កំពុងផ្សាដែកសង់រោង ដាក់លក់ទំនិញ ត្រូវបានអគ្គិសនីឆក់ស្លាប់
ខេត្តបាត់ដំបង៖ជាងសំណង់ម្នាក់ ត្រូវបានឆក់ខ្សែស្លាប់ភ្លាមៗ ខណ:កំពុងផ្សាដែកសង់រោងដាក់លក់ទំនិញ កាលពីវេលាម៉ោង០៩និង១០នាទីព្រឹក ថ្ងៃទី០៧ ខែកក្កដា ឆ្នាំ២០២០ ស្ថិតនៅចំណុចក្រុមទី០៧ ភូមិសាលាបាឡាត់ សង្កាត់អូរម៉ាល់ ក្រុងបាត់ដំបង។
សមត្ថកិច្ចបានឲ្យដឹងថា ជនរងគ្រោះមានឈ្មោះ វ៉ន មករា ភេទប្រុស អាយុ៣១ឆ្នាំ មុខរបរជាជាងសំណង់ មានទីលំនៅក្នុងភូមិរំចេក១ សង្កាត់រតនៈ ក្រុងបាត់ដំបង។
បើតាមសាក្សីនៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ ជនរងគ្រោះខាងលើបានទៅស៊ីឈ្នួលសង់រោងលក់ទំនិញអោយឈ្មោះ វី រ៉ា ភេទស្រី អាយុ៣៧ឆ្នាំ នៅចំណុចកើតហេតុខាងលើ គ្រាដែលជនរងគ្រោះកំពុងផ្សាដែកនៅលើដំបូល ក៏បានលើកដែកទៅប៉ះនឹងខ្សែកាបអគ្គិសនី ក៏បណ្តាលអោយឆ្លងចរន្តឆក់ធ្លាក់ចុះមកដី ភ្លាមនោះក្រុមជាងបាននាំគ្នាដឹកយកទៅសង្គ្រោះនៅមន្ទីរពេទ្យដែរ តែជាអកុសលជនរងគ្រោះបានស្លាប់ មុនពេលបញ្ជូនមកកាន់មន្ទីរពេទ្យទៅហើយ។
ក្រោយកើតហេតុសពជនរងគ្រោះ ត្រូវបានក្រុមគ្រួសារ ទទួលយកទៅធ្វើបុណ្យតាមប្រពៃណី៕
