ស្រ្តីទើបសម្រាលកូន និងប្រជាពលរដ្ឋក្រីក្រ ចំនួន៧០គ្រួសារ នៅស្រុកកណ្តាលស្ទឹង ទទួលអំណោយពីលោក ម៉ម ប៊ុននាង ប្រធានគណៈកម្មការអង្កេត
ខេត្តកណ្តាល៖នាឱកាសអញ្ជើញជួបសំណេះសំណាល សួរសុខទុក្ខ និងនាំយកអំណោយចែកជូនស្រ្តីទើបសម្រាលកូន និងប្រជាពលរដ្ឋក្រីក្រ ចំនួន៧០គ្រួសារ នៅក្នុងឃុំត្រពាំងវែង ស្រុកកណ្តាលស្ទឹង ខេត្តកណ្តាល នៅថ្ងៃពុធ ទី១៩ ខែសីហា ឆ្នាំ២០២០នេះ លោក ម៉ម ប៊ុននាង ប្រធានគណៈកម្មការអង្កេត បោសសំអាត និងប្រឆាំងអំពើពុករលួយ គណៈកម្មការទី១០ព្រឹទ្ធសភា និងជាសមាជិកព្រឹទ្ធសភាប្រចាំភូមិភាគទី៣ ខេត្តកណ្តាល បានអំពាវនាវដល់ប្រជាពលរដ្ឋទាំងអស់ឱ្យបន្តយកចិត្តទុកដាក់ ប្រយុទ្ធប្រឆាំងនឹងជំងឺកូវីដ-១៩ តាមការណែនាំរបស់ក្រសួងសុខាភិបាល ជាពិសេសត្រូវចូលរួមថែរក្សាការពារសុខភាពផ្ទាល់ខ្លួន និងក្រុមគ្រួសារឱ្យបានល្អ សូមឧស្សាហ៍ដុសលាងសម្អាតមុខមាត់ ដៃជើង និងខ្លួនប្រាណជាមួយសាប៊ូ ឬសារធាតុសម្លាប់មេរោគ ដើម្បីទប់ស្កាត់ការឆ្លងរោគផ្សេងៗ។
លោក ម៉ម ប៊ុននាង បានបញ្ជាក់ថា ដោយរាជរដ្ឋាភិបាល ក្រសួងសុខាភិបាល និងក្រសួងជំនាញពាក់ព័ន្ធទាំងអស់ក្តាប់ជាប់ និងគ្រប់គ្រងសភាពការណ៍បានល្អ ហើយបានត្រៀមលក្ខណៈទុកជាមុន និងបានដាក់ចេញនូវបណ្តាវិធានការទប់ស្កាត់ការពារបានល្អ ឆាប់រហ័ស និងទាន់ពេលវេលា ទើបស្ថានភាពនៃជម្ងឺនេះបានធូរស្រាល ហើយការចម្លងក៏មិនមានរីករាលដាលដល់ក្នុងសហគមន៍។
អំណោយដែលត្រូវចែកជូនស្ត្រីទើបសម្រាលកូន និងប្រជាពលរដ្ឋក្រីក្រ មកពី៥ភូមិ គឺភូមិស្លែង ភូមិត្រពាំងបាគូ ភូមិដំណាក់ត្របែក ភូមិព្រៃទទឹង និងភូមិតាឡឹក ស្ថិតនៅក្នុងឃុំត្រពាំងវែង ស្រុកណ្តាលស្ទឹង ខេត្តកណ្តាល ដែលមានប្រជាពលរដ្ឋសរុប៧០គ្រួសារ ដោយក្នុងមួយគ្រួសារៗទទួលបានមី១កេស ,ទឹកត្រី១យួរ ,ទឹកស៊ីអ៊ីវ១យួរ ,អំបិល១គីឡូ ,ប៊ីចេងកន្លះគីឡូ ,សារុង១ និងថវិកាចំនួន៥ម៉ឺនរៀល និងជូនថវិកាដល់គ្រួសារសពចំនួន០៤គ្រួសារ ដោយក្នុងមួយគ្រួសារ ៗទទួលបានថវិកា២០ម៉ឺនរៀល ព្រមទាំងផ្តល់ថវិកាជួយមូលនិធិ ដើម្បីអភិវឌ្ឍន៍ឃុំត្រពាំងវែងចំនួន១២,០០០,០០០រៀល ដែលចំណាយថវិកាសរុបចំនួន២៦,៥៥០,០០០ រៀល៕
