បញ្ជូនខ្លួនជនសង្ស័យ៣នាក់ ទៅតុលាការខេត្តបន្ទាយមានជ័យ ពាក់ព័ន្ធទៅនឹងករណីគ្រឿងញៀន
ខេត្តបន្ទាយមានជ័យ៖ជនសង្ស័យចំនួន៣នាក់ ត្រូវបានកម្លាំងមូលដ្ឋានអាវុធហត្ថក្រុងសិរីសោភ័ណ ដឹកនាំដោយលោកវរសេនីយ៍ត្រី យ៉ាន់ សុវណ្ណ មេបញ្ជាការ មូលដ្ឋានអាវុធហត្ថក្រុង ចាប់ឃាត់ខ្លួនកាលពីវេលាម៉ោង២២ និង០០នាទី ថ្ងៃទី១៧ ខែមករា ឆ្នាំ២០២១ ខណៈដែលកំពុងចុះល្បាតការពារសន្តិសុខក្នុងភូមិសាស្រ្តក្រុង ក៏ប្រទះឃើញយុវជនចំនួន៣នាក់ កំពុងសំងំនៅទីងងឹត នៅចំណុចបន្ទប់ជួល ស្ថិតក្នុងភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដោយមានការសង្ស័យកម្លាំងក៏បានហៅមកសួរនាំ និងធ្វើការឆែកឆេររកឃើញគ្រឿងញៀនមេតំហ្វេតាមីនទឹកកកចំនួន០៤កូនថង់កិប ទម្ងន់ ៤,៨២ក្រាម និងដកហូតម៉ូតូចំនួន០១គ្រឿង ម៉ាកហុងដាឌ្រីម ផលិតឆ្នាំ២០១២ ពណ៌ខ្មៅ ពាក់ស្លាកលេខបន្ទាយមានជ័យ1F-1530 និងសម្ភារៈមួយចំនួន នាំខ្លួនយកមកមូលដ្ឋានអាវុធហត្ថក្រុងតែម្ដង។
លោកវរសេនីយ៍ត្រី យ៉ាន់ សុវណ្ណ បានឱ្យដឹងថា ជនសង្ស័យទាំង៣នាក់
១/.ឈ្មោះ ថា វ៉ាន់ថៃ ហៅ ហុក ភេទប្រុស អាយុ១៧ឆ្នាំ មានថ្នាំញៀន ៤,៣០ក្រាម បច្ចុប្បន្ន រស់ភូមិ/សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
២/.ឈ្មោះ ស៊ាន ម៉ាន់ហ្វុង ភេទប្រុស អាយុ១៧ឆ្នាំ រស់នៅភូមិ/សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ មានថ្នាំញៀន០១កូនថង់កិប ទម្ងន់០,៤១ក្រាម។
៣/.ឈ្មោះ ឡុង លី ហៅ ដឺ ភេទប្រុស អាយុ២១ឆ្នាំ រស់នៅភូមិ/សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យមានថ្នាំញៀន០១កូនថង់កិប ទម្ងន់ ០,១១ក្រាម ហើយសមត្ថកិច្ចបានធ្វើតេស្តទឹកនោមរកសារធាតុញៀនឃើញថា វិជ្ជមានទាំង៣នាក់។
ដោយផ្អែកលើចម្លើយសារភាព និងមានវត្ថុតាង ព្រមទាំងការធ្វើតេស្តទឹកនោម ជនសង្ស័យទាំង៣នាក់ត្រូវបានកម្លាំងជំនាញបទល្មើសគ្រឿងញៀនអាវុធហត្ថក្រុង កសាងសំណុំរឿងបញ្ជូនទៅការិយាល័យបង្រាបបទល្មើសគ្រឿងញៀនអាវុធហត្ថខេត្តចាត់ការបន្ត។បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងការិយាល័យបង្ក្រាបបទល្មើសគ្រឿងញៀនអាវុធហត្ថ ខេត្តបញ្ជូនទៅសាលាដំបូងខេត្ត ដើម្បីចាត់ការតាមនិតិវិធី៕
.jpg)