គ្រួសារ រងគ្រោះដោយខ្យល់កន្ត្រាក់ ចំនួន៤៩គ្រួសារ នៅស្រុកកំពង់ត្រាច ទទួលអំណោយពីសាខាកាកបាទក្រហមកម្ពុជា ខេត្តកំពត
ខេត្តកំពត៖ក្នុងឱកាសអញ្ជើញជូបសំណះសំណាល សួរសុខទុក្ខ និងផ្តល់អំណោយមនុស្សធម៌ ជូនប្រជាពលរដ្ឋរងគ្រោះ ដោយសារខ្យល់កន្រ្តាក់ ចំនួន៤៩គ្រួសារ នៅស្រុកកំពង់ត្រាច ស្ថិតនៅបរិវេណវិទ្យាល័យព្រះបីតាជាតិ កាលពីព្រឹក ថ្ងៃអាទិត្យ ១២រោច ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៦ ខែសីហា ឆ្នាំ២០២០ ឯកឧត្តម ជាវ តាយ អភិបាល នៃគណៈអភិបាលខេត្ត នូវតែបន្តក្រើនរំលឹក ណែនាំ និងសំណូមពរដល់បងប្អូនទាំងអស់ ចូលរួមបង្ការ និងទប់ស្កាត់ការរាតត្បាតនៃជំងឺកូវីដ១៩ តាមគោលការណ៍ណែនាំរបស់រាជរដ្ឋាភិបាល ពិសេសក្រសួងសុខាភិបាល។ចំពោះបងប្អូនដែលជាកសិករ មានដីធ្វើកសិកម្ម ត្រូវដាំដុះ បង្កបង្កើនផល សំដៅធ្វើយ៉ាងណាកុំឲ្យដីទំនេរ និងរៀបចំវារីវប្បកម្មផង។
ក្នុងពិធីនោះឯកឧត្តម អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពត បានសំដែងនូវការសោកស្តាយចំពោះប្រជាពលរដ្ឋទាំងអស់ ដែលរងគ្រោះដោយសារខ្យល់កន្ត្រាក់ កាលពីថ្ងៃទី០២ ដល់ថ្ងៃទី០៦ ខែសីហា កន្លងមកនេះ និងឯកឧត្តម បាននាំមកនូវការផ្តាំផ្ញើការសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះបងប្អូនប្រជាពលរដ្ឋទាំងអស់ អ្នកស្ម័គ្រចិត្ត និងយុវជនកាកបាទក្រហម ដោយក្តីនឹករលឹកបំផុត។និងស្នើសុំការយោគយល់ពីបងប្អូនប្រជាពលរដ្ឋ ដែលរងគ្រោះទាំងអស់ផងដែរ ដោយជំនួយកាកបាទក្រហមខេត្ត មានចំនួនតិចតួច មិនបានសមស្របទៅនឹងទំហំនៃការខ្វះខាតរបស់បងប្អូនឡើយ ប៉ុន្តែទោះជាយ៉ាងណា ក៏អំណោយនេះជួយសម្រាលការលំបាករបស់បងប្អូនប្រជាពលរដ្ឋយើងបានមួយរយៈពេលផងដែរ។
អំណោយដែលត្រូវផ្តលជូនដល់គ្រួសាររងគ្រោះរួមមាន៖អង្ករ២៥គ.ក្រ,មី១កេស, ស្ករត្នោត១គ.ក្រ, ទឹកត្រី១យូរ, អាវយឺត១កញ្ចប់,ថវិកាគ្រួសាររបើកដំបូលធ្ងន់ធរ១៣គ្រួសារ ស្មើនឹង៥២ម៉ឺនរៀល គ្រួសាររបើកដំបូលមធ្យម៣៦គ្រួសារ ស្មើនឹង៧២ម៉ឺនរៀល, អ្នកស្ម័គ្រចិត្ត៦នាក់ , យុវជនកាកបាទក្រហម៨នាក់, នគរបាល២០នាក់, អាវុធហត្ថ៨នាក់១នាក់ ១ម៉ឺនរៀល និងគ្រូពេទ្យ៣នាក់ ម្នាក់ ២ម៉ឹនរៀល៕