យុវជនស.ស.យ.ក ខេត្តប៉ៃលិន សហការជាមួយអាជ្ញាធរមូលដ្ឋាន ចុះអប់រំពលរដ្ឋ នៅតាមផ្សារនានា ឱ្យពាក់ម៉ាស រក្សាគម្លាត បើមិនស្តាប់មិនអនុញ្ញាតឲ្យចូលផ្សារជាដាច់ខាត
ខេត្តប៉ៃលិន៖ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ ចូលក្នុងសហគមន៍ខេត្តប៉ៃលិន លោកជំទាវ បាន ស្រីមុំ អភិបាលខេត្តប៉ៃលិន និងជាប្រធានសភាពសហព័ន្ធយុវជនកម្ពុជា ខេត្តប៉ៃលិន បានចាត់ឱ្យក្រុមការងារយុវជនស.ស.យ.កទូទាំងខេត្តប៉ៃលិន បើកយុទ្ធនាការចុះអប់រំផ្សព្វផ្សាយ នូវវិធានការ របស់ប្រមុខរាជរដ្ឋាភិបាល គឺ៣ការពារ និង៣កុំ និងធ្វើតាមការណែនាំរបស់ក្រសួងសុខាភិបាលផងដែរ ជារៀងរាល់ថ្ងៃពិសេសគឺនៅតាមទីប្រជុំជនតែម្តង។
ជាក់ស្តែងនៅថ្ងៃទី២៩ ខែមេសា ឆ្នាំ២០២១នេះ ក្រុមការងារយុវជនស.ស.យ.ក បានចុះគោលដៅទូទាំងខេត្តប៉ៃលិន ពិសេសគឺនៅតាមផ្សារនានាតែម្តង ហើយនៅចំណុចផ្លូវចូលផ្សារសាមគ្គីក្រុងប៉ៃលិនក្រុមការងារស.ស.យ.ក ដឹកនាំដោយលោក លី សុងហ៊ី អនុប្រធានស.ស.យ.កខេត្ត បានសហការជាមួយនគរបាលក្រុងប៉ៃលិន បានអប់រំណែនាំដល់អាជីវករ បើមិនពាក់ម៉ាស់.រក្សាគម្លាតទេ មិនអនុញាតឲ្យលក់ដូរនៅទីផ្សារឡើយចំណែកប្រជាពលរដ្ឋជិះម៉ូតូចូលផ្សារបើមិនពាក់ម៉ាស់ទេក៏មិនអនុញាតឲ្យចូលផ្សារដែរ ហើយនៅពេលខាងមុខសមត្ថកិច្ច និងធ្វើការផាកពិន័យតាមច្បាប់ជាកំណត់។
ចំណែកលោក លោក សាក់ សាវរិទ្ធ អនុប្រធាន ស.ស.យ.ក ខេត្តប៉ៃលិន បានឱ្យដឹងថា៖ ចាប់តាំងពីមានករណីផ្ទុះឡើង នៃជំងឺកូវីដ-១៩ ក្នុងប្រទេសកម្ពុជា ដោយបន្តរីករាលដាលចូលខេត្តនានាជាច្រើននៅឆ្នាំ២០២១នេះ ទើបខាងលោកបាន ដឹកនាំក្រុមការងារ ចុះណែធ្វើការនាំដល់ប្រជាពលរដ្ឋ ដែលរស់នៅក្បែរច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
កាចុះនេះអស់រយ:ពេលជិត១ខែមកហើយ ដើម្បីណែនាំអប់រំឱ្យពួកគាត់ពាក់ម៉ាស ទាំងក្មេងចាស់ ប្រុសស្រី ពេលធ្វើដំណើរនៅលើដងផ្លូវ ឬចូលក្នុងផ្សារ ដើម្បីទិញម្ហូបអាហារ និងណែនាំឱ្យរក្សាគម្លាតសុវត្ថិភាព គឺនៅឃ្លាតពីគ្នាយ៉ាងតិច១.៥ ទៅ២ម៉ែត្រ ត្រូវឧស្សាហ៍លាងដៃនឹងទឹកអាល់កុល ឬជែល ព្រមទាំងអនុវត្តតាមវិធានការ (៣ការពារ ៣កុំ) របស់ប្រមុខរាជរដ្ឋាភិបាល និងធ្វើតាមការណែនាំរបស់ក្រសួងសុខាភិបាលផងដែរ ។
លោកបញ្ជាក់ថា នៅពេលស្រ្តីមេផ្ទះណាម្នាក់ ធ្វើដំណើរទៅផ្សារ ដើម្បីទិញម្ហូបអាហារ បើមិនចាំបាច់ កុំយកកូនតូចៗ ទៅជាមួយឡើយ ព្រោះអាចងាយនឹងឆ្លងជំងឺផ្សេងៗជាពិសេសជំងឺកូវីដ១៩នេះជាដើម៕