កម្លាំងនគរបាលក្រុងប៉ោយប៉ែត ឃាត់ខ្លួនជនសង្ស័យម្នាក់រួម និង វត្ថុតាងថ្នាំញៀនមួយចំនួន
ខេត្តបន្ទាយមានជ័យ៖ ដោយមានការយកចិត្តទុកដាក់ពីលោកឧត្តមសេនីយ៍ត្រី សិទ្ធិ ឡោះ ស្នងការដ្ឋាននគរបាលខេត្ត លោកវរសេនីយ៍ឯក ធិន សុិនដេត អធិការនគរបាលក្រុងប៉ោយប៉ែត បានកម្លាំងជំនាញការិយាល័យគ្រឿងញៀនចុះស្រាវជ្រាវឈានដល់ធ្វើការឃាត់ខ្លួនជនសង្ស័យជួញដូរថ្នាំញៀនម្នាក់ប្រតិបត្តិការនេះធ្វើឡើងនៅរសៀលថ្ងៃទី២៧ ខែកញ្ញា ឆ្នាំ២០២០ នៅចំណុចមណ្ឌល៤ ភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
បើតាមដឹងជនសង្ស័យមានឈ្មោះ នេត កុសល់ភេទប្រុស អាយុ៤៤ឆ្នាំ មុខរបរជ្រែអីវ៉ាន់ ស្នាក់នៅ ភូមិក្បាលស្ពាន១ សង្កាត់/ក្រុងប៉ោយប៉ែត ខេត្តបន្ទាយ មានជ័យ ជាមុខសញ្ញាចាស់ ដែលកម្លាំងនគរបាលក្រុងបានធ្វើការកំណត់និងតាមដានស្រាវជ្រាវយូរមកហើយទើបឈានដល់ការបង្រ្កាបបាននិងដកហូតបានវត្ថុតាងជាក់ស្តែងមានថ្នាំគ្រាប់ពណ៌ស្វាយមានរូបសត្វពីលើចំនួន ១១ដប់ ១គ្រាប់ និង ៥កំណាត់ ម្សៅក្រាម ស ថ្លាចំនួន ១ កូនថង់តូច ម្សៅម៉ត់ ស សង្ស័យខេហិតចំនួន ៤ កូនថង់តូច ថ្នាំគ្រាប់ពណ៌ផ្កាឈូកមានរាងបេះដូងចំនួន ៥ គ្រាប់ កូនជញ្ជីងថ្លឹង ថ្នាំញៀន ១ ស្លាបព្រាជ័រសម្រាប់ចូកថ្នាំញៀន ៣ ថ្នាំទឹកប្រភេទដប សំរាប់សំងួតខេហិតចំនួន ១១ ដប ដែកកេះសម្រាប់ដុត ១ និងសំបកថង់មួយចំនួន ដែលជនសង្ស័យបានលាក់ទុកនៅក្នុងបន្ទប់ស្នាក់នៅ។
បើតាមការឲ្យដឹងពីលោកវរសេនីយ៍ឯក ស្រី សារ៉ុម នាយការិយាល័យ នគរបាលប្រឆាំងគ្រឿងញៀន បានឲ្យដឹងថា ជនសង្ស័យរួមទាំងវត្ថុតាង ត្រូវបានកម្លាំងនគរបាលជំនាញ រៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ នៅរសៀលថ្ងៃទី២៨ ខែកញ្ញា ឆ្នាំ២០២០ ដើម្បីចាត់ការតាមនិតិវិធី៕
