បើកបរក្នុងស្ថានភាពស្រវឹង បុកម៉ូតូសណ្តោងរ៉ឺម៉ក ដឹកអេតចាយពីក្រោយពេញទំហឹង បណ្តាលឲ្យរងការខូចខាត ម៉ូតូសណ្តោងរ៉ឺម៉ក និងផ្ទះលក់ចាប់ហួយ នៅខណ្ឌសែនសុខ
រាជធានីភ្នំពេញ៖ម៉ូតូសណ្តោងរ៉ឺម៉ក ទូកញ្ចក់លក់ម្ជូររាយប៉ាយ រងការខូចខាតយ៉ាងដំណំ ដោយសារបុរសវ័យចំណាស់ម្នាក់ទំនងជាស្រវឹងស្រា បើករថយន្តទៅបុកម៉ូតូសណ្តោងរ៉ឺម៉ក ដឹកអេតចាយពីក្រោយពេញទំហឹង បណ្តាលឲ្យរុញច្រាញចូលផ្ទះលក់ចាប់ហួយ កាលពីម៉ោង១២និង១៥នាទីរំលងអធ្រាត្រ ឈានចូលថ្ងៃទី១៩ ខែមីនា ឆ្នាំ២០២១ នៅតាមបណ្តោយផ្លូវហាណូយ ត្រង់ចំណុចផ្លូវរទេះភ្លើង ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
ប្រភពព័ត៌មានពីអ្នកបើកបរម៉ូតូសណ្តោងរ៉ឺម៉កដឹកអេតចាយ បានឲ្យដឹងថា មុនពេលកើតហេតុ គាត់បើករ៉ឺម៉កដឹកអេតចាយតែម្នាក់ឯង ធ្វើដំណើរតាមបណ្ដោយផ្លូវហាណូយ ទិសដៅពីជើងទៅត្បូង មកដល់ចំណុចកើតហេតុ ក៏មានរថយន្តមានរថយន្តមួយគ្រឿងម៉ាក landcruiser ពណ៌ត្រីអ៊ី ពាក់ស្លាកលេខព្រះសីហនុ 3A-3099 បើកបរដោយបុរសចំណាស់ម្នាក់ ទំនងជាស្រវឹងរួមដំណើរដោយនារីម្នាក់ទៀត ធ្វើដំណើរស្របទិសគ្នា ពីក្រោយយ៉ាងលឿន បុករទេះអេតចាយពីក្រោយពេញទំហឹង បណ្តាលឲ្យគាត់ភ័យលោតចុះពីរ៉ឺម៉ករងរបួសស្រាល ចំណែកម៉ូតូរ៉ឺម៉ក់បន្តទៅបុកចូលផ្ទះលក់ចាប់ហួយ នៅជិតកន្លែងកើតទៅបុកទូកញ្ចក់លក់ម្ជូរ បណ្តាលឲ្យបែកអស់មួយ និងបែកកញ្ចក់រាយប៉ាយពេញផ្លូវ ។
បន្ទាប់ពីកើតហេតុអ្នកបើករថយន្តបង្ក បានសងសំណងទៅកាន់រ៉ឺម៉កអេតចាយចំនួន៨ម៉ឺនរៀល ចំណែកភាគីខាងម្ចាស់ផ្ទះរងគ្រោះ បានទាមទារសំណងការខូចខាត ពីអ្នកបើករថយន្តបង្កជាទឹកប្រាក់ចំនួន៦០០ដុល្លារ តែខាងម្ចាស់រថយន្តព្រមសងតែ១០០ដុល្លារ ទើបការចចារគ្នា មិនត្រូវគ្នាក៏ប្រគល់ឲ្យសមត្ថកិច្ចជំនាញខណ្ឌសែនសុខយកទៅរក្សាទុកនៅអធិការដ្ឋានខណ្ឌ រង់ចាំដោះស្រាយគ្នាបន្តនៅពេលក្រោយ ៕
