កម្លាំងសមត្ថកិច្ចចម្រុះ ខេត្តបន្ទាយមានជ័យ ចុះកាប់ឆ្ការសម្អាតព្រៃ និងលាបថ្នាំការពារច្រែសស្ពានដែកទឹកថ្លាឡើងវិញ ដើម្បីអភិរក្ស និងអភិវឌ្ឍន៍សួនអនុស្សាវរីយ៍
ខេត្តបន្ទាយមាជ័យ៖ដើម្បីលើកកម្ពស់ ជម្រុញការងារអភិរក្សស្ពានដែកជាកេរសម័យអាណានិគមបារាំង និងអភិវឌ្ឍន៍សួនអនុស្សាវរីយ៍ ដែលបានបង្កើតឡើងកាលពីឆ្នាំ២០១៨កន្លងមក តាមគំនិតផ្តួចផ្តើមរបស់លោកស្រីម៉ៅ ម៉ាល័យ កែ គឹមយ៉ាន កាលពីថ្ងៃទី២៤ ខែសីហា ឆ្នាំ២០២០ កម្លាំងចម្រុះមានស្នងការនគរបាលខេត្ត កងរាជអាវុធហត្ថខេត្ត កងកម្លាំងប្រដាប់អាវុធ និងរដ្ឋបាលខេត្តបន្ទាយមានជ័យ បានសម្រុកកាប់ឆ្ការសម្អាតព្រៃ ស្មៅ ចាក់ដី និងលាបថ្នាំការពារច្រែស លើស្ពានដែកទឹកថ្លា ស្ថិតនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
បើតាមលោកប្រាក់ សារ៉ាក់ អនុប្រធានមន្ទីរសាធារណៈការ និងដឹកជញ្ជូនខេត្តបន្ទយមានជ័យ ប្រាប់អ្នកយកព័ត៌មានឲ្យដឹងថា សកម្មភាពកាប់ឆ្ការព្រៃបន្លាស្មៅ រៀបចំចាក់ដីពង្រីកពង្រាប នៅម្តុំស្ពាន និងការលាបថ្នាំច្រែសការពារស្ពានទឹកថ្លាពេលនេះ បានធ្វើឡើងតាមអនុសាសន៍របស់។លោកឧបនាយករដ្ឋមន្ត្រីកែ គឹមយ៉ាន និងលោកស្រីម៉ៅ ម៉ាល័យ កែ គឹមយ៉ាន។
លោកបន្តថា បំណងនៃសកម្មភាពនេះ គឺដើម្បីលើកកម្ពស់ ជម្រុញការងារអភិរក្សស្ពានដែកជាកេរសម័យអាណានិគមបារាំងនិងអភិវឌ្ឍន៍សួនអនុស្សាវរីយ៍ដែលបានបង្កើតឡើងកាលពីឆ្នាំ២០១៨ កន្លងមក តាមគំនិតផ្តួចផ្តើមរបស់លោកស្រីម៉ៅ ម៉ាល័យ កែ គឹមយ៉ាន និងមួយផ្នែកទៀត ក៏ដើម្បីសម្តែងសេចក្តីថ្លែងអំណរគុណចំពោះសម្តេចអគ្គមហាសេនាបតិតេជោហ៊ុន សែន នាយករដ្ឋមន្ត្រី ដែលបានផ្តល់ចំណារឯកភាពចំពោះសំណើរបស់លោកឧបនាយករដ្ឋមន្ត្រីកែ គឹមយ៉ាន ដែលសុំរក្សាទុកស្ពានដែកអាយុ៨៤ឆ្នាំនេះទុកជាប្រវត្តិសាស្ត្រនិងអនុស្សាវរីយ៍ផងដែរ និងមួយផ្នែកទៀត ដើម្បីរំលឹកគុណតម្លៃនៃសន្តិភាព ក្រោយការបញ្ចប់សង្គ្រាម។
គួររម្លឹកដែរថា យោងការស្រាវជ្រាវប្រវត្តិបានបញ្ជាក់ថា ស្ពានទឹកថ្លានេះ ជាស្ពានដែកថែបទាំងបន្ទះតាប់ជាអក្សរ UVHLជាកេរម័យអាណានិគមនិយមបារាំង នៅសល់រូបរាងដើមតែមួយគត់លើបណ្តោយផ្លូវជាតិលេខ៥ ស្ថិតនៅក្បាលស្ទឹងសិរីសោភ័ណនា ភូមិទឹក ថ្លាសង្កាត់ទឹកថ្លា ខាងលិចក្រុងសិរីសោភ័ណ ៦គីឡូម៉ែត្រ។ស្ពាននេះមានប្រវែង៨១ម៉ែត្រ ទទឺង៥ម៉ែត្រ មានសសរស្ពានបេតុង៣ជួរ ហើយត្រូវបានកសាងនៅឆ្នាំ១៩៣១ តំណាលគ្នានឹងកសាងផ្លូវជាតិលេខ៥ ភ្នំពេញ ទៅប៉ោយប៉ែតមានប្រវែង៤០៨គីឡូម៉ែត្រ។តែស្ពាននេះរហូតមកដល់សព្វថ្ងៃនេះ មានកាថទ្រុឌទ្រោមខ្លាំង ដោយសារចំណាស់ការបុកប៉ះដោយរថយន្ត រថក្រោះ និងត្រូវគ្រាប់ គ្រាប់មីនជាដើម ហើយមិនអនុញ្ញាតិឲ្យយានយន្តឆ្លងកាត់ឡើយ គឺទុកសម្រាប់តែថ្មើរជើងប៉ុណ្ណោះ៕
