សាខាកាកបាទក្រហមកម្ពុជាខេត្តកែប នាំយកសំភារៈ គ្រឿងឧបភោគបរិភោគឧបត្ថម្ភ ផ្តល់ជូនកំលាំងប៉ុស្តិ៍ប្រចាំការ ត្រួតពិនិត្យការធ្វើដំណើរបស់ប្រជាពលរដ្ឋ
ខេត្តកែប៖ឯកឧត្តម សោម ពិសិដ្ឋ អភិបាលនៃគណៈអភិបាលខេត្ត និងជាប្រធានសាខាកាកបាទក្រហមកម្ពុជាខេត្តកែប កាលពីព្រឹកថ្ងៃទី១២ ខែមេសា ឆ្នាំ២០២១ បានដឹកនាំ លោក លោកស្រី អនុប្រធានកិត្តិយស អនុប្រធានអចិន្ទ្រៃយ៍ សមាជិក សមាជិកា នៃគណៈ កម្មាធិការសាខា លោកស្រីប្រធានអនុសាខាក្រុង ស្រុក មន្ត្រី ប្រតិបត្តិ និងអ្នកស្ម័គ្រចិត្ត ដើម្បីចូលរួមអប់រំផ្សព្វផ្សាយស្តីពីកូវីដ-១៩ និងចែកសម្ភារៈ គ្រឿងឧបភោគ បរិភោគ នៅប៉ុស្តិ៍ត្រួតពិនិត្យទាំងបីក្នុងខេត្តកែបគឺៈ
១-នៅប៉ុស្តិ៍ព្រំប្រទល់ក្រុង និងស្រុកទឹកឈូរ ខេត្តកំពត កែបជិតក្លោងទ្វារវត្តកំពង់នង់ ផ្លូវជាតិលេខ៣៣
២-នៅប៉ុស្តិ៍ព្រំប្រទល់ស្រុកដំណាក់ចង្អើរខេត្តកែប និងស្រុកកំពង់ត្រាច ខេត្តកំពត ជិតរោងចក្រពូចិន ផ្លូវជាតិលេខ៣៣ និងទី៣-នៅប៉ុស្តិ៍ស្ពានដែកឃុំអង្កោលព្រំប្រទល់ឆ្ពោះទៅច្រកទ្វារអន្តជាតិព្រែកចាក ខេត្តកំពត។
ក្នុងឱកាសនោះដែរ ឯកឧត្តមអភិបាលខេត្ត ក៏បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងទ្វេ តែងតែគិតគូរខ្ពស់ពីសុខទុក្ខរបស់បងប្អូនមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទៅ។
ជាមួយគ្នានេះ ឯកឧត្តម អភិបាលខេត្ត បានណែនាំដល់កំលាំងប្រចាំការគ្រប់ប៉ុស្តិ៍ ត្រូវត្រួតពិនិត្យអោយបានដិតដល់ រាល់ការធ្វើដំណើរបស់បងប្អូនប្រជាពលរដ្ឋ ពិសេលក្នុងថ្ងៃចូលឆ្នាំខ្មែរខាងមុខនេះ ដាក់ឧបករណ៍វាស់ស្ទង់កំដៅ បាញ់អាលកុលលាងសំអាតដៃ និងរាយការណ៍ជាប្រចាំមករដ្ឋបាលខេត្ត ក្នុងករណីមានភាពពុំប្រក្រតី តាមគោលការដែលបានណែនាំ ។
ឯកឧត្តមបញ្ជាក់ថា កិច្ចខិតខំរបស់ យើងគឺដើម្បីបង្ការទប់ស្តាត់អោយខាងតែបាននូវការឆ្លងរាលដាល់ជំងឺកូវីដ-១៩ ចូលមកសហគមន៍ខេត្តកែប និងរួមគ្នាបញ្ចប់ព្រឹត្តិការណ៍សហគមន៍២០កុម្ភៈ តាមរយៈការអប់រំប្រជាពលរដ្ឋ អោយរស់នៅ តាមបែបគន្លងថ្មី តាមការណែនាំរបស់រាជរដ្ឋាភិបាល និងវិធានការសុខាភិបាលផង។
អំណោយដែលសាខាកាកបាទក្រហមកម្ពុជាខេត្តកែប នាំយកទៅផ្តល់ជូននាពេលនោះរួមមាន ក្នុងមួយប៉ុស្តិ៍ៗ អង្ក៤បាវ ស្មើនឹង ១០០គីឡូក្រាម ,ត្រីខ៣ ឡូ , ភេសជ្ជៈ៤កេះ , ទឹកបរិសុទ្ធ ១០កេះ, ចែល៤ដប, ម៉ាស់៥០០ម៉ាស់ ,ស្តង់ ១ , ស្រោមដៃ១០០, ខិតបណ្ណអប់រំជំងឺកូវិត១៩ ៣កុំ ៣ការពារ ១០០សន្លឹក ,ខិតបណ្ណអប់រំវិធីរស់នៅតាមបែបគន្លងថ្មីចំនួន១០០សន្លឹក និងថវិការ ១លានរៀល៕