លោកឧត្តមសេនីយ៍ទោ សិទ្ធិ ឡោះ ស្នងការខេត្តបន្ទាយមានជ័យ ដឹកនាំកិច្ចប្រជុំ ត្រៀមបង្ការ ទប់ស្កាត់ការឆ្លងរាលដាលជម្ងឺកូវីដ-១៩
ខេត្តបន្ទាយមានជ័យ៖ក្នុងកិច្ចប្រជុំនៅក្នុងសាលប្រជុំស្នងការដ្ឋាននគរបាលខេត្តបន្ទាយមានជ័យ នៅព្រឹកថ្ងៃទី១៦ ខែមីនា ឆ្នាំ២០២១ លោកឧត្តមសេនីយ៍ទោ សិទ្ធិ ឡោះ ស្នងការនរបាល ខេត្តបន្ទាយមានជ័យ បានដាក់ផែនការដល់កម្លាំងនគរបាលខេត្តចំនួន៦៩៤នាក់ ដើម្បីត្រៀមបង្ការ ទប់ស្កាត់ ការឆ្លងរាលដាល នៃជម្ងឺកូវីដ-១៩ ក្នុងខេត្តបន្ទាយមានជ័យ។
លោកឧត្តមសេនីយ៍ទោ ស្នងការបានមានប្រសាសន៍ថា ផែនការប្រជុំនេះចំពោះនគរបាលចំនួន ៦៩៤នាក់នេះត្រូវត្រៀមបង្ការទប់ស្កាត់ ការឆ្លងរាលដាល នៃជម្ងឺកូវីដ-១៩ ក្នុងខេត្តបន្ទាយមានជ័យ។ហើយកិច្ចប្រជុំនេះដែរគឺសំដៅធានាបានទាំងស្រុង នូវសុខមាលភាពនិងអាយុជីវិតជូនប្រជាពលរដ្ឋនៅក្នុងមូលដ្ឋាន និងក្នុងសហគមន៍ ដែលបង្កដោយជម្ងឺកូវីដ១៩កំពុងរាតត្បាតពេញទំហឹង។នគរបាលទាំងអស់ ដែលមានភារកិច្ចការពារ ត្រូវបង្កើនស្មារតី ម្ចាស់ការដោយសហការជាមួយសមត្ថកិច្ចចម្រុះ អង្គភាពពាក់ព័ន្ធត្រូវទទួលខុសត្រូវគ្រប់ភារកិច្ចតាមគោលដៅរៀងៗខ្លួនឲ្យមានប្រសិទ្ធភាពខ្ពស់។
លោកបានបញ្ជាក់ថា គ្រប់អង្គភាពត្រូវត្រៀមសម្រាប់អន្តរាគមន៍ ដោះស្រាយទប់ស្កាត់ នូវការចម្លងមេរោគកូវីដ ១៩ ពីបុគ្គលម្នាក់ទៅបុគ្គលម្នាក់ ដែលអាចនឹងមានការឆ្លងជាទ្រង់ទ្រាយធំនៅក្នុងសហគមន៍ នៅតាមមូលដ្ឋាន ស្រុក ក្រុងជាដើម។នគរបាលទាំងអស់ត្រូវ ត្រៀមទប់ស្កាត់ការធ្វើដំណើររបស់ប្រជាពលរដ្ឋ ក្នុងករណីផ្ទុះជំងឺកូវីដ-១៩ ត្រូវត្រួតពិនិត្យស្រាវជ្រាវរកឲ្យឃើញ ពលរដ្ឋដែលសង្ស័យថា មានផ្ទុកជម្ងឺកូវីដ-១៩ និងអ្នកប៉ះពាល់ដោយផ្ទាល់ ដោយប្រយោល ដើម្បីប្រគល់ជូនក្រុមការងារសុខាភិបាល។ត្រូវពង្រឹងកម្លាំងទប់ស្កាត់បទល្មើស គ្រប់ប្រភេទតាមខ្សែបន្ទាត់ព្រំដែន ពលករខ្មែរ រួមទាំងជនបរទេសឆ្លងដែន ចេញ-ចូល ដោយខុសច្បាប់ត្រូវឃាត់ធ្វើចត្តាឡីស័ក ក្នុងករណីជនបរទេសមកពីថៃមិនទាន់ចូលដល់កម្ពុជានោះ ត្រូវឲ្យត្រឡប់ទៅវិញតាមផ្លូវដើម ដោយសហការជាមួយកម្លាំងសមត្ថកិច្ចចម្រុះ និងក្រុមការងារសុខាភិបាល ។
នគរបាលត្រូវចាត់វិធានការផ្សេងៗ ដែលមានការចាំបាច់ដើម្បីឆ្លើយតប និងទប់ស្កាត់ការឆ្លងរាលដាលជម្ងឺកូវីដ.១៩ ចូលសហគមន៍ផ្សេងៗទៀតត្រៀមកម្លាំង២៤ម៉/២៤ម៉ សម្រាប់អន្តរាគមន៍ស្រុក.ក្រុង ដែលមាន ហានីភ័យកើតឡើងជាយថាហេតុ ក្នុងករណីមានការឆ្លងជម្ងឺកូវីដ-១៩នេះ។ចំពោះមេខ្សល់ដែលបានធ្វើសកម្មភាពនាំឆ្លងដែន ដោយខុសច្បាប់នាពេលនេះ មិនត្រូវអត់ឱនឲ្យឡើយ ត្រូវតែចាត់ការតាមនិតិវិធីច្បាប់ឲ្យបានហ្មឺងមាត់បំផុត៕
.jpg)
