ទិវាពិភពលោក វិជា្ជសង្គ្រោះបឋម ក្រោមប្រធានបទ"ការកែសម្រួល ការអនុវត្តន៍សង្គ្រោះបឋម ឆ្លើយតបទៅនឹងរោគរាតត្បាតជាសកល''
ខេត្តកោះកុង៖នាព្រឹកថ្ងៃពុធ ៧រោច ខែភទ្របទ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៩ ខែកញ្ញា ឆ្នាំ២០២០ សាខាកាកបាទក្រហមកម្ពុជា ខេត្ដកោះកុង ប្រារព្ធពិធីទិវាពិភពលោក វិជា្ជសង្គ្រោះបឋម ក្រោមប្រធានបទ''ការកែសម្រួលការអនុវត្តន៍ សង្គ្រោះបឋមឆ្លើយតបទៅនឹង រោគរាតត្បាតជាសកល''។
ពិធីនេះបានប្រារព្ធឡើងនៅទីស្នាក់ការសាខាកាកបាទក្រហមកម្ពុជា ខេត្ដកោះកុង ដោយមានការអញ្ជើញចូលរួមពីឯកឧត្តម សំឃិត វៀន សមាជិកគណៈកម្មាធិការសាខា កាកបាទក្រហមកម្ពុជាខេត្ដ លោកជំទាវ មុំ ចន្ធី នាយិការងនាយកដ្ឋានសុខភាពកាកបាទក្រហមកម្ពុជា និងលោកគ្រូឯកទេសផ្នែកវិជ្ជាសង្គ្រោះបឋម នៃទីស្នាក់ការកណ្តាល សមាជិក សមាជិកាគណៈកម្មាធិការសាខា អនុសាខាក្រុងខេមរភូមិន្ទ សង្កាត់ទាំងបី អ្នកស្ម័គ្រចិត្ត យុវជនកក្រក យុវជនសសយក យុវជនកាយរិទ្ធ ប្រជាពលរដ្ឋ ព្រមទាំងមន្ដ្រីរាជការ តាមមន្ទីរអង្គភាព ជាច្រើនរូបទៀត។
នាឱកាសនោះលោក ទេព វិស្កុល ហិរញ្ញឹកគណៈកម្មាធិការសាខា បានថ្លែងសុន្ទរកថា ដោយគូសបញ្ជាក់ថា ការប្រារព្ធទិវានេះឡើងគឺដើម្បីអបអរសាទរ ទិវាពិភពលោក វិជ្ជាសង្គ្រោះបឋម ក្នុងគោលបំណងផ្សព្វផ្សាយឲ្យប្រជាពលរដ្ឋយល់ដឹង ពីវិធីជួយសង្គ្រោះជនរងគ្រោះនៅក្នុងសហគមន៍ របស់ខ្លួនឱ្យបានត្រឹមត្រូវ និង សុវត្ថិភាពមុនពេលគ្រូពេទ្យមកជួយសង្គ្រោះ និងមុនពេលបញ្ជូនទៅ មន្ទីពេទ្យ។កាកបាទក្រហមកម្ពុជាបានអប់រំយល់ដឹងអំពីវិជ្ជាសង្គ្រោះបឋមការពារ ដើម្បីឲ្យប្រជាពលរដ្ឋចេះបង្ការខ្លួនកុំឲ្យមានគ្រោះថ្នាក់។
ជាមួយគ្នានោះដែរលោកជំទាវ មុំ ចន្ធី នាយិការង នាយកដ្ឋានសុខភាពកាកបាទក្រហមកម្ពុជា បានមានប្រសាសន៍ថា វិជ្ជាសង្គ្រោះបឋម គឺជាមុខវិជ្ជាដ៏មានសារសំខាន់មួយ ដែលយើងទាំងអស់គ្នាត្រូវ សិក្សា ដើម្បីទុកជាមូលដ្ឋានគ្រឹះសម្រាប់សង្គ្រោះ បងប្អូនប្រជាពលរដ្ឋ នៅក្នុងសហគមន៍ដែលរងគ្រោះថ្នាក់ផ្សេង ៗ ដោយចៃដន្យមានដូចជា ខ្យល់គរ ស្ទះដង្ហើម បាក់ឆ្អឹង និង គ្រោះថ្នាក់ ចរាចរណ៍ ជាដើម មុនពេលគ្រូពេទ្យមកដល់ ឬបញ្ជូន អ្នករងគ្រោះទៅកាន់មន្ទីរពេទ្យ។
ទន្ទឹមនោះឯកឧត្តម សំឃិត វៀន សមាជិកគណៈកម្មាធិការសាខា បានពាំនាំប្រសាសន៍ លោកជំទាវ មិថុនា ភូ ថង ប្រធានគណៈកម្មាធិការសាខា ឯកឧត្តម ប៊ុន លើត ប្រធានកិត្តិយសសាខា ពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្ដាំផ្ញើដល់អ្នកស្ម័គ្រចិត្ដ និងយុវជនទាំងអស់ ជាពិសេសយុវជនកាកបាទក្រហមកម្ពុជា ដែលមានវត្ដមាននៅទីនេះ ក្រោយពីទទួលបាននូវ ចំណេះដឹងស្ដីពីវិជ្ជាសង្គ្រោះបឋម និងចូលរួមសកម្មភាពរបស់កាកបាទក្រហមកម្ពុជា រួចហើយសូមក្មួយៗ យកចំណេះដឹងនេះទៅប្រើប្រាស់ ឱ្យបានត្រឹមត្រូវ និងធ្វើការផ្សព្វផ្សាយបន្ដ ឱ្យ បានទូលំទូលាយ ដល់សហគមន៍ប្រជាពលរដ្ឋ និងមិត្ដភក្តិនូវវិជា្ជសង្គ្រោះបឋមនេះផង៕