កម្លាំងនគរបាលប្រឆាំងបទល្មើសសេដ្ឋកិច្ច ខេត្តបន្ទាយមានជ័យ ចុះបង្ក្រាបរថយន្តដឹកសត្វមាន់រស់ ឈ្មួញលួចនាំចូលពីទឹកដីថៃសត្វមាន់រស់
ខេត្តបន្ទាយមានជ័យ៖ដោយអនុវត្តតាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ក្នុងការទប់ស្កាត់នូវរាល់បទល្មើសឆ្លងដែនខុសច្បាប់ ពិសេសរាល់ទំនិញចំណីអាហារដែលច្បាប់ ហាមឃាត់ ជាលទ្ធផល កាលពីវេលាម៉ោង៣ទាបភ្លឺ ថ្ងៃទី២០ ខែសីហា ឆ្នាំ២០២០ លោកវរសេនីយ៍ទោ យឹម នី នាយរងការិយាល័យ នគរបាលប្រឆាំងបទល្មើសសេដ្ឋកិច្ច បានដឹកនាំកម្លាំងនគរបាលប្រឆាំងបទល្មើសសេដ្ឋកិច្ចចំនួន៣នាក់ បានធ្វើការស្ទាក់ឃាត់រថយន្តម៉ាក SANG YONG ISTANA ពណ៌ស០១គ្រឿង ពាក់ស្លាកលេខ ភ្នំពេញ 2W-0430 នៅចំណុចភូមិខ្វាវកើត ឃុំរលួស ស្រុកស្វាយចេក ខេត្តបន្ទាយមានជ័យ ដែលបើកបរដោយឈ្មោះ វ៉េត វ៉ាត់ ភេទប្រុសអាយុ៤៧ឆ្នាំ មុខរបររត់ឡានឈ្នួល រត់តាក់ស៊ី លំនៅភូមិខ្លាងាប់ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ មានដឹកសត្វមាន់រស់នាំចូលពីប្រទេសថៃ ដោយខុសច្បាប់ចំនួន៤៥តាកា ស្មើនិង៥៨៥ក្បាល។
លោនាយរងការិយាល័យ បានបញ្ជាក់ថា ឆ្លងតាមការសាកសួរចម្លើយ ឈ្មោះ វ៉េត វ៉ាត់ ជាអ្នកបើកបររថយន្ត បាននិយាយថាគាត់គ្រាន់តែស៊ីឈ្នួលដឹកសត្វមាន់រស់ឲ្យឈ្មោះ នី ភេទប្រុស អាយុ២៧ឆ្នាំ នៅភូមិទួលពង្រ ឃុំទួលពង្រ ស្រុកម៉ាឡៃ ដោយផ្ទេរចេញពីរថយន្តថៃ ត្រង់ចំណុចច្រករបៀងសេះងាប់ ស្ថិតក្នុងភូមិក្តិបថ្ម ឃុំគោករមៀត ស្រុកថ្មពួក ខេត្តបន្ទាយមានជ័យ ដោយក្នុង១ជើងបានតម្លៃ៤០ម៉ឺនរៀល ដឹកដល់ខេត្តសៀមរាប។បើតាមចម្លើយរបស់ឈ្មោះ ផល ម៉ាស់ ភេទប្រុស អាយុ២៤ឆ្នាំ នៅភូមិបឹងបេង ឃុំបឹងបេង ស្រុកម៉ាឡៃ បានឲ្យដឹងដែរថា ខ្លួនគ្រាន់តែជាមេការមើលការខុសត្រូវឲ្យឈ្មោះ នី ជាម្ចាស់មាន់តែប៉ុណ្ណោះ ដោយក្នុង១ជើង ម្ចាស់មាន់គាត់ឲ្យតម្លៃ ៥ម៉ឺនរៀល ធ្វើជាមេការនេះ២០ជើង រាល់ការដឹកពុំមានលិខិតស្នាមអ្វីទេ។
លោកវរសេនីយ៍ទោ យឹម នី បានបញ្ជាក់ទៀតថា ដោយមានបទបញ្ជាពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត នគរបាលជំនាញបានប្រគល់សត្វមាន់ទាំងអស់នេះទៅមន្ត្រីជំនាញពេទ្យសត្វខេត្ត ដើម្បីពិនិត្យ។
ពាក់ទៅនឹងករណីខាងលើនេះ បើតាមការឲ្យដឹងពីមន្ត្រីពេទ្យសត្វខេត្ត បានបញ្ជាក់ប្រាប់ថា សត្វមាន់រស់ទាំងអស់នេះ គឺជំនាញពេទ្យយកទៅធ្វើការពិនិត្យរកជម្ងឺ ដោយយកសំណាកសត្វមាន់ទាំងអស់ផ្ញើទៅនាយកដ្ឋាន ដើម្បីស្រាវជ្រាវរកជម្ងឺ បើសិនជាលទ្ធផលនៃការពិនិត្យនោះ អវិជ្ជមាន សមត្ថកិច្ចជំនាញធ្វើការផាកពិន័យតាមច្បាប់ តែបើសិនជាការពិនិត្យនោះលទ្ធផលវិជ្ជមានមន្ត្រីជំនាញនឹងស្នើសុំគោលការណ៍ព្រះរាជអាជ្ញាអមសាលាដំបូងខេត្ត ធ្វើការបំផ្លាញចោល ឯម្ចាស់មាន់មន្ត្រីជំនាញរៀបចំសំណុំរឿងអនុវត្តតាមនិតិវធីច្បាប់៕
