ជនសង្ស័យ២នាក់ ត្រូវអាវុធហត្ថស្រុកម៉ាឡៃ ឃាត់ខ្លួនបញ្ជូនទៅតុលាការខេត្តបន្ទាយមានជ័យ ពាក់ព័ន្ធករណីបោកប្រាស់ប្រជាពលរដ្ឋយកប្រាក់ ដោយសន្យាលក់ដី នៅតំបន់បឹងជង្រុកឱ្យ
ខេត្តបន្ទាយមានជ័យ៖ជនសង្ស័យ២នាក់ ដែលជាប់ពាក់ព័ន្ធទៅនឹងករណីបោកប្រាស់ប្រជាពលរដ្ឋចំនួន០៧នាក់ដោយយកប្រាក់ ហើយសន្យាលក់ដី នៅតំបន់បឹងជង្រុក ឱ្យពួកគាត់នោះ ត្រូវបានកម្លាំងមូលដ្ឋានកងរាជអាវុធហត្ថស្រុកម៉ាឡៃ ចាប់ឃាត់ខ្លួនកាលពីថ្ងៃទី១៣ ខែមីនា ឆ្នាំ២០២១ បន្ទាប់ពីជនសង្ស័យទាំង២ បានដឹកនាំប្រជាពលរដ្ឋមួយក្រុមទៅធ្វើសកម្មភាពវាស់វែងដីចែកគ្នា នៅចំណុចតំបន់បឹងជង្រុកតេជោ ឈ្នះ ឈ្នះ ស្ថិតនៅក្នុងភូមិបឹងជង្រុក ឃុំទួលពង្រ ស្រុកម៉ាឡៃ ខេត្តបន្ទាយមានជ័យ នោះ។ដោយឃើញសកម្មភាពឈ្មោះ លាង ពេញ ភេទប្រុស អាយុ៥១ឆ្នាំ និងឈ្មោះ ឈីវ សានីត ភេទប្រុស អាយុ៦៤ឆ្នាំ អ្នកទាំងពីរបច្ចុប្បន្ន រស់នៅភូមិសូរិយា សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បាននាំប្រជាពលរដ្ឋចំនួន០៧នាក់ មកវាស់វែងយកដីរដ្ឋដែលបានដោះស្រាយទំនាស់ដីធ្លី ជាមួយប្រជាពលរដ្ឋកន្លងមកនោះ ទើបឯកឧត្ដម ប៉ាន់ ខែមប៊ុនថន នាយករងខុទ្ធកាល័យសម្ដេចអគ្គមហាបតីតេជោ ហ៊ុន សែន និងជាប្រធានក្រុមការងារដោះស្រាយទំនាស់ដីធ្លីប្រចាំតំបន់បឹងជង្រុក ស្នើឱ្យកម្លាំងមូលដ្ឋានកងរាជអាវុធហត្ថស្រុកម៉ាឡៃ ហៅពួកគាត់ទៅសួរនាំ។
ពាក់ព័ន្ធបញ្ហាខាងលើនេះបើតាមលោកវរសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថ ស្រុកម៉ាឡៃបានឱ្យដឹងថា ក្រោយពីសួរនាំរួចទើបដឹងថា ឈ្មោះ លាង ពេញ និងឈ្មោះ ឈីវ សានីត បានបោកប្រាស់ប្រជាពលរដ្ឋចំនួន០៧នាក់ ដោយយកប្រាក់ពីពួកគាត់ ហើយសន្យាលក់ដីនៅតំបន់បឹងជង្រុកឱ្យពួកគាត់។
បើយោងតាមការៀបរាប់ពីប្រជាពលរដ្ឋទាំង០៧នាក់ បានឱ្យដឹងថា ឈ្មោះ លាង ពេញ បានអះអាងថា ខ្លួនមានដីនៅបឹងជង្រុកហើយលក់ឱ្យពួកគាត់ក្នុង១ឡូតិ៍ តម្លៃ២០ម៉ឺនរៀល បើមិនបានដីទេ នឹងប្រគល់ប្រាក់ឱ្យវិញគ្រប់ចំនួន។ចំណែកជនសង្ស័យទាំងពីរនាក់ នៅចំពោះមុខសត្ថកិច្ចបានឆ្លើយសារភាពថា ក្នុងកំឡុងខែមករា ឆ្នាំ២០២០ ពួកគេពិតជាបានយកប្រាក់ពីប្រជាពលរដ្ឋ សរុបចំនួន៣.៧៦៥,០០០៛(បីលាន ប្រាំពីសែន ប្រាំមួយម៉ឺន ប្រាំពាន់ រៀល) ហើយពួកគេយកប្រាក់ទាំងនោះឱ្យទៅឈ្មោះ សំរឹទ្ធ ង៉ោន ដែលជាអ្នកអះអាងថា ខ្លួនមានដីនៅខាងកើតដីក្រុមហ៊ុន ឡេង ណាវ៉ាត់ត្រា នៅតំបន់បឹងជង្រុកនោះ។ដោយផ្អែកលើការៀបរាប់ពីប្រជាពលរដ្ឋចំនួន០៧នាក់ និងចម្លើយសារភាព របស់ជនសង្ស័យខាងលើ ទើបកម្លាំងជំនាញព្រហ្មទណ្ឌមូលដ្ឋានកងរាជអាវុធហត្ថ ស្រុកម៉ាឡៃកសាងសំណុំរឿង បញ្ជូនមកការិយល័យព្រហ្មទណ្ឌកងរាជអាវុធហត្ថខេត្ត ចាត់ការបន្ត។លុះនៅព្រឹកថ្ងៃទី១៥ ខែមីនា ឆ្នាំ២០២១ កម្លាំងជំនាញកងរាជអាវុធហត្ថខេត្ត បញ្ជូន ជនសង្ស័យទាំងពីរនាក់បន្តទៅសាលាដំបូងខេត្ត ដើម្បីចាត់ការតាមនិតិវិធីច្បាប់៕
.jpg)
.jpg)