ឆ្នាំនេះដំឡូងមី មានទីផ្សារល្អ រីឯតម្លៃឡើងខ្ពស់ជាងឆ្នាំទៅមិញ តែទិន្នផលធ្លាក់ចុះដោយសារឆ្នាំនេះភ្លៀងធ្លាក់ជោគជាំ បណ្តាលឲ្យស្អុយរលួយ
ខេត្តបន្ទាយមានជ័យ៖ប្រជាកសិករដែលប្រកបរបរដាំដំឡូងមី នៅតាមជាយដែន ក្នុងភូមិសាស្ត្រខេត្តបន្ទាយមានជ័យ ត្អូញត្អែពីទិន្នផលដែលប្រមូលបានមានការធ្លាក់ចុះជាងឆ្នាំទៅមិញ ដោយសារឆ្នាំនេះភ្លៀងធ្លាក់ជោគជាំ ទឹកជនលិច បណ្តាលឲ្យមើមស្អុយរលួយ រីឯតម្លៃឡើងខ្ពស់ជាងឆ្នាំទៅមិញ។
បើតាមប្រជាកសិករបានឲ្យដឹងថា ការដាំដុះប្រមូលផលដំឡូងមី ក្នុងឆ្នាំនេះមានការថយចុះក៏ពិតមែន តែទីផ្សារល្អ រីឯតម្លៃឡើងខ្ពស់ជាងឆ្នាំទៅមិញ អាចម៉ាទប់ទល់ បើខាតក៏ខាតបន្តិចបន្តួច ដោយឆ្នាំនេះដំឡូងស្រស់លក់ចេញក្នុង១គីឡូក្រាម តម្លៃ ២,៥បាត(ប្រាក់ថៃ) ស្មើ៣៣៤រៀល។ឯឆ្នាំទៅមិញក្នុង១គីឡូក្រាម តម្លៃ១,៨បាត(ប្រាក់ថៃ) ស្មើរ២៤១រៀល។
បើតាមឈ្មួញដែលទិញពីប្រជាកសិករមកហាលកិនសម្ងួតបានឲ្យដឹងដែរថា ដំឡូងមីដែលសម្ងួតរួច ទិញតាមតម្លៃទីផ្សារ ដោយបច្ចុប្បន្នទិញចូលក្នុង១គីឡូក្រាមតម្លៃ៥,៨បាត(ប្រាក់ថៃ) ស្មើ៧៧៦រៀល លក់បន្តឲ្យឈ្មួញយកចេញទៅក្រៅប្រទេសក្នុង១គីឡូក្រាម តម្លៃ៦បាត (ប្រាក់ថៃ)ស្មើ៨០៣រៀល បើប្រៀបធៀបឆ្នាំទៅមិញតម្លៃខ្ពស់ជាង។
ចំពោះកម្លាំពលកម្មស៊ីឈ្នូលដកដំឡូងក្នុងមួយថ្ងៃ១នាក់អាចរកចំណូលបានជាមធ្យម៣០០បាត(ប្រាក់ថៃ)ស្មើ៤ម៉ឺនរៀល។ជាក់ស្តែលោកអ៊ុំ រាំង ធី អាយុ៦៣ឆ្នាំ រស់នៅភូមិបឹងត្រកួន ឃុំគោករមៀត ស្រុកថ្មពួក ខេត្តបន្ទាយមានជ័យ និងក្រុមគ្រួសារសរុប៤នាក់ ស៊ីឈ្នួលដកដំឡូងឲ្យគេគិតជាតោនក្នុង១តោន ២៣០បាត(ប្រាក់ថៃ)ស្មើជាង៣ម៉ឺនរៀល សរុបមួយថ្ងៃក្រុមគ្រួសាររបស់លោកអ៊ុំអាចរកចំណូលបានជាង១០ម៉ឺនរៀល។ក្រៅពីស៊ីឈ្នួលដកដំឡូងពោលគឺផុតរដូវដកដំឡូងក្រុមគ្រួសាររបស់លោកអ៊ុំនឹងបន្តធ្វើស្រែ ដើម្បីផ្គត់ផ្គង់ជីវភាពបន្ថែម។
ដោយឡែកកម្មករឈូសដំឡូងសម្ងូតវិញអាចរកចំណូលបានក្នុងមួយថ្ងៃបានចំនួន២៥០បាត(ប្រាក់ថៃ)ស្មើជាង៣ម៉ឺនរៀលផងដែរ។ជាមួយគ្នានោះដែរពួកកាត់បានសំណូមពរដល់ប្រជាពលរដ្ឋទាំងអ្នកដែលនៅក្រៅប្រទេស ក៏ដូចជាអ្នកដែលគ្រោងនឹងទៅរកការងារធ្វើនៅឯប្រទេសគេសូមងាកមកធ្វើការនៅស្រុកយើងវិញ ពីព្រោះតម្លៃពលកម្មមិនជាងគ្នានោះទេ ហើយក៏មិនមានការព្រួយបារម្ម ខ្លាចខុសច្បាប់ត្រូវគេចាប់ចងនោះដែរ៕
