អភិបាលខេត្តកែប ដឹកនាំកិច្ចប្រជុំផ្សព្វផ្សាយ នូវបទបញ្ជារបស់សម្តេចតេជោ អំពីការកាត់ឆ្វៀលដីជូនពលរដ្ឋ រស់នៅក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ
ខេត្តកែប៖ឯកឧត្ដម សោម ពិសិដ្ឋ អភិបាល នៃគណៈអភិបាលខេត្តកែប និងជាប្រធានគណៈបញ្ជាការឯកភាពខេត្ត បានណែនាំដល់មន្ទីរ អង្គភាពដែលពាក់ព័ន្ធជាពិសេសគឺ មន្ទីរបរិស្ថានខេត្ត មន្ទីរកសិកម្ម រុក្ខាប្រមាញ់ និងនេសាទខេត្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត គឺត្រូវត្រៀមសហការអោយបានល្អជាមួយក្រសួង ក្នុងការកាត់ឆ្វៀលដីជូនបងប្អូនប្រជាពលរដ្ឋ ដែលបានមករស់នៅលើទីតាំងដី ដែលជាគម្របព្រៃឈើ ឬជាតំបន់ការពារ ឬតំបន់អភិរក្សសត្វព្រៃរបស់រដ្ឋ ដែលមានពលរដ្ឋបានមកធ្វើផ្ទះរស់នៅជាងដប់ម្ភៃឆ្នាំមកហើយ។
ឯកឧត្ដម មានប្រសាសន៍ណែនាំបែបនេះ បានធ្វើឡើងក្នុងកិច្ចប្រជុំ គណៈបញ្ជាការឯកភាពខេត្ត កាលពីរសៀលថ្ងៃសុក្រ ៣កើត ខែអាសាឍ ឆ្នាំជូត ទោស័ក ព.ស.២៥៦៤ត្រូវនឹង ថ្ងៃទី០៣ ខែកក្កដា ឆ្នាំ២០២០ បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដាក់ចេញបទបញ្ជារ ស្តីអំពីការកាត់ឆ្វៀលដីជូនពលរដ្ឋរស់នៅក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ ក្នុងសម័យប្រជុំគណៈរដ្ឋមន្រ្តីពេញអង្គ កាលពីព្រឹកថ្ងៃទី៣ ខែកក្កដា ឆ្នាំ២០២០។
ជាមួយគ្នានេះដែរឯកឧត្ដមក៏បានណែនាំបន្ថែម ដល់មន្ទីរពាក់ព័ន្ធ រដ្ឋបាលក្រុង ស្រុក ត្រូវពិនិត្យ សិក្សា និងធ្វើស្ថិតិអោយបានច្បាស់លាស់ប្រកបដោយតម្លាភាព និងសមធម៌នូវប្រជាពលរដ្ឋដែលបានតាំងទីលំនៅលើដីរដ្ឋកន្លងមក បង្កើតកូនចៅរាប់សិបឆ្នាំមកហើយនៅលើទីតាំងដីទាំងនោះ ដើម្បីចេញប្លង់អោយពួកគាត់បានរស់នៅកាន់ស្របច្បាប់ ជៀសវាងប្រជាពលរដ្ឋមានការភ័យខ្លាច អត់ឃ្លាន រត់ទៅចំណាកស្រុកតទៅទៀត។
ក្រៅពីនេះ ឯកឧត្ដម សោម ពិសិដ្ឋ អភិបាលនៃគណៈអភិបាលខេត្តកែប ក៏បាដាក់ចេញទិសដៅការងារមួយចំនួនបន្ថែមទៀតសម្រាប់អនុវត្ត ជាពិសេសការការពារសន្តិសុខសណ្តាប់ប្រជាពលរដ្ឋ ភ្ញៀវទេសចរជាតិ អន្តរជាតិដែលមកទស្សនា សម្រាកលម្ហែក្នុងខេត្ត៕
