កំពុងជិះម៉ូតូឌុបគ្នា ត្រូវរថយន្តមិនស្គាល់ម៉ាកបើកបុក និងកិនពីលើ បណ្តាលឲ្យស្លាប់យ៉ាងអាណោចអាធម៍ នៅនឹងកន្លែង
រាជធានីភ្នំពេញ៖បុរសជាជាងសំណង់២នាក់ ត្រូវរថយន្តមិនស្គាល់ម៉ាកបើកបុក និងកិនពីលើ បណ្តាលឲ្យស្លាប់យ៉ាងអាណោចអាធម៍ នៅនឹងកន្លែង ខណ:កំពុងជិះម៉ូតូឌុបគ្នា កាលពីវេលាម៉ោង៩យប់ថ្ងៃទី៣០ ខែសីហា ឆ្នាំ២០២០ នៅតាមបណ្តោយផ្លូវបេតុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
បើតាមប្រភពព័ត៌មានបានឲ្យដឹងថា នៅមុនពេលកើតហេតុគេបានឃើញបុរស២នាក់ជិះម៉ូតូម៉ាកវ៉េវ ពណ៌ខ្មៅ ពាក់ស្លាកលេខព្រៃវែង1M-8712 ធ្វើដំណើរក្នុងទិសដៅពីជើងទៅត្បូង ក្នុងល្បឿនមធ្យម ខណៈមកដល់ចំណុចកើតហេតុខាងលើ ណាមួយផ្លូវកែងផងនោះ ហើយគាប់ជួនមានរថយន្ដមួយគ្រឿងដែលមិនចាំម៉ាក បានបើកបុក និងកិនពីលើម៉ូតូ បណ្ដាលឲ្យស្លាប់ទាំង២នាក់យ៉ាងអាណោចអាធ័មតែម្ដង ចំណែកឯម្ចាស់រថយន្ដ ក្រោយពីបង្កហេតុក៏បានបើករត់គេចបាត់ស្រមោលតែម្តង។
សមត្ថកិច្ចបានឲ្យដឹងថា សពជនរងគ្រោះមានឈ្មោះ នូ កាន អាយុជាង ២០ឆ្នាំ មុខរបរធ្វើសំណង់ ស្នាក់នៅម្ដុំវត្តសន្សំកុសល ខណ្ឌមានជ័យ មានស្រុកកំណើត ភូមិចក ឃុំសំរោងស្រុកស្វាយអន្ទរ ខេត្តព្រៃវែង និងឈ្មោះ ផន សុវណ្ណៈ ភេទប្រុស អាយុ២២ឆ្នាំ មុខរបរដូចគ្នា មានស្រុកកំណើត ភូមិជ្រោយដង ឃុំសំរោងធំស្រុកកៀនស្វាយខេត្តកណ្តាល។
សពក្រោយពីសមត្ថកិច្ចធ្វើការវាស់វែងនិងធ្វើកោសល្យវិច្ច័យរួច ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
