នាយឧត្តមសេនីយ៍ សន្តិបណ្ឌិត នេត សាវឿន ជម្រុញឲ្យស្នងការថ្មី ត្រូវចេះព្យាករណ៍នូវសភាពការណ៍ ពួកឧទ្ទាមអមិត្តមិនដែលបោះបង់បំណងបំផ្លាញរាជរដ្ឋាភិបាលស្របច្បាប់
ខេត្តបន្ទាយមានជ័យ៖ក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការ នៃស្នងការដ្ឋាននគរបាលខេត្តបន្ទាយមានជ័យ ដោយលោកឧត្តមសេនីយ៍ត្រី សិទ្ធិ ឡោះ ស្នងការរងនគរបាលខេត្តបន្ទាយមានជ័យ ត្រូវបានតែងតាំងជាស្នងការថ្មី នៃស្នងការដ្ឋាននគរបាល ខេត្តបន្ទាយមានជ័យ ជំនួសលោកឧត្តមសេនីយ៍ទោ អាត់ ខែម ដែលត្រូវបានដាក់ឲ្យចូលនិវត្តន៍ និងត្រូវបានតែងតាំងជាទីប្រឹក្សាក្រសួងមហាផ្ទៃនោះ នៅសាលាខេត្តបន្ទាយមានជ័យ កាលពីព្រឹកថ្ងៃទី០៧ ខែកញ្ញា ឆ្នាំ២០២០ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការដ្ឋាននគរបាលជាតិ បានមានប្រសាសន៍ ជំរុញឲ្យស្នងការដែលតែងតាំងថ្មី ត្រូវចាត់ទុកខេត្តបន្ទាយមានជ័យ ជាខេត្តគំរូមួយ ទាំងការអនុវត្តវិន័យ ទាំងកងកម្លាំងអន្តរាគមន៍ ការចល័តទ័ព និងមធ្យោបាយប្រើប្រាស់ ជាពិសេសកម្លាំងនគរបាល ខេត្តបន្ទាយមានជ័យ ជាគំរូល្អមួយក្នុងការចុះជួយប្រជាពលរដ្ឋ នៅពេលមានគ្រោះអាសន្នអន់ក្រ ដូចជាខ្យល់ព្យុះ ទឹកជំនន់ ប្រក់ផ្ទះ លើកផ្ទះ ជួយច្រូតស្រូវក្នុងទឹកផងដែរ។
ជាងនេះទៅទៀតនាយឧត្តមសេនីយ៍ សន្តិបណ្ឌិត បានស្នើឲ្យស្នងការ ត្រូវពង្រឹងតួនាទីដឹកនាំដោយផ្សារភ្ជាប់ ត្រួវទទួលខុសត្រូវខ្ពស់ជាងគេ ត្រូវចាត់ទុកខ្លួនឯងជាអាណាព្យាបាល ជាអ្នកដឹកនាំកសាងមនោសញ្ជេតនាក្នុងអង្គភាព ចុះសាកសួរសុខទុក្ខនៅពេលមានមន្ត្រីឈឺថ្កាត់ អនុវត្តតាមសមាគមមិត្តនគរបាល ត្រូវធ្វើជាគំរូគេក្នុងការបំពេញភាកិច្ច។ត្រូវធ្វើជាសេនាធិការគ្រប់ជ្រុងជ្រោយ ដល់គណៈបញ្ជាការឯកភាព ដើម្បីបំពេញការងារ សំដៅការពារសន្តិសុខ សុវត្ថិភាព និងសណ្តាប់ធ្នាប់ជូនប្រជាពលរដ្ឋក្នុងខេត្តទាំងមូល។ត្រូវជួយលើកកម្ពស់សេវាចាំបាច់ ដើម្បីបំរើជូនប្រជាពលរដ្ឋ ការបំពេញលិខិតស្នាមរដ្ឋបាល និងធ្វើកិច្ចការដោយស្មោះត្រង់ដោយឥតលក្ខខណ្ឌ។ត្រូវពង្រឹងគុណភាពស្នងការ និងមន្ត្រីនគរបាលទាំងអស់ ក្នុងនាមជាកងកម្លាំងត្រូវមានសមត្ថភាព វិន័យ គុណធម៌ និងសីលធម៌។
ឯកឧត្តមអគ្គស្នងការនគរបាលជាតិ បានមានប្រសាសន៍បន្ថែមថា ក្នុងនាមជាស្នងការថ្មី ត្រូវជួយដោះស្រាយទុក្ខកង្វល់របស់ប្រជាពលរដ្ឋ អ្វីដែលជាទុក្ខព្រួយរបស់ប្រជាពលរដ្ឋនោះ គឺករណីបទល្មើស លួច ឆក់ ប្លន់នៅក្នុងមូលដ្ឋាន ត្រូវតែអនុវត្តនូវគោលនយោបាយភូមិ ឃុំ មានសុវត្ថិភាព ជួយទប់ស្កាត់បញ្ហាគ្រឿងញៀន ត្រូវជួយដោះស្រាយសំដៅកាត់បន្ថយអត្រាគ្រោះថ្នាក់ ចរាចរណ៍ ដែលជាក្តីកង្វល់របស់ប្រជាពលរដ្ឋ។
ជាមួយគ្នានោះដែរឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យបានមានប្រសាសន៍ថា ក្រោយពីប្រកាសតែងតាំងមុខដំណែងស្នងការដ្ឋាននគរបាលខេត្តបន្ទាយមានជ័យថ្មី ដែលបន្តដំណែងពីលោកឧត្តមសេនីយ៍ទោ ហើយនោះសង្ឈឹមថា កិច្ចការដែលកំពុងតែទទួលបានលទ្ធផលល្អប្រសើរ នឹងទទួលបានល្អប្រសើរថ្មីៗបន្តទៀត កងកម្លាំងដែលជាទីស្រលាញ់របស់ប្រជាពលរដ្ឋ កាន់តែមានភាពជឿទុកចិត្ត ពីព្រោះប្រជាពលរដ្ឋមានទុក្ខលំបាក កម្លាំងរបស់ស្នងការតែងតែមានមុខជួយដល់ពលរដ្ឋជានិច្ច ដូចជាការជួយសាសង់ ជួសជុលផ្ទះដល់គ្រួសារជួបគ្រោះមហន្តរាយ គ្រួសារក្រៃក្រ ចាស់ជរា ជួយដឹកទឹកចែកប្រជាពលរដ្ឋដែលជួបគ្រោះរាំងស្ងួត ខ្វះទឹកហូប នឹងប្រើប្រាស់ និងជួយច្រូតកាត់ប្រជាពលរដ្ឋ ដែលសកម្មភាពទាំងនេះបង្ហាញពីទឹកចិត្តគោរព ស្រលាញ់ប្រជាពលរដ្ឋមិនគិតពីកានើយហត់។ចំពោះបញ្ហាការងាសន្តិសុខសណ្តាប់ធ្នាប់សង្គមពិសេសគោនយោបាយភូមិ ឃុំ មានសុវត្ថិភាព ការរឹតបន្តឹងច្បាប់ចរាចរណ៍ផ្លូវគោកមន្ត្រីនគរបាលបានធ្វើការល្អ និងការពារប្រជាពលរដ្ឋឲ្យមានភាពកក់ក្តៅ។
ក្នុងនោះលោកឧត្តមសេនីយ៍ត្រី សិទ្ធិ ឡោះ បានអាននូវរបាយការណ៍លទ្ធផលការងារសង្ខេបរបស់ស្នងការដ្ឋាននគរបាលខេត្តបន្ទាយមានជ័យ ដែលកន្លងមកស្នងការបានដាក់អស់កម្លាំងកាយចិត្តនិងស្មារតី ទទួលខុសត្រូវចំពោះថ្នាក់ដឹកនាំគ្រប់លំដាប់ថ្នាក់ នឹងបានរឹតចំណងសាមគ្គីភាព ឯកភាពផ្ទៃក្នុងបានល្អ ដោយមានការទំនាក់ទំនងគ្នាល្អ សហការជាមួយអាជ្ញាធដែនដី និងអង្គភាពពាក់ពន្ធ័ ក្នុងការរក្សាសន្តិសុខសុវត្ថិភាព សណ្តាប់ធ្នាប់ក្នុងខេត្ត ក្រោមការចង្អុលដឹងនាំរបស់អគ្គស្នងការដ្ឋាននគរបាលជាតិ គណៈបញ្ជាការខេត្ត ស្របតាមដំណាក់ការរីកចំរើនរបស់សង្គមជាតិ ដោយក្រោមការដឹកនាំដ៏ឈ្លៀសវ៉ៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា។
គួរបញ្ជាក់ដែរថា កាលពីរសៀលថ្ងៃ ខែដដែលនៅសាលាខេត្តបន្ទាយមានជ័យ នាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិក និងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ អញ្ជើញជាអធិបតីក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្កិ ជូនមន្ត្រីនគរបាលជាតិ នៃស្នងការដ្ឋាននគរបាលខេត្តបន្ទាយមានជ័យ ដោយមានការអញ្ជើញចូលរួមពីលោក លោកស្រី មន្ត្រីនគរបាលជុំវិញខេត្ត។បន្ទាប់ពីអាននូវព្រះរាជក្រឹត្យតែងតាំងមុខតំណែង នាយឧត្តមសេនីយ៍ ប៉ែន វិបុល បានមានមតិសំណេះសំណាល ផ្តាំផ្ញើនឹងបំពាក់ឋានន្តរស័ក្កិដល់មន្ត្រីនគរបាលជាតិ នៃស្នងការដ្ឋាននគរបាលខេត្តជាច្រើនរូបផងដែរ៕
