មនុស្សប្រុសស្រី៤នាក់ រងរបួសធ្ងន់ស្រាល ដោយសារជួបគ្រោះថ្នាក់ក្រឡាប់រថយន្តចូលក្នុងទឹកប្រឡាយ បង្កការភ្ញាក់ផ្អើល នៅស្វាយរៀង
ខេត្តស្វាយរៀង៖ដោយសារការបើកបរធ្វេសប្រហែសបង្កឲ្យមានគ្រោះថ្នាក់ចរាចរណ៍ ដោយរថយន្តបើកបរមិនប្រកាន់ស្ដាំរ៉េចង្កូតបុកតូបលក់ដូរ និងមនុស្សមិនទាន់អស់ល្បឿន បន្តទៅមុខក្រឡាប់ចូលក្នុងទឹកប្រឡាយ បណ្តាលឲ្យមនុស្សប្រុសស្រីចំនួន៤នាក់ រងរបួសធ្ងន់ស្រាល បញ្ជូនទៅសង្គ្រោះនៅឯមន្ទីរពេទ្យកាលពីថ្ងៃទី២៦ ខែមីនា ឆ្នាំ២០២១ លើផ្លូវជាតិលេខ១ ចន្លោះគីឡូម៉ែត្រ ១១១និង១១២ ស្ថិតនៅក្នុងភូមិត្របែកប្រហោង ឃុំតាសួស ស្រុកស្វាយជ្រំ ខេត្តស្វាយរៀង។
ក្មេងប្រុសដែលរងគ្រោះ ខណៈអង្គុយលេខក្នុងតូបលក់ដូរមានឈ្មោះអូន សំណាង អាយុ៤ឆ្នាំរស់នៅភូមិត្របែកប្រហោង ឃុំតាសួស ស្រុកស្វាយជ្រុំ ខេត្តស្វាយរៀង។ចំណែកអ្នកបើករថយន្តបង្កហេតុត្រូវបានស្គាល់ឈ្មោះក្រេត ចិត្ត អាយុ៣៩ឆ្នាំ រស់នៅភូមិទូលរកា ឃុំកំពង់សឹង ស្រុកព្រះស្តេច ខេត្តព្រៃវែង និងអ្នករួមដំណើរមានឈ្មោះងូ វេ ភេទស្រី អាយុ៤៩ ឆ្នាំរស់នៅភូមិប្រសូតទី១ ឃុំកណ្កៀងរាយ ស្រុកស្វាយទាប ខេត្តស្វាយរៀង និងឈ្មោះ នាង សុផាត ភេទប្រុស អាយុ៤៩ឆ្នាំ រស់នៅភូមិឃុំកំពោតម្រះ ឃុំពពេទ្យ ស្រុកស្វាយទាប ខេត្តស្វាយរៀង។
បើតាមប្រភពព័ត៌មានបានឲ្យដឹងថា មុនពេលកើតហេតុមានរថយន្តមួយគ្រឿងម៉ាកតាកូម៉ា ពណ៌សមិនចាំស្លាកលេខ បើកលើផ្លូវជាតិលេខ១ក្នុងទិសដៅពីកើតទៅលិច មិនប្រកាន់ស្ដាំលុះមកដល់ចំណុចកើតហេតុខាងលើក៏ស្រាប់តែរ៉េចង្កូតទៅបុកតូបលក់ដូរ និង មនុស្សហើយមិនទាន់អស់ល្បឿនបន្តទៅមុខក្រឡាប់ចូលក្នុងទឹកប្រឡាយបង្កការភ្ញាក់ផ្អើលតែម្ដង៕
