គណៈបញ្ជាការឯកភាពខេត្ត ក្រុងប៉ោយប៉ែត និងកងកម្លាំងប្រដាប់អាវុធ ចុះដាក់បារ៉ាសប៉ុស្តិ៍ត្រួតពិនិត្យ ជនបរទេសដែលចូលធ្វើការ និងស្នាក់នៅក្នុងក្រុង ដើម្បីទប់ស្គាត់ការរីករាលដាលជំងឺកូវីដ១៩
ខេត្តបន្ទាយមានជ័យ៖ដើម្បីងាយស្រួលក្នុងការគ្រប់គ្រងនូវស្ថានការ និងទប់ស្គាត់ការរីករាលដាលជំងឺកូវីដ១៩ គណៈបញ្ជាការឯកភាពខេត្ត ក្រុងប៉ោយប៉ែត និងកងកម្លាំងប្រដាប់អាវុធមាន កម្លាំងនគរបាល , កម្លាំងកងរាជអាវុធហត្ថ ព្រមទាំងក្រុមគ្រូពេទ្យផងនោះ បានចុះដាក់បារ៉ាសប៉ុស្តិ៍ត្រួតពិនិត្យសុខភាពប្រជាពលរដ្ឋខ្មែរ ពិសេសជនជាតិបរទេស ដែលបានធ្វើដំណើរចូលក្នុងក្រុង។
បើតាមលោក ង៉ោ ម៉េងជ្រួញ អភិបាលរង ខេត្ត បានឲ្យដឹងថា ក្រោយពីទទួលបានបទបញ្ជា និងការណែនាំពីឯកឧត្តម អ៊ុំ រាត្រី អភិបាល នៃគណៈអភិបាលខេត្ត ដែលជាប្រធានគណៈបញ្ជាការឯកភាពខេត្ត និងជាប្រធានគណៈបញ្ជាការទប់ស្គាត់ជំងឺកូវីដ១៩ បានចាត់តាំងឲ្យលោកប្រចាំការនៅតំបន់ភូមិសាស្ត្រក្រុងប៉ោយប៉ែត ក្នុងនោះគណៈបញ្ជាករឯកភាពបានសម្រេចយកពីគោលដៅ គោលដៅទី១ នៅលើកំណាត់ផ្លូវជាតិលេខ៥ ចំណុចខាងមុខទីបញ្ជាការមូលដ្ឋានកងរាជអាវុធហត្ថក្រុង និងគោលដៅទី២ នៅលើកំណាត់ផ្លូវជាតិលេខ៥៨ កែងនឹងផ្លូវ ៥០ ដែលឆ្ពោះមកពីខេត្តព្រះវិហារ និងខេត្តឧត្តរមានជ័យ ចូលមកក្រុងប៉ោយប៉ែត ដើម្បីចូលរួមចំណែកក្នុងការអនុវត្តនូវវិធានការនានាដែរបានធ្វើ និងកំពុងធ្វើ។
លោកបញ្ជាក់ថា ការចុះត្រួតពិនិត្យប្រជាពលរដ្ឋ ពិសេសទៅលើជនជាតិបរទេស ដែលបានធ្វើដំណើរចូលមកក្រុងប៉ោយប៉ែតនេះ ក្នុងគោលបំណងសួរនាំពួកគាត់ថាតើមកពីតំបន់ណា ហើយទៅធ្វើការ និងស្នាក់នៅកន្លែងណា ដើម្បីងាយស្រួលក្នុងការគ្រប់គ្រងស្ថានការ និងការពារ ទប់ស្កាត់ ការរីករាលដាលនូវជំងឺកូវីដ១៩ នៅក្នុងក្រុង។ក្នុងនោះលោកក៏បានអំពាវនាវដល់ប្រជាពលរដ្ឋ និងជនបរទេស ត្រូវអនុវត្តតាមវិធានការរបស់ក្រសួងសុខាភិបាល ឲ្យបានខ្ជាប់ខ្ជួន ដើម្បីបញ្ជៀសការឆ្លងរីករាលដាលកាន់តែធំឡើងៗ។លោកបញ្ជាក់ទៀតថា ក្រុងប៉ោយប៉ែតជាទីក្រុងពាណិជ្ជកម្មមួយ ដូច្នេះយើងត្រូវតែរួមគ្នាគិតគូទប់ស្គាត់ឲ្យបានខ្ពស់ ដើម្បីបញ្ជៀសការឆ្លងនាំឲ្យបិតអាជីវកម្មនានា ជាហេតុធ្វើឲ្យប៉ះពាល់ដល់សេដ្ឋកិច្ចកាន់តែធ្ងន់ធ្ងរទៅៗ។
ជាងនេះទៅទៀតលោកបានបញ្ជាក់អំពីស្ថានការនៅខេត្តបន្ទាយមានជ័យ ចាប់តាំងពីផ្ទុះនៅក្នុងសហគម ២០ គុម្ភៈ រហូតមកដល់ពេលនេះនៅក្នុងខេត្តបន្ទាយមានជ័យ មិនទាន់មានវិជ្ជមានជំងឺឆ្លងកូវីដ១៩ នៅឡើយទេ។ដោយឡែកអ្នកដែលសង្ស័យជាប់ពាក់ព័ន្ធជាមួយស្ត្រីជនជាតិចិនម្នាក់ដែល អាជ្ញាធរខេត្តសៀមរាបរកឃើញវិជ្ជមានកូវីដ១៩ ដែលសមត្ថកិច្ចក្រុងប៉ោយប៉ែត នាំយកទៅពិនិត្យសំណាក់ និងធ្វើចត្តាឡីស័កទាំង១០៥នាក់នោះ អវិជ្ជមានទាំងអស់ ក្នុងការពិនិត្យលើកទី១។តែទោះយ៉ាងនេះក្តីស្នើឲ្យប្រជាពលរដ្ឋ ត្រូវតែបង្កើនការប្រុងប្រយ័ត្នឲ្យកាន់តែខ្ពស់ជាងនេះបន្ថែមទៀតធ្វេដង៕
