មនុស្ស២នាក់បានស្លាប់ភ្លាមៗ ក្នុងហេតុការណ៍គ្រោះថ្នាក់ចរាចរណ៍ បង្កឡើងដោយម៉ូតូបើកបុកអ្នកថ្មើរជើង
ខេត្តកណ្តាល៖អ្នកបើកបរម៉ូតូហុងដាសេ១២៥ និងអ្នកថ្មើរជើរ បានស្លាប់ភ្លាមៗនៅនឹងកន្លែងកើតហេតុ បន្ទាប់ពីម្ចាស់ម៉ូតូបើកបរខ្វះការប្រុងប្រយត្ន័ក្នុងល្បឿនលឿន ជ្រុលចង្កូតទៅបុកអ្នកថ្មើរជើង ដែលកំពុងដើរឆ្លងផ្លូវ។ហេតុការណ៍ដ៏រន្ធត់នេះបានកើតឡើងកាលពីវេលាម៉ោងជាង៦ល្ងាច ថ្ងៃទី៣០ ខែសីហា ឆ្នាំ២០២០ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រ២២-២៣ ស្ថិតក្នុងភូមិព្រែកក្តី ឃុំព្រែកតាទែន ស្រុកពញាឮ ខេត្តកណ្តាល។
សមត្ថកិច្ចបានឱ្យដឹងថា ជនរងគ្រោះដែលបាត់បង់ជីវិតខាងលើមានឈ្មោះ កែវ សារិទ្ធ ភេទប្រុស អាយុ៥៧ឆ្នាំ មានទីលំនៅភូមិឌួង សង្កាត់សំរោង ខណ្ឌព្រែកព្នៅ រាជធានីភ្នំពេញ ជាអ្នកថ្មើរជើង និងឈ្មោះ ពិន វីរៈ ភេទប្រុស អាយុ៤៧ឆ្នាំ មានទីលំនៅសព្វថ្ងៃភូមិបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ ជាអ្នកបើកម៉ូតូ។
សមត្ថកិច្ចបានឱ្យដឹងទៀតថា មុនពេលកើតហេតុ មានម៉ូតូមួយគ្រឿង ម៉ាកហុងដា សេ១២៥ ពាក់ស្លាកលេខភ្នំពេញ1FF-2130 ជិះធ្វើដំណើរតាមបណ្ដោយផ្លូវជាតិលេខ៥ មានទិសដៅពីជើងទៅត្បូង លុះមកដល់ចំណុចកើតហេតុ បានជ្រុលចង្កូតទៅបុកអ្នកថ្មើរជើងដែលកំពុងដើរឆ្លងផ្លូវពីកើតទៅលិច បណ្តាលឱ្យស្លាប់ទាំងអ្នកថ្មើរជើង និងអ្នកបើកបរម៉ូតូ។
បច្ចុប្បន្នសពទាំងពីរត្រូវប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ចំណែកម៉ូតូយកទៅរក្សាទុកនៅប៉ុស្តិ៍រដ្ឋបាលជាបណ្តោះអាសន្ន៕
