ឯកឧត្តម ជាវ តាយ ដឹកនាំកិច្ចប្រជុំផ្សព្វផ្សាយ របាយការណ៍ស្តីពី លទ្ធផលការងារ ត្រួតពិនិត្យគ្រឿងញៀន ប្រចាំឆមាសទី១ និងលើកទិសដៅការងារសម្រាប់ឆមាសទី២ ឆ្នាំ២០២០
ខេត្តកំពត៖ឯកឧត្តម ជាវ តាយ អភិបាលនៃគណៈអភិបាលខេត្តកំពត និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត នាព្រឹកថ្ងៃពុធ ០៦កើត ខែអស្សុជ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៣ ខែកញ្ញា ឆ្នាំ២០២០ បានអញ្ជើញជាអធិបតីក្នុងកិច្ចប្រជុំផ្សព្វផ្សាយ របាយការណ៍ស្តីពីលទ្ធផលការងារត្រួតពិនិត្យគ្រឿងញៀន ប្រចាំឆមាសទី១ និងលើកទិសដៅការងារសម្រាប់ឆមាសទី២ ឆ្នាំ២០២០។
ពិធីនេះបានប្រព្រឹត្តទៅនៅសាលាខេត្តកំពត ដោយមានការអញ្ជើញចូលរួមពី ឯកឧត្តមអគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀន អភិបាលរងខេត្ត ព្រះរាជអាជ្ញា នៃអយ្យការអមសាលាដំបូងខេត្ត ប្រធានសាលាដំបូងខេត្ត លោកស្នងការ មេបញ្ជាការកងកម្លាំងទាំងបីប្រភេទ ប្រធានមន្ទីរ អង្គភាពជុំវិញខេត្ត អភិបាលក្រុង ស្រុក អធិការនគរបាល មេបញ្ជាការកងកម្លាំងទាំងបីប្រភេទក្រុង ស្រុក លោកមេឃុំ ចៅសង្កាត់ សរុបប្រមាណ១៤០នាក់។
ក្នុងពិធីនាព្រឹកនេះឯកឧត្តម ជាវ តាយ បានមានប្រសាសន៍ថា៖ក្នុងនាមគណៈកម្មាធិការត្រួតពិនិត្យគ្រឿងញៀនខេត្ត សូមកោតសរសើរចំពោះកងកម្លាំងសមត្ថកិច្ចគ្រប់ប្រភេទ អាជ្ញាធរគ្រប់លំដាប់ថ្នាក់ ដែលកន្លងមកបានយកចិត្តទុកដាក់អនុវត្តសកម្មភាព ក្តាប់ជាប់នូវគ្រប់សភាពការណ៍គ្រឿងញៀនដែលកើតមានក្នុងខេត្ត និងចាត់តាំងអនុវត្តប្រកបដោយប្រសិទ្ធភាព ដោយបង្ក្រាបបទស្មើសគ្រឿងញៀនបានចំនួន១៣៣ករណី ចាប់ឃាត់ខ្លួនជនសង្ស័យចំនួន២១២នាក់ ស្រី១៣នាក់ ចាប់យកវត្ថុតាងគ្រឿងញៀនប្រភេទមេតំហ្វេតាមីនចំនួន៦០២កញ្ចប់ ទម្ងន់៦៤៤,១៧ក្រាម គ្រឿងញៀនប្រភេទម៉ាទឹកកកចំនួន៨កញ្ចប់ និង៥៥កញ្ចប់តូច មានទម្ងន់៤៣,៤៥ក្រាម និងថ្នាំញៀនប្រភេទគ្រាប់ចំនួន០៧គ្រាប់ ទម្ងន់១ក្រាម រថយន្ត២គ្រឿង និងឧបករណ៍ប្រើប្រាស់គ្រឿងញៀនមួយចំនួនទៀត។ឯកឧត្តមបានបញ្ជាក់ទៀតថា ចំពោះករណីទាំងនេះ យើងបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់។
ឯកឧត្តម អភិបាលខេត្ត និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត បានដាក់ចេញនូវផែនការមួយចំនួនសម្រាប់អនុវត្ត ដោយផ្តោតសំខាន់ទៅលើគណៈកម្មាធិការត្រួតពិនិត្យគ្រឿងញៀនក្រុង ស្រុក ឃុំ សង្កាត់ ត្រូវបន្តរៀបចំ និងពង្រឹងយន្តការរបស់ខ្លួន ហើយបន្តយកចិត្តទុកដាក់អនុវត្តតួនាទីភារកិច្ច ឲ្យមានប្រសិទ្ធភាពខ្ពស់ ស្របតាមទិសដៅការងារត្រួតពិនិត្យគ្រឿងញៀន។បង្កើនការអប់រំផ្សព្វផ្សាយ លើកកម្ពស់ការយល់ដឹងជាសាធារណៈអំពីគ្រោះថ្នាក់នៃគ្រឿងញៀន ជំរុញលើកទឹកចិត្តឲ្យមានការចូលរួមយ៉ាងសកម្មផុលផុសពីគ្រប់ស្ថាប័នមានសមត្ថកិច្ច និងអាជ្ញាធរគ្រប់លំដាប់ថ្នាក់ ក៏ដូចវិស័យសាសនា វិស័យឯកជន សប្បុរសជន អង្គការ សមាគមជាដៃគូ ដោយបង្កើនការអប់រំផ្សព្វផ្សាយតាមរយៈបណ្តាញសង្គម បណ្តាញព័ត៌មាន និងវេទិកានានា នៅតាមមូលដ្ឋានឲ្យបានជាប្រចាំ៕
