រដ្ឋបាលខេត្តបន្ទាយមានជ័យ បើកកិច្ចប្រជុំស្តីពីការហាមឃាត់ការធ្វើដំណើរឆ្លងកាត់ ចេញ ចូល ពីខេត្តមួយទៅខេត្តមួយ ជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ១៩
ខេត្តបន្ទាយមានជ័យ៖ក្រោយពីប្រមុខរាជរដ្ឋាភិបាលចេញសេចក្តីសម្រេចស្តីពីការហាមឃាត់ការធ្វើដំណើរឆ្លងកាត់ ចេញ ចូល ពីខេត្តមួយទៅខេត្តមួយ និងបិទរមណីដ្ឋានទេសចរណ៍នៅទូទាំងប្រទេស ជាបណ្តោះអាសន្ន គិតចាប់ពីពេលនេះរហូតដល់ថ្ងៃទី២០ ខែមេសា ឆ្នាំ២០២១ ដើម្បីទប់ស្កាត់ការឆ្លងរាលដាល នៃជំងឺកូវីដ១៩នោះ នៅព្រឹកថ្ងៃទី៧ ខែមេសា ឆ្នាំ២០២១ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានដឹកនាំកិច្ចប្រជុំផ្សព្វផ្សាយច្បាប់សារាចរណែនាំ របស់ប្រមុខរាជរដ្ឋាភិបាល ពាក់ព័ន្ធបញ្ហាកូវីដ-១៩ ដល់បណ្តាក្រុង ស្រុកទូទាំងខេត្ត ដើម្បីប្រយុទ្ធប្រឆាំង
ទប់ស្កាត់ការរីករាលដាល់វីរុស កូវីដ-១៩ ឆ្លងចូលសហគមន៍។
កិច្ចប្រជុំនេះបានប្រព្រឹត្តទៅនៅសាលប្រជុំធំសាលាខេត្ត ដោយមានការចូលរួមពី អភិបាលរងខេត្ត ស្នងការនគរបាលខេត្ត មេបញ្ជាការខេត្ត មន្ទីរពាក់ព័ន្ធ អភិបាលក្រុង ស្រុក មេឃុំ -ចៅសង្កាត់ ដោយអនុវត្តយ៉ាងខ្ជាប់ខ្ជួនតាមវិធានការសុខាភិបាល ដោយរក្សាគម្លាត១,៥ម៉ែត្រពីគ្នា ពាក់ម៉ាស និងបាញ់អាល់កុលផងដែរ។
ក្នុងឱកាសនោះឯកឧត្តមអភិបាលខេត្តបានដាក់ចេញនូវវិធានការមួយចំនួនឲ្យមន្ត្រីក្រោមឱវ៉ាតយកទៅអនុវត្ត ដោយសម្រេចផ្អាកទីតាំងរមណីយដ្ឋានទេសចរណ៍រួមមាន ភោជនីយដ្ឋាន អាហារដ្ឋាន តូបលក់ចល័ត ផ្សារទំនើប ទីសាធារណៈដែលមានសភាពអ៊ូរអរ និងមានមនុស្សជួបជុំក្នុងចំនួនច្រើនចាប់តាំងពីថ្ងៃទី៨ រហូតដល់ថ្ងៃទី២១ ខែមេសា នៅក្នុងភូមិសាស្ត្រខេត្តបន្ទាយមានជ័យ ដើម្បីចូលរួមទប់ស្កាត់ការឆ្លងរីករាលដាលជំងឺកូវីដ១៩ ចូលក្នុងសហគមន៍ជាទ្រង់ទ្រាយធំ។
ដោយឡែកនៅគ្រប់វត្តអារាម ត្រូវរៀបចំឲ្យមានការវាស់កំដៅ បាញ់អាកុល និងលាងដៃជាមួយជែលឬសាប៊ូ នៅមុខច្រកចេញចូលសាលាឆាន់ព្រះវិហារ និងកុដិជាដើម មិនអនុញ្ញាតឲ្យពុទ្ធបរិស័ទដែលមិនពាក់ម៉ាសយកចង្ហាន់ប្រគេនព្រះសង្ឃ ក្នុងបរិវេណវត្តអារាមព្រះវិហារសាលាឆាន់និងកុដិឡើយ។
ជាងនេះទៅទៀត ត្រូវរៀបចំទីតាំងទទួលពុទ្ធបរិស័ទ ដែលយកចង្ហាន់ទៅប្រគេនព្រះសង្ឃ ត្រូវរក្សាគម្លាតសុវត្ថិភាពជៀសវាងការប្រមូលផ្ដុំមនុស្សច្រើន។
សូមបញ្ជាក់ផងដែរថា ក្រោយពីមានសារាចរណែនាំ របស់ប្រមុខរាជរដ្ឋាភិបាលកម្ពុជា ស្តីពីការហាមឃាត់ការធ្វើដំណើរ និងបិទរមណីដ្ឋានទេសចរណ៍នៅទូទាំងប្រទេស ជាបណ្តោះអាសន្ន រួចមកនៅព្រឹកព្រលឹមថ្ងៃទី៧ ខែមេសា កម្លាំងសមត្ថកិច្ចបានចុះរឹតបន្តឹង ដោយធ្វើការបិទផ្លូវនៅចំណុចព្រំប្រទល់ ខេត្តបាត់ដំបង និងខេត្តបន្ទាយមានជ័យ មិនអនុញ្ញាតឱ្យអ្នកដំណើរឆ្លងកាត់ពីខេត្តមួយទៅខេត្តមួយនោះឡើយ៕
.jpg)
.jpg)
.jpg)