វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត នៅក្រុងប៉ោយប៉ែត
ខេត្តបន្ទាយមានជ័យ៖ឯកឧត្តម អ៊ុំ រាត្រី អភិបាលនៃគណៈខេត្តបន្ទាយមានជ័យ បានទទួលយកសំណូមពរ និងបញ្ហាប្រឈមរបស់ប្រជាពលរដ្ឋនៅក្នុងក្រុងប៉ោយប៉ែត ដែលបានលើកឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត នៅរព្រឹកថ្ងៃទី២៨ ខែមករា ឆ្នាំ២០២១ នៅក្រុងប៉ោយប៉ែតនោះ ធ្វើការដោះស្រាយហើយបញ្ហា ដែលនៅសេសសល់ និងត្រូវដាក់បញ្ចូលទៅក្នុងគម្រោងអភិវឌ្ឍន៍ របស់ខេត្តបន្តទៀត។
នៅក្នុងវេទិកាសាធាណៈនេះត្រូវបានតំណាងប្រជាពលរដ្ឋនៅក្នុងក្រុងប៉ោយប៉ែត បានលើកឡើង ឱ្យរាជរដ្ឋាភិបាលអាជ្ញាធរខេត្ត ស្ថាប័ន ពាក់ព័ន្ធ បន្តជួយដោះស្រាយ មានចំនួន៥៧សំណូមពរ បញ្ហា គឺបញ្ហាក្តីព្រួយបារម្ភលើ, កង្វះទឹកធ្វើស្រែប្រាំង ,ការជួសជុលផ្លូវដែលរងការខូចខាត នៅតាមមូលដ្ឋាន, ប្រព័ន្ធធារាសាស្ត្រ និងមានបញ្ហាប្រឈមលើការអភិវឌ្ឍន៍មូលដ្ឋានរបស់គាត់មួយចំនួនទៀត ដែលតម្រូវឱ្យជួយដោះស្រាយជាបន្ទាន់នោះ។
នាឱកាសនោះ ឯកឧត្តម ខេង ស៊ុម ប្រធាន ក្រុមប្រឹក្សា ខេត្តបន្ទាយមានជ័យ បានលើកឡើងថា ការរៀបចំវេទិកាផ្សព្វផ្សាយ និងពិគ្រោះយោបល់ គឺជាឧបករណ៍ដ៏មានសារៈសំខាន់មួយសម្រាប់លើកកម្ពស់ គណនេយ្យភាពតម្លាភាព និងការចូលរួមរបស់ប្រជាពលរដ្ឋទាំងប្រុស ទាំងស្រី ក្នុងកិច្ចដំណើរការ របស់ក្រុមប្រឹក្សា នៃរដ្ឋបាលថ្នាក់ក្រោមជាតិ។
ឯកឧត្តម ខេង ស៊ុម មានប្រសាសន៍ ទៀតថា ការបើកវេទិកានេះឡើងបានផ្តល់ឱកាសក្នុងការពិភាក្សា ប្រកបដោយតម្លាភាព គ្រប់ជ្រុងជ្រោយការទទួលបាននូវពហុគំនិត ពីរដ្ឋបាលថ្នាក់ក្រោមជាតិ សង្គមស៊ីវិល សាធារណះជននានា ដែលអាចទទួលបាននូវការផ្ទៀងផ្ទាត់ប្រកបដោយសុចរិតភាព សុភវិនិច្ឆ័យ និងយុត្តិធម៌ ក្នុងសង្គមឱ្យកាន់តែល្អប្រសើរឡើង ម្យ៉ាងទៀតក៏ដើម្បីបង្ហាញ នូវការទទួលខុសត្រូវមួយរបស់រដ្ឋបាល ថ្នាក់ក្រោមជាតិ ចំពោះប្រជាពលរដ្ឋ និងសង្គមជាតិទៀតផង ហើយមានគោលបំណងសំខាន់លើគោលនយោបាយ ការកែលម្អនូវប្រព័ន្ធអភិបាលកិច្ច នៅតាម ថ្នាក់រដ្ឋបាលនានា ដើម្បីជំរុញដល់លទ្ធិប្រជាធិបតេយ្យ នៅមូលដ្ឋាន និងការជំរុញកិច្ចអភិវឌ្ឍន៍សេដ្ឋកិច្ច និងសង្គមកិច្ចនៅតាមមូលដ្ឋាន ដើម្បីចូលរួមចំណែកកាត់បន្ថយភាពក្រីក្រ នៅទូទាំងប្រទេស។
ប្រធានក្រុមប្រឹក្សាខេត្តបន្ទាយមានជ័យ ឯកឧត្តម ខេង ស៊ុម បន្តទៀតថា រាជរដ្ឋាភិបាល បានបង្ហាញ ឱ្យឃើញនូវឆន្ទៈដ៏មោះមុត និងជាការបោះជំហានទៅមុខយ៉ាងសំខាន់មួយ ក្នុងកិច្ចដំណើរការកំណែ ទម្រង់ អភិបាលកិច្ច ក្នុងថ្នាក់មូលដ្ឋានសំដៅពង្រឹង លទ្ធិប្រជាធិបតេយ្យ ជំរុញកិច្ចអភិវឌ្ឍន៍ សេដ្ឋកិច្ច សង្គមកិច្ច ដើម្បីចូលរួមចំណែកកាត់បន្ថយភាពក្រីក្រឱ្យប្រកបដោយប្រសិទ្ធភាព៕
