កម្លាំងនគរបាលក្រុងព្រះសីហនុ ឃាត់ខ្លួនជនជាតិចិនម្នាក់ ករណីប្លន់យកលុយចំនួន៦០០០ដុល្លារ
ខេត្តព្រះសីហនុ៖ជនជាតិចិនម្នាក់ ត្រូវបានកម្លាំងអធិការដ្ឋាននគរបាលក្រុងព្រះសីហនុ ចាប់ឃាត់ខ្លួនពាក់ពន្ធ័ករណីលួចមានស្ថានទម្ងន់ទោស (ហិង្សាប្រើកាំបិតចុងស្រួចគំរាមប្លន់) យកលុយចំនួន ៦០០០ដុល្លារ នៅចំណុចក្នុងបន្ទប់លេខ៨២២៣ សណ្ឋាគារ ស៊ីទូហាយកាង ស្ថិតក្នុង សង្កាត់ លេខ៤ ក្រុង-ខេត្តព្រះសីហនុ កាលពីថ្ងៃទី១៩ ខែកក្កដា ឆ្នាំ២០២០ វេលាម៉ោងប្រហែល ១២ ថ្ងៃត្រង់។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានប្រាប់អ្នកសារព័ត៌មានឲ្យដឹងថា ជនសង្ស័យមានឈ្មោះ ស៊ី ម៉ូហៃ ភេទប្រុស ជនជាតិចិន អាយុ៣៥ឆ្នាំ មុខរបរមិនពិតប្រាកដ និងស្នាក់នៅមិនពិតប្រាកដ។ចំណែកជនរងគ្រោះមានឈ្មោះ ហ័ង ជី ភេទស្រី អាយុ៣០ឆ្នាំ ជនជាតិចិន ស្នាក់នៅផ្ទះជួល សង្កាត់លេខ៣ ក្រុង-ខេត្តព្រះសីហនុ មុខរបរបុគ្គលិកសណ្ឋាគារផ្នែកម៉ាស្សា។
លោកឧត្តមសេនីយ៍ស្នងការបន្តថា ក្រោយពីឃាត់ខ្លួនជនសង្ស័យបានសារភាពនៅចំពោះមុខសមត្ថកិច្ចថា កាល ពីថ្ងៃទី១៩ ខែកក្កដា ឆ្នាំ២០២០ ខ្លួនពិតជាបានទូរសព្ទ័ហៅជនរងគ្រោះឲ្យ ទៅម៉ាស្សានៅ សណ្ឋាគារ ស៊ីទូហាយកាង រួចធ្វើសកម្មភាពយកកាំបិតចុងស្រួចភ្ជង់គំរាមប្លន់យកលុយចំនួន ៦០០០ដុល្លារ ពិតប្រាកដមែន។
បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលក្រុងព្រះសីហនុ ដើម្បីរៀបចំកសាងសុំណុំរឿងចាត់ការតាមនីតិវិធី៕
