ជនសង្ស័យម្នាក់ ត្រូវបានកម្លាំងនគរបាលស្រុកម៉ាឡៃ ចាប់ឃាត់ខ្លួន បន្ទាប់ពីវាយ ប្លន់ យកម៉ូតូពីអតីតយុវជនម្នាក់ បណ្តាលឲ្យស្លាប់ និងយកម៉ូតូទៅទំលាក់ចោលនៅក្នុងស្រះ
ខេត្តបន្ទាយមានជ័យ៖អតីតយុវជនម្នាក់ ត្រូវជនសង្ស័យវាយ ប្លន់ បណ្តាលឲ្យស្លាប់ និងយកម៉ូតូទៅទំលាក់ចោលក្នុងស្រះ ត្រូវកម្លាំងនគរបាលស្រុកម៉ាឡៃ ឃាត់ខ្លួនបានហើយនៅរសៀលថ្ងៃទី០១ ខែកុម្ភៈ ឆ្នាំ២០២១ ក្រោយពីធ្វើសកម្មភាពនៅចំណុចផ្លូវលេខ៥០២ ភូមិបន្ទាយទី២ ឃុំអូរសំព័រ ស្រុកម៉ាឡៃ ខេត្តបន្ទាយមានជ័យ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃបានឲ្យដឹងថា ជនសង្ស័យមានឈ្មោះ វុន ឡៃហៀក ភេទប្រុស អាយុ២៦ឆ្នាំ រស់នៅភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។ចំណែកជនរងគ្រោះមានឈ្មោះ រុង រឿង ភេទប្រុស អាយុ៥៩ឆ្នាំ រស់នៅភូមិបន្ទាយទី២ ឃុំអូរសំព័រ ស្រុកម៉ាឡៃ ខេត្តបន្ទាយមានជ័យ អតីតជាយោធិនចូលនិវត្ត។
លោកបញ្ជាក់ថា នៅពេលកើតហេតុ ជនសង្ស័យបានធ្វើសកម្មភាពប្រើអំពើហឹង្សាវាយទៅលើជនរងគ្រោះអតីយុទ្ធជនម្នាក់ បណ្តាលឲ្យរងរបួសធ្ងន់ រួចយកម៉ូតូទៅទម្លាក់ចូលក្នុងទឹកស្រះ។ ជនរងគ្រោះត្រូវបានជនសង្ស័យវាយត្រូវក្បាល និងមុខជាច្រើនកន្លែងសន្លប់ ហើយជនសង្ស័យបានអូសជនរងគ្រោះដាក់លើគំនរឈើ រួចជនសង្ស័យចាក់សាំងដុត តែត្រូវបានប្រជាពលរដ្ឋ អ្នកធ្វើដំណើរតាមផ្លូវប្រទះឃើញទាន់ បង្កឲ្យមានការភ្ញាក់ផ្អើលនៅវេលាម៉ោង៧និង៣០នាទី ព្រឹកថ្ងៃទី០១ ខែកុម្ភៈ ឆ្នាំ២០២១ ក៏ទាញចេញពីកន្លែងឆេះ ហើយដឹកទៅសង្រ្គោះនៅមន្ទីរពេទ្យបង្អែកមិត្តភាព កម្ពុជា-ប៉ុន ស្រុកមង្គលបូរី តែជាអកុសល ដោយរបួសធ្ងន់ធ្ងរជនរងគ្រោះបានស្លាប់ពេលដល់មន្ទីរពេទ្យ។
លោកអធិការ បញ្ជាក់ទៀតថា៖ម៉ូតូជនរងគ្រោះម៉ាកឌ្រីមពណ៌ខ្មៅស្លាកលេខបន្ទាយមានជ័យ1I-8433 ពណ៌ខ្មៅ ស៊េរីឆ្នាំ២០១៤ ត្រូវបានសង្ស័យយកទៅលាក់ទុកក្នុងទឹកស្រះក្រោយផ្ទះរបស់គេ។ បច្ចុប្បន្នជនសង្ស័យឈ្មោះ វុន ឡៃហៀក ត្រូវបានកម្លាំងនគរបាលជំនាញព្រហ្មទណ្ឌ នៃអធិការដ្ឋាននគរបាលស្រុកម៉ាឡៃកំពុងរៀបសំសំណុំរឿង បញ្ជូនខ្លួនទៅស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធីច្បាប់៕