វគ្គបណ្ដុះបណ្ដាលស្ដីពី លេខាធិការរដ្ឋបាល ត្រូវបានបទវគ្គបញ្ចប់ដោយជោគជ័យ
ខេត្តកណ្ដាល៖ថ្លែងនៅក្នុងពិធីបិទវគ្គ បណ្ដុះបណ្ដាលស្ដីពី លេខាធិការរដ្ឋបាល កាលពីរសៀលថ្ងៃទី៥ ខែកុម្ភៈ ឆ្នាំ២០២១ លោក តាំង ម៉េងលាន អភិបាលបាលរងខេត្តកណ្ដាលបានបញ្ជាក់ថា គោលបំណងសំខាន់នៃវគ្គបណ្ដុះបណ្ដាលនេះគឺ ដើម្បីផ្ដល់ចំណេះដឹងជាមូលដ្ឋានដល់ស្មៀនដែលទើបប្រឡងជាប់ថ្មី បានត្រៀមខ្លួនសម្រាប់បំពេញការងារ និងបំរើសេវារដ្ឋបាលនៅតាម ឃុំ សង្កាត់របស់ខ្លួនប្រកបដោយភាពស្វាហាប់ ភាពជឿជាក់ និងមានប្រសិទ្ធភាពខ្ពស់ ស្របតាមច្បាប់ស្ដីពីការគ្រប់គ្រងរដ្ឋបាល ឃុំ សង្កាត់ ឆ្នាំ២០០១ និងគោលនយោបាយវិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា។
ឯកឧត្តមបានបន្តថា រដ្ឋបាលខេត្តកណ្ដាល ពិតជាមានមោទនភាពយ៉ាងខ្លាំងដែលសាលាជាតិរដ្ឋបាលមូលដ្ឋាន ក៏ដូចជាក្រសួងមហាផ្ទៃដែលបានជ្រើសរើសយកទីតាំងសាលាខេត្តកណ្ដាល សម្រាប់ធ្វើការបណ្តុះបណ្តាលដល់ស្មៀន ឃុំ សង្កាត់ ដែលបានប្រឡងជាប់ក្នុងឆ្នាំ២០១៩ មកពី១៥ រាជធានី ខេត្ត ចំនួន៤២រូប។
ឯកឧត្តមបានបន្តទៀតថា សម្រាប់វគ្គសិក្សានេះគឺគ្រាន់តែជាជំហានដំបូង នៃការបណ្ដុះបណ្ដាលសម្រាប់ស្មៀន ឃុំ សង្កាត់ ប៉ុណ្ណោះ គឺយើងមានការបណ្ដុះបណ្ដាល និងវគ្គសិក្សាជាច្រើនទៀត ដែលរៀបចំឡើងដោយសាលាជាតិរដ្ឋបាលមូលដ្ឋាន និងរដ្ឋបាលរាជធានី ខេត្ត ជាបន្តបន្ទាប់ទៀត ដើម្បីពង្រឹងសមត្ថភាព និងប្រសិទ្ធភាពក្នុងការអនុវត្តមុខងារភារកិច្ចរបស់ស្មៀន ឃុំសង្កាត់ឲ្យកាន់តែប្រសើរឡើងជាលំដាប់។
ក្នុងពិធីនោះដែរ ឯកឧត្តមអភិបាលរងខេត្ត បានផ្ដាំផ្ញើដល់សិក្ខាកាមទាំងអស់ ត្រូវខិតខំអនុវត្តតួនាទីរបស់ខ្លួនឲ្យបានល្អ ត្រូវយកចំណេះដឹង និងបទពិសោធន៍ដែលទទួលបានពីការបណ្ដុះបណ្ដាលរយៈពេល ១០ថ្ងៃនេះ ទៅអនុវត្តនៅតាម ឃុំ សង្កាត់ របស់ខ្លួនឲ្យមានប្រសិទ្ធភាពខ្ពស់ ត្រូវធ្វើខ្លួនជាជំនួយការដ៏ល្អក្នុងរដ្ឋបាលឃុំ សង្កាត់ខ្លួន ប្រកបដោយលក្ខណៈសម្បត្តិគ្រប់គ្រាន់ទាំងសមត្ថភាព និងគុណភាព ត្រូវបន្តអភិវឌ្ឍន៍ខ្លួនឯងនិងទទួលយកការបណ្ដុះបណ្ដាលថ្មីៗជានិច្ច ទើបធ្វើឲ្យកិច្ចការនានាក្នុងរដ្ឋបាលឃុំ សង្កាត់ ទទួលបានលទ្ធផលល្អ ពីព្រោះថាស្មៀនជាអ្នកអនុវត្តការងារផ្ទាល់ជាអ្នកផ្ដល់សេវាផ្ទាល់ និងជាអ្នកធ្វើកិច្ចការងាររដ្ឋបាលឃុំសង្កាត់ទាំងមូល។
សូមជម្រាបថា វគ្គបណ្ដុះបណ្ដាល ស្ដីពីលេខាធិការរដ្ឋបាលនេះ មានរយៈពេល ១០ថ្ងៃ មានសិក្ខាកាមចូលរួមចំនួន៤២រូប មកពី១៥ រាជធានី ខេត្តក្នុងនោះ ស្មៀនឃុំ សង្កាត់នៃរដ្ឋបាលខេត្តកណ្ដាលចំនួន៤រូបមកពីរាជធានីភ្នំពេញ១រូប ខេត្តកំពង់ចាម៣រូប ខេត្តស្វាយរៀង១រូប ខេត្តព្រៃវែង៣ រូបខេត្តត្បូងឃ្មុំ១រូប ខេត្តសៀមរាប២រូប ខេត្តឧត្តរមានជ័យ៣រូប ខេត្តបាត់ដំបង ៣រូប ខេត្តកំពង់ឆ្នាំង២រូប ខេត្តបន្ទាយមានជ័យ ៧រូបខេត្តកំពត ៤រូប ខេត្តកែប ៥រូប ខេត្តតាកែវ ២រូប និងខេត្តព្រះសីហនុ ១រូបដែលសុទ្ធតែជាមន្ត្រីដែលបានអនុវត្តមុខងារទើបតែបានរយៈពេលជាង ១ ឆ្នាំពោលគឺទើបតែបានតែងតាំងស៊ប់ក្នុងក្របខណ្ឌរួច៕
