ប្រជាពលរដ្ឋរស់នៅលើដីអូរស្វារអិលនៅសល់ ១០-២០ ភាគរយ មិនស្តាប់តាមសេចក្តីជូនដំណឹងរបស់រដ្ឋបាលខេត្តបន្ទាយមានជ័យ ស្តីពីការរុះរើសំណង់គ្រប់ប្រភេទលើដីស្របច្បាប់របស់ពលរដ្ឋ១៤
ខេត្តបន្ទាយមានជ័យ÷ ក្រោយពីមានការសម្របសម្រួលពី ឯកឧត្តម ង៉ោ ម៉េងជ្រួន អភិបាលរង ខេត្ត បន្ទាយមានជ័យ និងស្ថាប័ន ពាក់ព័ន្ធ រវាងពលរដ្ឋជាច្រើនគ្រួសារ ដែលបានរស់នៅលើដីដោយខុសច្បាប់នៅចំណុចដីអូរស្វារអិល កាលពីថ្ងៃទី ២៩ ខែ មករា ឆ្នាំ ២០២១ យើងសង្កេតឃើញថា មានប្រជាពលរដ្ឋ ៨០-៩០ ភាគរយ បានយល់ព្រមទទួលយកការដោះដូរតាមគោលនយោបាយឈ្នះៗរបស់សម្តេចអគ្គមហាសេនាបតីតេជោ ហ៊ុន សែន។
ប្រជាពលរដ្ឋដែលបានយល់ព្រមដោះដូរនិងបញ្ចប់ទំនាស់ដីធ្លីនៅចំណុចអូរស្វារអិល ឋិតក្នុងភូមិសូរិយា សង្កាត់និមិត្ត ក្រុង ប៉ោយប៉ែត មានការសប្បាយចិត្ត យ៉ាងខ្លាំង ក្រោយអាជ្ញាធរ ពាក់ព័ន្ធ ក្រោមការដឹកនាំរបស់សម្តេចតេជោ ហ៊ុន សែន យកចិត្តទុកដាក់រកដំណោះស្រាយ ជូនពួកគាត់តាំងពីដើមរហូតដល់បញ្ចប់នៃទំនាស់ដីធ្លីជាង២០ឆ្នាំនៅចំណុចដីអូរស្វារអិលមួយនេះ។
ដោយឡែកសារព័ត៌មានយើងសង្កេតឃើញថា មានប្រជាពលរដ្ឋ ១០-២០ ភាគរយ មិនព្រមទទួលយកការដោះដូរតាមគោលនយោបាយឈ្នះៗនោះទេ ។
ក្នុងនោះទៀតសោត គេក៏បានសង្កេតឃើញថា កាលពីថ្ងៃទី២៩ ខែមករា ឆ្នាំ២០២១ រដ្ឋបាលខេត្តបន្ទាយមានជ័យ ក៏បានចេញស.ជ.ណ ០៤៨/២១ ជូនដំណឹងបងប្អូនប្រជាពលរដ្ឋដែលកំពុងនាំគ្នារំលោភកាន់កាប់ សាងសង់ផ្ទះ រោង ខ្ទម ខុសច្បាប់លើដីដែលមានប័ណ្ណសម្គាល់សិទ្ធិកាន់កាប់អចលនវត្ថុរបស់ប្រជាពលរដ្ឋចំនួន១៤គ្រួសារ នៅចំណុចដីអូរស្វារអិល ឋិតក្នុងភូមិសូរិយា សង្កាត់និមិត្ត ឲ្យរុះរើចេញវិញទាំងអស់ឲ្យបានមុនថ្ងៃទី០៤ ខែកុម្ភៈ ឆ្នាំ២០២១ ជាកំហិត។ ក្នុងសេចក្តីជូនដំណឹងបន្តឲ្យដឹងទៀតថា បើករណីមិនអនុវត្តន៍តាមការណែនាំទេ រដ្ឋបាលខេត្តបន្ទាយមានជ័យនិងចាត់ក្រុមការងារថ្នាក់ខេត្ត ដើម្បីចុះធ្វើការរុះរើដោយផ្ទាល់ ហើយបើមានការប្រឆាំងតវ៉ា និងចាត់វិធានការតាមច្បាប់តាមរូបភាពជាក់ស្តែង និងមិនទទួលខុសត្រូវចំពោះការខូចខាត ឬ បាត់បង់ផលប្រយោជន៍ ឬដោះស្រាយជូនឡើយ។
តែក្នុងនោះ បែរជា ក្រុមប្រជាពលរដ្ឋដែលរស់នៅលើដីដោយខុសច្បាប់នៅសេសសល់ ១០-២០ ភាគរយ ក្រោមការដឹកនាំរបស់លោក សំជឿន ឋិតនៅចំណុចអូរស្វារអិល នាំគ្នា ដើរតាមអ៊ុកឡុក និង រំខានការងាររបស់ស្ថាប័នពាក់ព័ន្ធ និង សមត្ថកិច្ចទៅវិញ ។ សកម្មភាពភាពទាំងនេះ សបញ្ជាក់ឲ្យឃើញថា ប្រជាពលរដ្ឋដែលនៅសេសសល់ទាំងនេះ កំពុងផ្គើនជាមួយសេចក្តីជូនដំណឹងរបស់ រដ្ឋបាលខេត្តបន្ទាយមានជ័យ យ៉ាងច្បាស់ក្រឡែត៕
