កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ឃាត់ខ្លួនជនសង្ស័យម្នាក់បន្ទាប់ពីបានទទួលពាក្យបណ្ដឹង
ខេត្តបន្ទាយមានជ័យ៖ នៅមូលដ្ឋានកងរាជអាវុធហត្ថក្រុងប៉ោយប៉ែត បន្ទាប់ពីបានទទួលពាក្យបណ្ដឹងឈ្មោះ ស្ងួន ពិសិដ្ឋ ភេទប្រុស អាយុ ២៧ឆ្នាំ ករណីលួចកាលពីថ្ងៃទី០៤ ខែសីហា ឆ្នាំ២០២០ វេលាម៉ោង០៣/០០នាទី នៅចំណុចផ្សាររាត្រី ភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ។
លោក វ/ត្រី នួន នីណារ៉ូ មេបញ្ជាការ មូលដ្ឋានអាវុធហត្ថក្រុងប៉ោយប៉ែត បានដឹកនាំកម្លាំងចុះស្រាវជ្រាវរហូតឈានដល់ការឃាត់ខ្លួនជនសង្ស័យចំនួន ០១ នាក់ ឈ្មោះ គាត ពិសី ភេទប្រុស អាយុ២៧ឆ្នាំ បច្ចុប្បន្ន៖ រស់នៅមិនពិតប្រាកដ (ក្រុងប៉ោយប៉ែត) នៅវេលាម៉ោង១៨ និង៥៣នាទី ថ្ងៃ ខែ ឆ្នាំ ដដែល ព្រមទាំងដកហូតបានវត្ថុតាងសរុប ទូរស័ព្ទ និងអាយផែត ចំនួន១៦គ្រឿង និងគ្រឿងបន្លាស់មួយចំនួនទៀត។
លោក វ/ត្រី នួន នីណារ៉ូ បានឱ្យសារព័ត៌មានយើងដឹងថា ជនសង្ស័យ និងវត្ថុតាងត្រូវបានកម្លាំងបញ្ជូនមកមូលដ្ឋានកងរាជអាវុធហត្ថក្រុង ដើម្បីធ្វើការសាកសួរ ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពគាស់ដំបូលហាងជួសជុលទូរស័ព្ទ ០១កន្លែង ហើយចូលយកទូរស័ព្ទ និងគ្រឿងបន្លាស់ពិតប្រាកដមែន។ ដោយផ្អែកលើចម្លើយសារភាព រួមទាំងមានវត្ថុតាងផងនោះ កម្លាំងជំនាញអាវុធហត្ថក្រុង បានកសាងសំណុំរឿងបញ្ជូនមកបញ្ជាការដ្ឋានកងរាជអាវុធហត្ថខេត្ត ចាត់ការបន្ត។
បច្ចុប្បន្ន ជនសង្ស័យរួម និងវត្ថុតាងត្រូវបានកម្លាំងការិយាល័យបទល្មើសព្រហ្មទណ្ឌខេត្ត បញ្ជូនទៅសាលាដំបូងខេត្ត ដើម្បីចាត់ការតាមនិតិវិធី៕