អ្នកសារព័ត៌មាន និងសប្បុរសជននានា នៅក្រុងប៉ោយប៉ែត នាំយកអំណោយផ្តល់ជូន ក្រុមការងារស្ម័គ្រចិត្តចំនួន៥០នាក់ នៅចំណុចភូមិសាស្ត្រអុង ម៉ុង ស្រុកម៉ាឡៃ
ខេត្តបន្ទាយមានជ័យ៖ដើម្បីជាការលើកទឹកចិត្ត និងមើលឃើញពីការខ្វះខាតរបស់ក្រុមការងារស្ម័គ្រចិត្ត នៅចំណុចភូមិសាស្ត្រអុង ម៉ុង ស្ថិតនៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ លោក ឈុន ពេជ្រ ប្រធានមជ្ឈមណ្ឌលព័ត៌មានសម្លេងជាយដែន បាននាំយកអំណោយរបស់ក្រុមអ្នកសារព័ត៌មាន និងបានមកពីការជួយឧបត្ថម្ភពីសប្បុរសជននានា នៅក្នុងក្រុងប៉ោយប៉ែត ជួយឧបត្ថម្ភដល់ក្រុមការងារស្ម័គ្រចិត្តចំនួន៥០នាក់ ក្នុងម្នាក់ៗទទួលបានអង្ករ ទឹកត្រី , ទឹកស៊ីអ៊ី និង មី។
ក្នុងឱកាសនោះលោក ឈុន ពេជ្រ បានថ្លែងកោតសសើចំពោះក្រុមការងារស្ម័គ្រចិត្ត ដែលបានស្ម័គ្រចិត្តលះបង់ទាំងពេលវេលា និងកម្លាំងកាយចិត្ត ក្នុងការជួយប្រជាពលរដ្ឋ នៅចំណុចភូមិសាស្ត្រខាងលើ។
លោក គង់ ជា តំណាងឲ្យប្រជាពលរដ្ឋ ចំនួន១៣៥០គ្រួសារ និងជាប្រធានក្រុមការងារ បានមានប្រសាសន៍ថា ប្រជាពលរដ្ឋ និងក្រុមការងារខាងលើ ថ្នាក់ដឹកនាំមិនទាន់ទទួលស្គាល់ និងបង្កើតជាភូមិជាផ្លូវការនូវឡើយទេ គ្រាន់តែអាជ្ញាធរមូលដ្ឋានដឹងលឺតែប៉ុណ្ណោះ។
លោកបញ្ជាក់ថា ពលរដ្ឋនាំគ្នាមករស់នៅ និងបង្កើតជាក្រុមការងារសម្រាប់ជួយការពារ និងជួយដោះស្រាយរាល់ទុកលំបាក និងឈឺស្កាត់នានារបស់ប្រជាពលរដ្ឋ ចំណុចភូមិសាស្ត្រខាងលើគិតមកដល់ពេលនេះរយះពេល២ឆ្នាំមកហើយ។
ប្រជាពលរដ្ឋបានឲ្យដឹងថា បច្ចុប្បន្នមិនបានប្រកបមុខរបរអ្វីក្រៅពីដើរស៊ីឈ្នួលគេនោះទេ ដោយសារតែជីវភាពខ្វះខាត។ដូច្នេះពួកគាត់ស្នើសុំឲ្យអាជ្ញាធរគ្រប់លំដាប់ថ្នាក់ជួយសម្រួល ឲ្យបានបង្កើតភូមិពេញសិទ្ធិដូចគេឯងផង៕
