អភិបាលរងខេត្តសៀមរាប ដឹកនាំកិច្ចប្រជុំបូកសរុបរបាយការណ៍ និងការអនុវត្តការងារ ប្រចាំឆ្នាំ២០២០ និងទិសដៅអនុវត្តបន្តឆ្នាំ២០២១
ខេត្តសៀមរាប៖លោក ង៉ាន់ ភិរុណ អភិបាលរងខេត្តសៀមរាប តំណាងដ៏ខ្ពងខ្ពស់ ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប ដឹកនាំកិច្ចប្រជុំបូកសរុបរបាយការណ៍ និងការអនុវត្តការងារ ប្រចាំឆ្នាំ២០២០ និងទិសដៅអនុវត្តបន្តឆ្នាំ២០២១ ជាមួយមន្ទីរ បរិស្ថានខេត្ត ដើម្បីត្រៀមរបាយការណ៍សន្និបាត។
កិច្ចប្រជុំនេះបានប្រព្រឹត្តទៅកាលពីរសៀលថ្ងៃទី១៤ ខែមករា ឆ្នាំ២០២១ នៅសាលប្រជុំលេខ១ ដោយមានការអញ្ជើញចូលរួមពីលោកនាយករងរដ្ឋបាល លោកនាយកទីចាត់ការរដ្ឋបាល លោកប្រធានមន្ទីរបរិស្ថាន និងលោក លោកស្រី ប្រធាន-អនុប្រធាន ការិយាល័យចំណុះមន្ទីរ បរិស្ថានផងដែរ។
ក្នុងឱកាសនោះលោកអភិបាលរងខេត្ត បានស្នើដល់ប្រធានមន្ទីរ ក៏ដូចជា លោក លោកស្រី ប្រធាន-អនុប្រធាន ការិយាល័យចំណុះរបស់មន្ទីរបរិស្ថានខេត្ត លើកឡើងអំពីបញ្ហាប្រឈមរបស់ការិយាល័យនីមួយៗ ដើម្បីស្វែងរកដំណោះស្រាយ ដែលបានអនុវត្តរយៈពេលមួយឆ្នាំកន្លងមក ហើយរាល់ចំណុចបញ្ហាប្រឈមដែលលោក លោកស្រី បានលើកឡើងក្នុងអង្គប្រជុំ នឹងយកចំណុចទាំងនោះទៅប្រជុំពិភាក្សាជាមួយមន្ទីរជំនាញពាក់ព័ន្ធ។
ជាមួយគ្នានោះដែរប្រធានអង្គប្រជុំក៏បានអោយលោក លោកស្រី ប្រធាន អនុប្រធាន ការិយាល័យនីមួយៗ នៃមន្ទីរបរិស្ថាន លើកនូវផែនការសកម្មភាពការងាររបស់ការិយាល័យនីមួយៗ សម្រាប់អនុវត្តក្នុងឆ្នាំ២០២១ ដើម្បីទទួលបានលទ្ធផល និងប្រសិទ្ធភាពខ្ពស់ និងពិនិត្យរបាយការណ៍បូកសរុបលទ្ធផលអនុវត្តសេចក្តីសម្រេចអង្គសន្និបាត ជាមួយនឹងសមិទ្ធផលសំខាន់ៗ របស់មន្ទីរដែលអនុវត្តបាន ព្រមទាំងបញ្ជូនរបាយការណ៍ទាំងនោះមករដ្ឋបាលខេត្ត ដើម្បីធ្វើការត្រួតពិនិត្យសកម្មភាពការងារទាំងនោះ៕
