ទីតាំងចំនួន៤ធំៗ នៅក្នុងក្រុងប៉ោយប៉ែត អាជ្ញាធរ និងក្រុមគ្រូពេទ្យជំនាញបានត្រៀម និងយកអ្នកធ្វើតេស្តបឋមទៅដាក់
ខេត្តបន្ទាយមានជ័យ៖អាជ្ញាធរខេត្ត ក្រុងប៉ោយប៉ែតបានរៀបចំត្រៀមទុករួចស្រាចនូវទីតាំងសម្រាប់អ្នកដែលធ្វើតេស្តបឋមរួចពីសំណាក់ក្រុមគ្រូពេទ្យជំនាញ។
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែតបានឲ្យដឹងថា អាជ្ញាធរបានរៀបចំរួចជាស្រាចនូវទីតាំងចំនួន៤ នៅក្រុងប៉ោយប៉ែតសម្រាប់ដាក់អ្នកដែលធ្វើតេស្តបឋមរួច។ទីតាំងដែលបានរៀបចំនោះរួមមាន៖មន្ទីរពេទ្យបង្អែកដីថ្មី , មណ្ឌលសុខភាពប៉ោយប៉ែត ១ , ភោជនីយ៍ដ្ឋាន គីម ប៊ុនអ៊ី (ហៅតាឡាក់) និងភោជនីយ៍ដ្ឋាន តាំង ប៊ុនហេង សរុបទាំង៤ទីតាំងខាងលើនេះ រៀបចំនិងអាចដាក់បានចំនួន ៤០០ក្រែ (បួនរយក្រែ)ឯណ្ណោះ។
បើតាមលោកស្រី ហេង សុខថារី មេភូមិបាលិលេយ្យ២ បានឲ្យដឹងដែរថា សម្រាប់នៅក្នុងភូមិរបស់លោកស្រី មាន២ទីតាំងសម្រាប់ត្រៀម និងដាក់អ្នកដែលធ្វើតេស្តបឋមរួចដែលក្រុមគ្រួពេទ្យជំនាញយកមកនោះ ដោយទីតាំទី១ នៅភោជនីយ៍ដ្ឋាន គីម ប៊ុនអ៊ី (ហៅតាឡាក់) បានដាក់អ្នកដែលធ្វើតេស្តបឋមរួចមានចំនួន៥៣នាក់ និងទីតាំងទី២ នៅភោជនីយ៍ដ្ឋាន តាំង ប៊ុនហេង ដាក់អ្នកដែលធ្វើតេស្តបឋមរួចមានចំនួន១៤៧នាក់ នេះគិតត្រឹមវេលាម៉ោង១២ថ្ងៃត្រង់ ថ្ងៃទី២៨ ខែមេសា ឆ្នាំ២០២១។
បើតាមសមត្ថកិច្ច និងប្រជាការពារដែលកំពុងឈើជើងនៅតាមគោលដៅទីតាំងខាងលើបានបញ្ជាក់ថា ក្រុមគ្រួសារសាច់ញាតិអ្នកដែលកំពុងសម្រាកនៅក្នុងទីតាំងខាងលើនេះ យកគ្រឿងឧបភោគបរិភោគមកឲ្យ គឺមិនអនុញ្ញាតឲ្យយកចូលមានដូចជា៖ផ្លែស្វាយ ទាំងខ្ចី និងទុំ ,បារី ,ថ្នាំពេទ្យដែលគ្មានវេជ្ជបញ្ជាពីក្រុមគ្រូពេទ្យនាំឲ្យពាល់ដល់សុខភាព។រាល់អ្នកដែលយកមកឲ្យនោះទៀតសោធ ត្រូវបំពេញបែបបទដូចជា៖ឈ្មោះ អាយុ ទីលំនៅ លេខទូរសព្ទ័ របស់ដែលត្រូវផ្ញើ និងអត្តសញ្ញាណអ្នកដែលទទួល។ក្រោយពីបំពេញបែបបទ និងត្រួតពិនិត្យយ៉ាងយកចិត្តទុកដាក់ពីកម្លាំងសមត្ថកិច្ចរួច បានអនុញ្ញាតឲ្យយកទៅដាក់នៅខាងក្រៅរបងហាមឃាត់ រួចបាញ់អាកុលជុំវិញខ្លួន បន្ទាប់មកដើរចេញ ទើបខលឲ្យអ្នកនៅខាងក្នុងដែលកំពុងសម្រាកនៅទីតាំងខាងលើមកទទួលយកតែម្តង។
ក្រោយពីមានវិជ្ជមានជំងឺកូវីដ១៩ នៅក្នុងភូមិសាស្ត្រសង្កាត់ប៉ោយប៉ែត រហូតឈានដល់ការបិតខ្ទប់នេះដែរ អ្នកសារព័ត៌មានយើងមិនអាចសុំការពន្យល់ និងរបាយការណ៍ជាក់លក្ខអំពីចំនួនអ្នកវិជ្ជមានជំងឺកូវីដ១៩ និងអ្នកយកសំណាកទៅពិនិត្យ ព្រមទាំងអ្នកកំពុងធ្វើចត្តាឡីស័កពីសំណាក់ប្រធានមន្ទីរសុខាភិបាលខេត្តបាននៅឡើយទេរហូតមកដល់ពេលនេះ ដោយលោកបញ្ជាក់តាមទូរសព្ទ័ថា លោកកំពុងតែជាប់រវល់មមាញឹកក្នុងការពិនិត្យអ្នកជំងឺ។ដូច្នេះបើចង់ដឹងច្បាស់យ៉ាងណានោះសូមអញ្ជើញតាមដាននូវការចុះផ្សាយរបស់ក្រសួងសុខាភិបាល៕
