សម្តេចក្រឡាហោម ស ខេង អញ្ជើញជាអធិបតី ក្នុងពិធីសម្ពោធដាក់ឲ្យប្រើប្រាស់ស្ពានដែកបេឡេតិ៍ ០១ខ្សែ និងអគារសិក្សាចំនួន២ខ្នង នៅស្រុកបាណន់
ខេត្តបាត់ដំបង៖ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធី សម្ពោធសាលារៀនអនុវិទ្យាល័យកន្ទឺ១ សាលាបឋមសិក្សាស្វាយព្រៃ និងស្ពានបេឡ ស្ថិតក្នុងឃុំកន្ទឺ១ ស្រុកបាណន់ ខេត្តបាត់ដំបង នាព្រឹកថ្ងៃពុធ ១កើត ខែភទ្របទ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៩ ខែសីហា ឆ្នាំ២០២០ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ ណែនាំដល់អាជ្ញាធរមូលដ្ឋាន មុនធ្វើអ្វីមួយត្រូវគិតគូរផលប្រយោជន៍ប្រជាជនជាធំ ត្រូវដោះស្រាយ រាល់គ្រប់បញ្ហាជូនប្រជាពលរដ្ឋ ប្រកបដោយភាពយុត្តិធម៌ ដើម្បីភាពសុខសប្បាយក្នុងសង្គម មិនត្រូវគិតតែ ផលប្រយោជន៍គ្រួសារ បក្ខពួករបស់ខ្លួន ជាធំនោះទេ។ជាមួយគ្នានោះសម្ដេចក៏បានអំពាវនាវដល់ប្រជាពលរដ្ឋទាំងអស់ នៅទូទាំងប្រទេស ត្រូវរួមគ្នាថែរក្សាសុខសន្តិភាព និងការអភិវឌ្ឍន៍ ដែលកម្ពុជា យើងកំពុងមានសព្វថ្ងៃនេះ។
សម្តេចបញ្ជាក់ទៀតថា បើទោះបីស្ថិតក្នុងកាលៈទេសៈដ៏លំបាក ដែលប្រទេសយើងកំពុងជាប់ដៃប្រយុទ្ធប្រឆាំងនឹងជំងឺកូវីដ១៩ក្តី ក៏រាជរដ្ឋាភិបាលនៅតែមិនបានព្រងើយកន្តើយចំពោះការកសាង និងស្តារហេដ្ឋារចនាសម្ព័ន្ធវ័ន្ត ដែលជាផ្នែកមួយក្នុងកែលម្អនូវការផ្តល់សេវាសាធារណៈជូនប្រជាពលរដ្ឋផងដែរ។
សូមជម្រាបផងដែរថា ពិធីសម្ពោធដាក់ឲ្យប្រើប្រាស់ស្ពានបេឡេ ១ខ្សែនេះមានប្រវែង១២៦ម៉ែត្រ និងអគារសិក្សាចំនួន២ខ្នង ស្មើនឹង១០ បន្ទប់ នៅសាលាបឋមសិក្សាស្វាយព្រៃ១ខ្នង ៥បន្ទប់ និងអនុវិទ្យាល័យកន្ទឺ១ ចំនួន១ខ្នង ៥បន្ទប់ផងដែរ៕
