កម្លាំងកងរាជអាវុធហត្ថ ស្រុកម៉ាឡៃ បានចុះប្រតិបត្តិការបង្រ្កាបករណីជួញដូរគ្រឿងញៀនឈានទៅដល់ឃាត់ខ្លួនបានជនសង្ស័យម្នាក់ រួមនិងវត្ថុតាង
ខេត្តបន្ទាយមានជ័យ៖ យោងតាមការស៊ើបអង្កេតជាក់ស្ដែង នៅវេលាម៉ោង១៣/០០នាទី នាថ្ងៃទី២១ ខែកញ្ញា ឆ្នាំ២០២០ លោកវរសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថស្រុកម៉ាឡៃ បានដឹកនាំកម្លាំងចុះធ្វើប្រតិបត្តិការបង្រ្កាបករណីជួញដូរដោយខុសច្បាប់នូវសារធាតុញៀន និងបានឃាត់ខ្លួនជនសង្ស័យបានចំនួនមួយនាក់ឈ្មោះ កង់ បួន ភេទប្រុស អាយុ២៥ឆ្នាំ នៅចំណុចផ្លូវ៥០២ ស្ថិតក្នុងភូមិទួលពង្រ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
ក្នុងនោះលោកវរសេនីយ៍ត្រី តាំង សុខហេង បានប្រាប់ឱ្យដឹងថា ការបង្រ្កាបករណីខាងលើនេះកម្លាំងរបស់លោកដកហូតបានវត្ថុតាងរួមមាន៖ គ្រឿងញៀនមេតំហ្វេតាមីនទឹកកកចំនួន០៣កូនថង់ ស្មើនឹង ៥,០៦ក្រាម, ទូរស័ព្ទដៃ០១គ្រឿង, នាឡិការដៃ០១គ្រឿង និងសម្ភារៈសម្រាប់ច្រក និងប្រើប្រាស់គ្រឿងញៀនមួយចំនួន។ ជនសង្ស័យត្រូវបានបញ្ជូនមកមូលដ្ឋាន អ.ហ ស្រុក ដើម្បីធ្វើការសាកសួរ ក្រោយពីកម្លាំងជំនាញបទល្មើសគ្រឿងញៀសាកសួរចម្លើយរួចមក ជនសង្ស័យបានឆ្លើយសារភាពថា ខ្លួនគេពិតជាបានទិញគ្រឿងញៀនពីក្រុងប៉ែតប៉ែត ហើយយកមកលក់ចែកចាយបន្តនៅស្រុកម៉ាឡៃនេះ។
ដោយផ្អែកលើចម្លើយសារភាព និងមានវត្ថុតាងផងនោះ ទើបកម្លាំងជំនាញកសាងសំណុរឿងបញ្ជូនមកបញ្ជាការដ្ឋាន អ.ហ ខេត្តដើម្បីចាត់ការបន្ត។ បច្ចុប្បន្ន ជនសង្ស័យ និងវត្ថុតាងត្រូវបានកម្លាំងជំនាញបទល្មើសគ្រឿងញៀន អ.ហ ខេត្ត បញ្ជូនទៅសាលាដំបូងខេត្តចាត់ការតាមនីតិវិធី៕
