ឯកឧត្តម ឧត្តមសេនីយ៍ឯក ថោង សុគន្ធា អញ្ជើញជាអធិបតី ក្នុងពិធីផ្សព្វផ្សាយលទ្ធផលការងារត្រួត ពិនិត្យគ្រឿងញៀនឆមាសទី១ និងទិសដៅការងារឆមាសទី២ ឆ្នាំ២០២០
ខេត្តសៀមរាប៖ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរង នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ) និងលោក ពិន ប្រាកដ អភិបាលរង និងអនុប្រធានគណៈកម្មាធិការត្រួតពិនិត្យគ្រឿងញៀនខេត្ត នាថ្ងៃព្រហស្បតិ៍១រោច ខែភទ្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី០៣ ខែកញ្ញា ឆ្នាំ២០២០ បានអញ្ជើញជាអធិបតី ក្នុងពិធីផ្សព្វផ្សាយលទ្ធផលការងារត្រួតពិនិត្យគ្រឿងញៀនឆមាសទី១ និងទិសដៅការងារឆមាសទី២ ឆ្នាំ២០២០ ដោយមានការចូលរួមពីប្រធានតំណាងមន្ទីរ អង្គភាពជុំវិញខេត្ត ប្រធាន ឬតំណាងព្រះរាជសាលាដំបូងខេត្ត អភិបាល អភិបាលរងក្រុង-ស្រុក ចៅសង្កាត់ អង្គភាពអនុវត្តច្បាប់។
នាឱកាសនោះលោក ពិន ប្រាកដ អភិបាលរង និងអនុប្រធានគណៈកម្មាធិការត្រួតពិនិត្យគ្រឿងញៀនខេត្ត បានសំដែងនូវការគាំទ្រទាំងស្រុងចំពោះកិច្ចខិតខំប្រឹងរបស់រាជរដ្ឋាភិបាល ក្នុងការប្រយុទ្ធប្រឆាំងគ្រឿងញៀន ដែលបានចូលរួមចំណែកយ៉ាងសំខាន់ក្នុងការថែរក្សាសន្តិសុខ សណ្តាប់ធ្នាប់សាធារណៈ និងការអភិវឌ្ឍសង្គម។ក្នុងនាមគណៈកម្មាធិការត្រួតពិនិត្យគ្រឿងញៀន លោកក៏បានលើកឡើងនូវបញ្ហាប្រឈម ក៏ដូចជាចំណុចខ្វះខាតមួយចំនួនដែលខេត្តបានជួបប្រទះនាពេលកន្លងមក និងបានលើកឡើងជាសំណូមពរមួយចំនួនដល់ អ.ជ.ប.គ.ញ. ដើម្បីលើកកម្ពស់ប្រសិទ្ធភាពការងារប្រយុទ្ធប្រឆាំងគ្រឿងញៀនក្នុងឆមាសទី២ និងក្នុងពេលខាងមុខ។
ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរង នៃអគ្គលេខាធិការដ្ឋាន អ.ជ.ប.គ.ញ បានមានមតិបន្ថែម ដោយបានបញ្ជាក់ឡើងវិញអំពីសភាពការណ៍គ្រឿងញៀន ទាំងក្នុងកម្រិតជាតិ និងអន្តរជាតិ ពិសេសចំណុចប្រឈម និងចំណុចខ្វះខាតមួយចំនួន ដែលអាចធ្វើអោយបញ្ហាគ្រឿងញៀននៅតែបន្តកើតមាន។ជាមួយនោះ ឯកឧត្ដម ក៏បានលើកអំពីចំណុចសំខាន់មួយចំនួន ពិសេសអនុសាសន៍ និងការណែនាំរបស់ថ្នាក់ដឹកនាំរាជរដ្ឋាភិបាល ថ្នាក់ដឹកនាំ អ.ជ.ប.គ.ញ ក៏ដូចជាបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ក្នុងការលើកកម្ពស់ប្រសិទ្ធភាពការងារប្រយុទ្ធប្រឆាំងគ្រឿងញៀន រួមមានដូចជាការបន្តយកចិត្តទុកដាក់ពង្រឹងយន្តការ ការអនុវត្តវិធានការឆ្លើយតបដែលមានលក្ខណះពហុវិស័យ ដោយមិនត្រូវប្រើប្រាស់តែមន្រ្តីអនុវត្តច្បាប់ ហើយទាមទារអោយធ្វើការងារអោយស៊ីសង្វាក់គ្នា គាំទ្រទៅវិញទៅមក និងអោយបានជាប្រចាំ ដូចភ្លៀងរលឹម ចំពោះមន្រ្តីអនុវត្ត៕
