រដ្ឋបាលខេត្តសៀមរាប រៀបចំពិធីបើកការតាំងពិព័រណ៌ផលិតផលបន្លែ សិប្បកម្ម ម្ហូបអាហារ
ខេត្តសៀមរាប៖ដើជួយបង្កើនចំណូលដល់ប្រជាពលរដ្ឋ ក្នុងអំឡុងពេលឈប់សម្រាក ខណៈដែលប្រជាពលរដ្ឋ និងអាជីវកម្មជាច្រើនកំពុងទទួលរងផលប៉ះពាល់ពីជំងឺកូវីដ-១៩ និងផ្សព្វផ្សាយអំពីសក្តានុពលទេសចរណ៍ រដ្ឋបាលខេត្តសៀមរាប បានរៀបចំតាំងពិព័រណ៌ផលិតផលបន្លែ សិប្បកម្ម ម្ហូបអាហារ និងផលិតផលកែច្នៃមកពីតាមបណ្តាក្រុង ស្រុកទាំង១២។
ឯកឧត្តម ទៀ សីហា អភិបាលនៃគណៈអភិបាលខេត្ត មានប្រសាសន៍បែបនេះក្នុងឱកាសដែលឯកឧត្តម និងលោកជំទាវ ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងលោកជំទាវ អញ្ជើញជាអធិបតីក្នុងពិធីបើកការតាំងពិព័រណ៌ផលិតផលបន្លែ សិប្បកម្ម ម្ហូបអាហារ និងផលិតផលកែច្នៃមកពីតាមបណ្តាក្រុង ស្រុកទាំង១២ កាលពីល្ងាចថ្ងៃទី១៧ ខែសីហា ឆ្នាំ២០២០។
សូមជំរាបដែរថា កន្លែងតាំងពិព័រណ៌ផលិតផលបន្លែ សិប្បកម្ម ម្ហូបអាហារ និងផលិតផលកែច្នៃ សរុបចំនួន៩៥ស្តង់ ដែលចែកជា៤ប្រភេទ រួមមាន៖ស្តង់លក់ផលិតផលកសិកម្ម ស្តង់លក់បន្លែ និងផ្លែឈើ ស្តង់លក់ផលិតផលម្ហូបអាហារ និងភេសជ្ជៈ និងអាហារប្រចាំក្រុង ស្រុកទាំង១២ និងស្តង់លក់ផលិតផលកែច្នៃ។
ឯកឧត្តម បញ្ជាក់ថា ការរៀបចំតាំងពិព័រណ៌នេះ ក្រោមការដឹកនាំរបស់ឯកឧត្តម ទៀ សីហា អភិបាល នៃគណៈអភិបាលខេត្ត បានជំរុញផលិតផលមួយភូមិមួយ ក្នុងន័យបង្កើនការផលិត និងប្រាក់ចំណូលគ្រួសារនៅតាមជនបទ។ជាមួយគ្នានេះ ឯកឧត្តម ក៏ឱ្យបងប្អូនប្រជាពលរដ្ឋដែលអញ្ជើញចូលរួមមានការប្រុងប្រយ័ត្នខ្ពស់ និងកុំភ្លេច ត្រូវចងចាំនូវ០៣ចំណុច ដូចខាងក្រោម ដើម្បីការពារ និងចូលរួមទប់ស្កាត់ជំងឺកូវីដ១៩៖
១.កុំភ្លេច ត្រៀមម៉ាស់ ឬក្រម៉ា
២.កុំភ្លេច ជែល ឬអាល់កុលលាងដៃ (យើងបានត្រៀម សាប៊ូលាងដៃជូននៅតាមទីសាធារណផងដែរ)
៣.កុំភ្លេច រក្សាគម្លាតសុវត្ថិភាពសង្គម (ចូលរួមការពារការរាលត្បាតនៃជំងឺកូវីដ-១៩)៕
