សំរាមស្អុយរលួយ នៅតាមដងផ្លូវសាធារណៈ និងទីប្រជុំជនមួយចំនួននៅក្រុងប៉ោយប៉ែត ប្រជាពលរដ្ឋស្នើឲ្យលោកអភិបាលក្រុង មានចាត់វិធានការ និងផាកពិន័យ ទៅលើអ្នកដែលយកមកបោះចោល
ខេត្តបន្ទាយមានជ័យ៖ប្រជាពលរដ្ឋរស់នៅក្នុងក្រុងប៉ោយប៉ែតមួយចំនួន បានសម្តែងការព្រួយបារម្ភជាខ្លាំងអំពីសុវត្ថិភាពសុខភាព ពិសេសកូនតូចៗរបស់ពួកគាត់ដែលមិនដឹងអីនោះ ដោយសារនៅជុំវិញតំបន់ដែលពួកគាត់រស់នៅ និងនៅតាមដងផ្លូវសាធារណៈ ព្រមទាំងនៅក្បែសាលារៀន មន្ទីរពេទ្យមួយចំនួន មានសុទ្ធតែសំរាម ជះក្លិនស្អុយអាស្រោច បានធ្វើឲ្យពួកគាត់ពិបាកក្នុងការរស់នៅ។
ប្រជាពលរដ្ឋរស់នៅតាមដងផ្លូវបេតុង ហៅថាផ្លូវចូលស្ទង់តា ងួន ម្តុំមណ្ឌល២-៣ ក៏ដូចជានៅភូមិប្រជាធម្ម សង្កាត់ផ្សារកណ្តាល ក្រុងប៉ោយប៉ែត បានឲ្យដឹងថា សំរាមដែលកំពុងគរ និងរាយប៉ាយនៅតាមអមសងខាងផ្លូវ និងផ្លូវចូលផ្ទះ តាមដងផ្លូវសាធារណៈខាងមុខ ខាងក្រោយមណ្ឌលសំចតក្រុងប៉ោយប៉ែត ខាងមុខសាលារៀន និងនៅក្បែមន្ទីរពេទ្យបង្អែកដីថ្មី ផងនោះ បានជះក្លិនស្អុយអាស្រោច ចំណែកកូនៗធ្វើដំណើរទៅរៀនក៏ពិបាកដកដង្ហើមសឹងអត់ទ្រាំពុំបាន តែបើនៅរដូវវស្សាវិញមានដង្កូវធំៗ រ៉ុយរោមពិបាកក្នុងការហូបបាយទៀតផង។
ពួកគាត់បញ្ជាក់ថា សំរាមទាំងនេះសុទ្ធសឹងតែអ្នកមកពីចំងាយពោលគឺក្បែភូមិ និងអ្នកមួយចំនួននៅក្បែៗហ្នឹងតែម្តង បានយកមកបោះចោលនៅពេលយប់មានឱកាស ចំណែកសំរាមរបស់ពួកខ្លួនគរទុកមិនបានយូនោះទេធ្វើការដុតកំទិចចោលតែម្តង។ដូច្នេះពួកគាត់ស្នើឲ្យលោក គាត ហ៊ុល អភិបាលនៃគណៈអភិបាលក្រុង ជួយសំរួលយកសំរាមទាំងនេះចេញ និងចាត់កម្លាំងតាមដាន ព្រមទាំងធ្វើការផាកពិន័យឲ្យបានធ្ងន់ធ្ងរ ទៅលើអ្នកដែលយកសំរាមមកចាក់ចោលបែបនេះ ដើម្បីជាការព្រមាន ដល់អ្នកផ្សេងផងដែរ។
ពាក់ពន្ធ័បញ្ហានេះ លោកអភិបាលក្រុង បានបញ្ជាក់ថា សាលាក្រុងធ្លាប់បានជូនដំណឹងជាលាយលក្ខអក្សរួចមកហើយអំពីការចាប់ផាកពិន័យ ហើយរយះកាលកន្លងមកនេះនៅខាងសង្កាត់ប៉ោយប៉ែតក៏ធ្លាប់បានចាប់ផាកពិន័យទៅលើពលរដ្ឋមួយចំនួន ដែលអូររទេះស៊ីឈ្នួលដឹកសំរាមតាមផ្ទះយកមកចោលហើយដែរ។
លោកបញ្ជាក់ទៀតថា រយះកាលកន្លងមកនេះលោកបានយកគ្រឿងចក្រផ្ទាល់ខ្លួន ដឹកនាំកម្លាំងចម្រុះចុះកាយ ប្រមូលសំរាមបានរាប់តោនទៅចោលហើយដែរ ក្នុងនោះលោកក៏បានដាក់ផែនការទៅសង្កាត់ ដើម្បីឲ្យប្រជាការពារតាមប្រមាញ់មើល បើសិនជាតាមទាន់ការយកសំរាមមកបោះចោលពាសវាលពាសកាលទៀតនោះ នឹងនាំពួកគាត់មកណែនាំអប់រំ ២ ទៅ៣ ដងបើមិនស្តាប់នឹងធ្វើការផាកពិន័យតែម្តង៕
