ឯកឧត្តម ជាវ តាយ អភិបាលខេត្តកំពត ដឹកនាំប្រជុំពិនិត្យលើគុណភាព ប្រសិទ្ធភាពការងារប្រមូលសម្រាម
ខេត្តកំពត៖ក្នុងកិច្ចប្រជុំ ស្ដីពីការត្រួតពិនិត្យលើគុណភាព ប្រសិទ្ធភាពក្នុងការប្រមូលសម្រាម នាព្រឹកថ្ងៃសុក្រ ១០កើត ខែភទ្របទ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៨ ខែសីហា ឆ្នាំ២០២០ ដែលមានថ្នាក់ដឹកនាំមកពីអង្គភាពចំណុះសាលាខេត្ត និងមន្ទីរពាក់ព័ន្ធក្នុងខេត្ត អាជ្ញាធរក្រុង ស្រុក ឃុំ សង្កាត់ នៃក្រុងកំពត និងស្រុកទឹកឈូចំនួន២១ឃុំ សង្កាត់ផងនោះ ឯកឧត្តម ជាវ តាយ អភិបាល នៃគណៈអភិបាលខេត្តកំពត បានមានប្រសាសន៍បញ្ជាក់ថា បើទោះបីរយៈពេលកន្លងមករដ្ឋបាលខេត្ត តែងបានបើកកិច្ចប្រជុំជំរុញ ណែនាំ ដល់មន្ទីរអង្គភាពជំនាញពាក់ព័ន្ធ អាជ្ញាធរ ក្រុងស្រុក ឃុំ សង្កាត់ ក្នុងក្រុងកំពត និងស្រុកទឹកឈូ ជាញឹកញាប់ក៏ពិតមែន ប៉ុន្តែនៅពេលបច្ចុប្បន្នសង្កេតឃើញ នៅមិនទាន់មានលក្ខណៈល្អប្រសើរនៅឡើយ ហើយនៅតែមានបញ្ហាប្រឈមការប្រមូលទុកដាក់កាកសំណល់សម្រាម ការថែរក្សាអនាម័យបរិស្ថាន នៅតាមមូលដ្ឋាននៃឃុំសង្កាត់នីមួយៗ ពោលគឺតាមលំនៅដ្ឋានប្រជាពលរដ្ឋ តាមដងផ្លូវ សួនសាធារណៈ តាមដងព្រែកកំពតជាដើម។
ពាក់ព័ន្ធនឹងការប្រមូលសំរាមរបស់ក្រុមហ៊ុនហ្កាអ៊ែ (gaea ) រយៈពេល១០ឆ្នាំ នៅក្នុងក្រុងកំពត និងឃុំមួយចំនួនជាប់ក្រុងកំពត កន្លងមកនេះ ភាគច្រើនគឺអាជ្ញាធរឃុំ សង្កាត់តែងតែបានលើកឡើង នៃការយឺតយ៉ាវក្នុងការប្រមូលសម្រាម ធ្វើឲ្យប្រជាពលរដ្ឋរអ៊ូរទាំជាញឹកញាប់។
ជាមួយគ្នានោះឯកឧត្ដម អភិបាលខេត្ត បានសំណូមពរដល់អាជ្ញាធរ ក្រុង ស្រុក ឃុំសង្កាត់ ត្រូវចូលរួមធ្វើយុទ្ធនាការប្រមូលសម្រាម ក្នុងភូមិសាស្រ្តរបស់ខ្លួនមួយសប្តាហ៍អោយបានម្តងធ្វើជាប្រចាំ ត្រូវផ្សព្វផ្សាយដល់ប្រជាពលរដ្ឋអោយពួកគាត់មានការយល់ដឹង ការវេចខ្ចប់ទុកដាក់សម្រាម តាមគ្រប់មធ្យោបាយដែលអាចធ្វើបាន និងត្រូវកាប់ឆ្ការព្រៃតាមដងផ្លូវ ដើម្បីអោយមានសោភណ្ឌភាពស្អាតផងដែរ៕
