រដ្ឋបាលខេត្តសៀមរាប រៀបចំពិធីកាន់បិណ្ឌវេនទី៣ នៅវត្តរាជបូព៌តាមប្រពៃណីទំនៀមទំលាប់ របស់ប្រជាជនខ្មែរ ដែលកាន់សាសនាព្រះពុទ្ធ
ខេត្តសៀមរាប៖ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងលោកជំទាវ ឯកឧត្តម ទៀ សីហា អភិបាលនៃគណៈអភិបាលខេត្ត និងលោកជំទាវ ព្រមទាំងឯកឧត្តម លោកជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត អស់លោក លោកស្រីជាថ្នាក់ដឹកនាំមន្ទីរ មន្ត្រីរាជការសាលាខេត្តសៀមរាប នាថ្ងៃសៅរិ៍ ទី០៥ ខែកញ្ញា ឆ្នាំ២០២០ បានអញ្ជើញទៅចូលរួមក្នុងពិធីកាន់វេនជាមួយ បងប្អូនប្រជាពុទ្ធបរិស័ទ នៅវេនទី៣ នៅវត្តរាជបូរណ៌ ក្នុងសង្កាត់សាលាកំរើក ក្រុង ខេត្តសៀមរាប។
បុណ្យភ្ជំបិណ្ឌ ដែលជាបុណ្យមួយដ៏ធំ នៃប្រពៃណីទំនៀមទំលាប់ របស់ប្រជាពលរដ្ឋខ្មែរ ដែលកាន់សាសនាព្រះពុទ្ធ គោរពប្រតិបត្តិតាំងពីដូនតាតរៀងមក។ម៉្យាងទៀតពិធីកាន់វេនបិណ្ឌនេះ ពុទ្ធសាសនិកខ្មែរយើងបានប្រារព្ធបដិបត្តិធ្វើឡើងចាប់ពីថ្ងៃ១រោជ ខែភទ្របទ ដល់ថ្ងៃ១៤រោជ ខែ ភទ្របទ រហូតដល់ ថ្ងៃបុណ្យភ្ជំធំ ត្រូវថ្ងៃ១៥រោជ ខែភទ្របទ ដែលបងប្អូនជាមន្ត្រីរាជការអ្នកមុខអ្នកការ ពុទ្ធបរិស័ទ ប្រជាពលរដ្ឋជិតឆ្ងាយបានមកជួបជុំគ្នានាំយកនូវចង្ហាន់ ចំណីអាហារ ទៀនធូក បច្ច័យទៅប្រគេនដល់ព្រះសង្ឃគង់នៅចាំព្រះវស្សា តាមទីវត្តអារាមនានា ក្នុងព្រះរាជាណាចក្រកម្ពុជា។
នាឱកាសនោះឯកឧត្តម ទៀ សីហា បានលើកឡើងថា បេសកកម្មនៃការថែរក្សាសន្តិភាព និង បន្តឲ្យមាននិរន្តរភាពនៃវឌ្ឍនភាពកម្ពុជា គឺការចូលរួមនិងគាំទ្រយ៉ាងពេញទំហឹងពីសំណាក់ប្រជារាស្រ្តកម្ពុជា តាមរយៈនៃការផ្តល់ជំនឿទុកចិត្ត លើការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី និង ជាបីតាសន្តិភាពនៅកម្ពុជា។ក្នុងនោះឯកឧត្តមក៏បានលើកពី បច្ចុប្បន្នភាព ដែលនៅលើពិភពលោក បានកំពុងជួបនូវបញ្ហាវិបត្តិជម្ងឺកូវិដ១៩ បានធ្វើឲ្យប៉ះពាល់ស្ថានភាពសេដ្ឋកិច្ចយ៉ាងខ្លាំងក្នុងនោះកម្ពុជាក៏បានជួបបញ្ហានេះផងដែរ។កត្តានេះហើយ អាជ្ញាធរខេត្តសៀមរាប បានកំពុងរួមសហការគ្នាជាមួយវិស័យឯកជន ក៏ដូចបណ្តាអង្គការនានា ក្នុងការស្តារឲ្យរស់ឡើងវិញលើវិស័យទេសចរណ៍នៅខេត្តសៀមរាប ។
ឯកឧត្តមបានបន្តទៀតថា ដើមី្បធ្វើស្តារឡើង វិញក្នុងវិស័យទេសចរណ៍ ក៏ត្រូវមានការចូលរួមពីវិស័យពុទ្ធចក្រ ហើយទីវត្តអារាមជាជង្រុកថែរក្សាអភិរក្សនូវ អក្សរសាស្ត្រជាតិ វប្បធម៌ ទំនៀមទម្លាប់ដូនតាខ្មែរយើង និង ជាទីកន្លែងទាកទាញដល់ភ្ញៀវទេសចរណ៍ ចូលមកសិក្សាស្វែងយល់ពីពុទ្ធប្រវត្តិរបស់ ព្រះសម្មាសាម្ពុទ្ធព្រះបរម្យគ្រូនៃយើង។ក្នុងនាមប្រជាពលរដ្ឋខេត្តសៀមរាប ក្នុងឱកាសបុណ្យកាន់បិណ្ឌនេះ ឯកឧត្តមបានធ្វើការថ្លែងអំណរគុណចំពោះសម្តេចតេជោ ហ៊ុន សែន នាយករដ្ឋមន្ត្រី បានផ្តល់នូវកញ្ចប់ថវិកា ក្នុងការស្តារឡើងវិញលើហេដ្ឋារចនាសម្ព័ន្ធក្នុងខេត្តសៀមរាប ចំនួន៣៨ខ្សែ ក្នុងកញ្ចប់ថវិកា១៥០លានដុល្លា ក្នុងការអភិវឌ្ឍន៍ខេត្តទេសចរណ៍មួយនេះ ៕
