សាខាកាកបាទក្រហមកម្ពុជា ខេត្តកំពង់ធំ និងមន្ទីរសាធារណការ និងដឹកជញ្ជូនខេត្ត បើកយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោកថ្មី នៅស្រុកចំនួនពីរក្នុងខេត្ត
ខេត្តកំពង់ធំ៖ក្នុងឱកាសអញ្ជើញជាអធិបតីក្នុងពិធីយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោក និងចែកមួកសុវត្ថិភាពដល់បងប្អូនប្រជាពលរដ្ឋ ដែលបានចូលរួមឆ្លើយសំនួរត្រូវ ក្នុងគោលបំណង ដើម្បីបញ្ញាក់ស្មារតី ដល់បងប្អូនប្រជាពលរដ្ឋ ដែលជាអ្នកប្រើប្រាស់ផ្លូវទាំងអស់ ឲ្យយល់ដឹងអំពីច្បាប់ចរាចរណ៍ផ្លូវគោកថ្មី និងចូលរួមគោរពច្បាប់ចរាចរណ៍ កាលពីរសៀលថ្ងៃទី១៤ ខែសីហា ឆ្នាំ២០២០ ស្ថិតនៅទីតាំងពីរផ្សេងគ្នា ទីតាំទី១ គល់ស្ពានស្ទឹងសែន សួនកុមារ ក្រុងស្ទឹងសែន ទីតាំងទី២ ជិតវិទ្យាល័យតាំងក្រសាំង ស្រុកសន្ទុក ខេត្តកំពង់ធំនោះ ឯកឧត្តម សុខ លូ អភិបាល នៃគណៈអភិបាលខេត្តកំពង់ធំ បានមានប្រសាសន៍លើកឡើងថា យុទ្ធនាការអប់រំផ្សព្វផ្សាយ សស្តីពីសុវត្ថិភាពចរាចរណ៍ផ្លូវគោកនេះ ធ្វើឡើងក្នុងគោលបំណងអប់រំផ្សព្វផ្សាយអប់រំណែនាំ ដល់អ្នកបើកបរយានយន្តគ្រប់ប្រភេទ ឲ្យចូលរួមគោរពច្បាប់ចរាចរណ៍ផ្លូវគោក បើកបរឲ្យមានការប្រុងប្រយ័ត្នខ្ពស់ មិនត្រូវបើកបរក្រោមឥទ្ធិពល នៃគ្រឿងស្រវឹងដាច់ខាត ត្រូវចេះគោរពសិទ្ធិអាទិភាព និងមានការអធ្យាស្រ័យខ្ពស់ រាល់ពេលបើកបរ ធ្វើយ៉ាងណាចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក។
លើសពីនេះទៀត ក្រុមការងារបានរៀបចំកម្មវិធី សំណួរចម្លើយ ពាក់ព័ន្ធនឹងច្បាប់ចរាចរណ៍ផ្លូវគោកថ្មី ដើម្បីទទួលបានមួកសុវត្ថិភាព និងរង្វាន់ផ្សេងទៀត ព្រមទាំងចែកជូននូវឯកសារពាក់ព័ន្ធ និងច្បាប់ស្តីពីសុវត្ថិភាព ចរាចរណ៍ផ្លូវគោកថ្មី។
សូមជំរាបដែរថា ក្នុងយុទ្ធនាការទាំងពីរទីតាំងខាងលើនេះ បានប្រើប្រាស់សម្ភារ និងឯកសារមួយចំនួន រួមមាន៖ខិតប័ណ្ណផ្សព្វផ្សាយចំនួន៧៥០ក្បាល-សន្លឹក សៀវភៅឣប់រំមូលដ្ឋានគ្រឹះសុវត្ថិភាពចរាចរណ៍ ចំនួន២៧០ក្បាល មួកសុវត្ថិភាពចំនួន ៤៧មួក។
សូមបញ្ចាក់ដែរថា ពិធីនេះមានការអញ្ជើញចូលរួមពីពីមន្ទីរសាធារណការ និងដឹកជញ្ជូនខេត្ត គណ:កម្មាធិការសាខាកាកបាទក្រហមកម្ពុជាខេត្តកំពង់ធំ ព្រមទាំងសមាជិក សមាជិការគណៈកម្មាធិការសាខា ក្រុមប្រតិបត្តិសាខា ទីប្រឹក្សាយុវជន និងយុវជនកាកបាទក្រ
ហមកម្ពុជា អ្នកស្ម័គ្រចិត្តកាកបាទក្រហម នគរបាលចរាចរណ៍ផ្លូវគោក ក្រុង ស្រុក ខេត្ត ប្រមាណជិត ៣០០នាក់ផងដែរ៕