្ពុជានោះ គណៈបញ្ជាការឯកភាពក្រុងប៉ោយប៉ែត ដឹកនាំដោយលោក គាត ហ៊ុល ប្រធានគណៈបញ្ជាការឯកភាពក្រុង និងជាអភិបាល នៃគណៈអភិបាលក្រុង អមដំណើរដោយលោកវរសេនីយ៍ឯក ហាំ វណ្ណៈ មេបញ្ជាការវរការពារព្រំដែនគោក ៨៩១ ,លោកវរសេនីយ៍ត្រីនួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង ,លោកវរសេនីយ៍ទោ បោន សីហា អធិការ ស្តីទីក្រុង ,លោក ចូវ សុភឿត ប្រធានការិយាល័យ រៀបចំដែនដី នគរូមនីយកម្ម និងសំណង់ភូមិបាលក្រុង ,លោកវរសេនីយ៍ទោ បោន ភក្ត្រា អធិការរងក្រុង ទទួលបន្ទុកនាយផ្នែកចរាចរណ៍ ,លោក ម៉ក់ រតនា អនុប្រធានការិយាល័យសាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈក្រុង ,លោក ភោគ លន ចៅសង្កាត់ប៉ោយប៉ែត រួមនឹងអាជ្ញាធរមូលដ្ឋាន នៅយប់ថ្ងៃទី៨ ខែមេសា ឆ្នាំ២០២១ បានអញ្ជើញបន្តចុះពិនិត្យតាមទីតាំង KTV ក្លឹបកម្សាន្ត(ខារ៉ាអូខេ រង្គសាល ឌីស្កូតែក និងបៀរហ្កាឌិន) និងអប់រំ និងផ្សព្វផ្សាយសារាចរណែនាំរបស់ក្រសួងសុខាភិបាល និងប្រមុខរាជរដ្ឋាភិបាលកម្ពុជា ដើម្បីបង្ការ និងទប់ស្កាត់ការឆ្លងរាលដាល នៃជំងឺកូវីដ១៩ ទៅដល់សហគមន៍ទ្រង់ទ្រាយធំ។
ក្នុងដំណើអញ្ជើញចុះផ្សព្វផ្សាយអំពីវិធានការរបស់ក្រសួងសុខាភិបាល និងប្រមុខរាជរដ្ឋាភិបាលកម្ពុជា គឺ"៣ការពារ និង ៣កុំ " នៅតាមដងផ្លូវសាធារណៈ និងតំបន់ទីប្រជុំជននានា ក្នុងភូមិសាស្ត្រក្រុងប៉ោយប៉ែតនេះដែរ គណៈបញ្ជាការឯកភាពក្រុង បានប្រើឧបករណ៍បំពងសម្លេង(មេក្រូ) ដោយយកសារសម្លេងអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដែលបានណែនាំឲ្យប្រជាពលរដ្ឋ ត្រូវអនាម័យខ្លួនប្រាណឲ្យបានល្អ ពាក់ម៉ាស បាញ់អាលកុលឲ្យបានញឹកញាប់ ត្រូវរក្សារកំលាតសុវត្ថិភាព ពោលគឺកុំនៅផ្តុំគ្នា កុំប៉ះពាល់គ្នា កុំចាប់ដៃគ្នា កុំគៀកស្មាគ្នា ដើម្បីរួមគ្នាការពារ និងទប់ស្គាត់នូវជំងឺដ៏សាហាវនេះឲ្យបាន ដើម្បីឲ្យសេដ្ឋកិច្ចក្នុងគ្រួសារ ដ៏ដូចជាប្រទេសរបស់យើងល្អប្រសើរឡើងវិញ។
ជាមួយគ្នានោះដែរលោក គាត ហ៊ុល នៅតែបន្តស្នើឲ្យប្រជាពលរដ្ឋទាំងអស់ ត្រូវសហការជាមួយអាជ្ញាធរ នៅពេលមានអាការៈមិនសូវស្រួលខ្លួន ពោលគឺខុសប្រក្រតី និងមានការសង្ស័យណាមួយ ត្រូវរាយការជូនអាជ្ញាធរភ្លាម ដើម្បីងាយស្រួលក្នុងការគ្រប់គ្រងស្ថានការទាន់ពេល ដើម្បីបញ្ជៀការឆ្លងជំងឺកូវីដ១៩ ដ៏សាហាវនេះកាន់តែកើនឡើងៗ ខណៈជំងឺនេះនៅក្នុងប្រទេសមិនទាន់ធូស្បើយនៅឡើយនោះ៕