ថ្នាក់ដឹកនាំខេត្ត បន្ទាយមានជ័យ អញ្ចើញចុះត្រួតពិនិត្យតាមបន្ទាត់ព្រំដែន.កម្ពុជា.ថៃ.
ខេត្តបន្ទាយមានជ័យ÷ នាព្រឹកថ្ងៃទី២០ ខែមេសា ឆ្នាំ២០២១នេះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ អមដំណើរដោយឯកឧត្តម ង៉ោ ម៉េងជ្រូន អភិបាលរងខេត្ត ទទួលបន្ទុកការងារព្រំដែន និង គាត ហ៊ុល អភិបាលក្រុងប៉ោយប៉ែត អញ្ចើញត្រួតពិនិត្យតាមព្រំដែនក្នុងភូមិសាស្ត្រខេត្តបន្ទាយមានជ័យ ដើម្បីណែនាំដល់កងកម្លាំងដែលឈរជើងតាមបន្ទាត់ព្រំដែនទាំងអស់ត្រូវពង្រឹងនិងជួយធ្វើការទប់ស្កាត់ ចំពោះការលួចឆ្លងដែនខុសច្បាប់ របស់ពលករ ឲ្យបានដាច់ខាត ជាពិសេសដើម្បីចូលរួមទប់ស្កាត់ការឆ្លងរីករាលដាលនៃជម្ងឺកូវិដ-19 ។
ក្នុងនោះទៀតសោត ឯកឧត្តម អ៊ុំ រាត្រី បានបញ្ជារឲ្យកងកម្លាំងទាំងអស់តាមគោលដៅត្រូវយកចិត្តទុកដាក់ឆែកឆេរចំពោះបញ្ហារថយន្តសង្គ្រោះ ឬរថយន្តពេទ្យ ព្រោះឥលូវមានអ្នកបន្លំដឹកជញ្ជួនមនុស្សឆ្លងខេត្ត និង បង្រ្កាបបានមួយចំនួនផងដែរក្នុងមួយរយ:នេះ។
ដោយក្នុងនោះគេសង្កេតឃើញថា មានការចូលរួមពី លោកឧត្តមសេនីយ៍ទោ ឈុន ម៉ៅ មេបញ្ជាររងយោធភូមិទី៥ មេបញ្ជារទិសទី១ខេត្តបន្ទាយមានជ័យ លោកឧត្តមសេនីយ៍ត្រី សុឹង ទុំ មេបញ្ជារការកងពលតូចលេខ៥១ លោកឧត្តមសេនីយ៍ត្រី អេង លីហូរ ស្នងការរងខេត្តបន្ទាយមានជ័យ លោកវរសេនីយ៍ឯក ហាំ វណ្ណ: មេបញ្ជារការនគរបាលវរការពារព្រំដែនគោក ៨៩១ លោកវរសេនីយ៍ឯក សូរ ចាន់ណារី មេបញ្ជារការនគរបាលវរការពារព្រំដែនគោក៩១១ លោកវរសេនីយ៍ទោ ឡេង ហុងលាង មេបញ្ជាការតំបន់ប្រតិបត្តិការសឹករងក្រុងប៉ោយប៉ែត និងកម្លាំងនគរបាល អធិការក្រុង ប៉ោយប៉ែតផងដែរ។
ក្នុងពេលចុះសួរសុខទុកកងកម្លាំង តាមបន្ទាត់ព្រំដែនក្នុងភូមិសាស្ត្រក្រុង ប៉ោយប៉ែត គេសង្កេតឃើញថា នគរបាលការពារព្រំដែនគោក៩១១ ប៉ុស្តិ៍បឹងសាគូ ដឹកនាំដោយលោក រស់ ពិសិដ្ឋ នាយប៉ុស្តិ៍ សហការជាមួយយោធាកងពលលេខ៥១ ធ្វើការឃាត់បានមនុស្សប្រុស-ស្រី ពីរនាក់ប្តីប្រពន្ធ ជាអាជីវករនៅផ្សារឡុងគ្លឿ ដែលលួចឆ្លងដែនខុសច្បាប់ពីប្រទេសថៃ ចូលកម្ពុជា ដោយមានឈ្មោះ ឆេង ឈុនឡេង ភេទប្រុស អាយុ ៣២ ឆ្នាំ(ជាប្តី) និងឈ្មោះ ចាយ បញ្ចរ៉ា ភេទស្រី អាយុ៣២ ឆ្នាំ ជាប្រពន្ធ ហើយអ្នកទាំងពីររស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ។
ក្នុងនោះឯកឧត្តម អ៊ុំ រាត្រី អភិបាលខេត្ត និងឯកឧត្តម ង៉ោ ម៉េងជ្រូន អភិបាលរងខេត្តបន្ទាយមានជ័យ បានសួរនាំ និង ណែនាំឲ្យពួកគាត់បញ្ឈប់ធ្វើសកម្មភាពឆ្លងដែនខុសច្បាប់បន្តទៀត ដោយត្រូវឆ្លងដែនឲ្យស្របតាមច្បាប់ដែលបានកំណត់ ដើម្បីជៀសវាងគ្រោះថ្នាក់ណាមួយជាយថាហេតុ។ ក្រោយសួរនាំរួច អាជីវករផ្សារឡុងគ្លឿ ដែលកម្លាំងប្រចាំការនៅចំណុចខាងក្រោយប៉ារ៉ាមិច ត្រូវបានបញ្ជូនទៅធ្វើចត្តាឡីស័កវិទ្យាល័យនិមិត្ត។
ជាចុងក្រោយឯកឧត្តម អ៊ុំ រាត្រី អភិបាលខេត្តបន្ទាយមានជ័យ និង ឯកឧត្តម ង៉ោ ម៉េងជ្រូន បានឧបត្ថម្ភ មី ទឹកសុទ្ធ និង ទឹកក្រូច មួយចំនួនផងដែរ ដល់នគរបាលវរការពារ ព្រំដែនគោក៨៩១ នគរបាលវរការពារ ព្រំដែនគោក៩១១ និង យោធាកងពលលេខ៥១ ដែលប្រចាំការតាមបន្ទាត់ព្រំដែន៕
