ពលរដ្ឋរស់នៅភូមិបាលិលេយ្យ២ លើកគ្នាទៅសាលាក្រុងប៉ោយប៉ែត តវ៉ាស្នើសុំការអន្តរាគមន៍ រឿងជំនាញចុះវាស់វែងធ្វើប្លង់ប្រព័ន្ធរួចហើយ មិនប្រគល់ប្លង់ឲ្យបែជាថាដីមានរឿងទៅវិញ
ខេត្តបន្ទាយមានជ័យ៖ដោយសារតែប្រជាពលរដ្ឋរស់នៅភូមិបាលិលេយ្យ២ សង្កាត់/ក្រុងប៉ោយប៉ែត ខេត្តបន្ទាយមានជ័យចំនួន៨៩គ្រួសារ ដែលបានចុះបញ្ជីវាស់វែងធ្វើប្លង់ប្រព័ន្ធ រហូតទទួលបានកន្ទុញប័ណ្ណមួយសន្លឹក ហើយដល់ពេលទៅយកប្លង់បែជាមិនបាន ហើយថែមទាំងគេប្រាប់ថា ដីនោះកំពុងមានរឿងមិនអាចចេញប្លង់បាន ក៏ស្រាប់តែនៅព្រឹកថ្ងៃទី១៥ ខែកុម្ភៈ ឆ្នាំ២០២១ ពួកគាត់បានលើកគ្នាទៅសាលាក្រុងប៉ោយប៉ែត ដើម្បីសុំការអន្តរាគមន៍ពីលោកអភិបាលក្រុង បន្ទាប់មកមន្ត្រីរដ្ឋបាលក្រុងបានទទួលយកនូវការសម្របសម្រួលជូនពួកគាត់ នៅក្នុងសាលប្រជុំ។
ក្រោយពីមានការសម្របសម្រួលពីរដ្ឋបាលក្រុងដឹកនាំដោយលោក កែវ តារ៉ារស្មី អភិបាលរងក្រុង ទទួលបន្ទុកផ្នែកដោះស្រាយទំនាស់ដីធ្លីអស់រយះពេលជាច្រើនម៉ោងមកនោះ ជាលទ្ធផលខាងប្រជាពលរដ្ឋ មិនព្រមទទួលយកនូវការសម្របសម្រួលដោះស្រាយនិងស្នើសុំរបស់រដ្ឋបាលក្រុង ដោយសារខាងភាគីជំទាស់ទាមទាឲ្យពួកគាត់ចេញលុយតាមតម្រូវការដែលខ្លួនចង់បាន។
លោក កែវ តារ៉ារស្មី អភិបាលរងក្រុងបានមានប្រសាសន៍ទៅកាន់ប្រជាពលរដ្ឋ ក្នុងឱកាសសម្របសម្រួលនោះថា រដ្ឋបាលក្រុងមិនមានសិទ្ធកាត់ក្តីឲ្យខាងភាគីណាឈ្នះ ចាញ់នោះឡើយ គ្រាន់តែជាអាជ្ញាកណ្តាលតែប៉ុណ្ណោះ បើសិនជាបងប្អូនមិនទទួលយក មានតែបញ្ជូនទៅខាងសាលាខេត្តដោះស្រាយវិញ។
បើតាមប្រជាពលរដ្ឋបានឲ្យដឹងថា ពួកគាត់មិនព្រមទទួលយកនោះទេ ដោយសារភាគីជំទាស់ទាមទាឲ្យពួកគាត់ចេញលុយតាមតម្រូវការដែលខ្លួនចង់បាន ខណៈដែលពួកគាត់មានចុងសន្លឹកត្រឹមត្រូវដែលចេញដោយសូរិយោដីវាស់វែងធ្វើប្លង់ប្រព័ន្ធឲ្យ ហើយម្យ៉ាងវិញទៀតពួកគាត់រស់នៅជិត២០ឆ្នាំមកហើយ មិនជំទាស់បែជាទើបមកទំទាស់នៅពេលដែលត្រូវចែកប្លង់ឲ្យទៅវិញ។ពួកគាត់បញ្ជាក់ថា
ដីតំបន់នេះត្រូវបានគេដោះស្រាយម្តងរួចមកហើយកាលពីឆ្នាំ២០១០ សម្រេចដោយតុលាការកំពូលថា តំបន់នឹងជាដីរបស់ប្រជាជន មិនមានឲ្យអ្នកណាមកតវ៉ាទៀតទេ។
បើតាមមន្ត្រីជំនាញវាស់វែងដីនៅសាលាក្រុងបានបញ្ជាក់ថា ករណីដីមានបញ្ហានេះការវាស់វែងយើងចុះបញ្ជីជូន ប៉ុន្តែគេទុកឱកាសមួយឲ្យរយះពេល១៥ថ្ងៃ ចាប់ពីថ្ងៃបិតផ្សាយតទៅ បើសិនជាមានអ្នកដាក់ពាក្យបណ្តឹងតវ៉ា ទាមទាយើងនឹងបើកសិទ្ធទទួលពាក្យបណ្តឹង ពីព្រោះខាងភាគីអ្នកប្តឹងក៏មានឯកសារ ឯអ្នកកាន់កាប់ក៏មានឯកសារដូចគ្នា អញ្ជឹងទេក្នុងនាមមន្ត្រីជំនាញព្យាយាមដោះស្រាយជូនពួកគាត់ដោយមិនកាន់ជើងឬលំអៀងខាងណាឡើយ។មន្ត្រីជំនាញបញ្ជាក់ថា ការសម្របសម្រួលនេះបើសិនជាភាគីទាំងពីយកឯកសារមកតតាំងចង់ឈ្នះ ចាញ់គឺមិនងាយចប់នោះទេ តែបើពួកគាត់បន្ទាន់ចិត្តម្ខាងព្រមបញ្ចុះតម្លៃបន្តិច ឯម្ខាងទៀតឡើងបន្តិចទៅនោះនឹងចប់ហើយ៕
